Әһли Бејт -АБНА- хәбәр аҝентлијинин вердији хәбәрә әсасән: Ҹинајәт Мәҹәлләсинин 221.3-ҹү маддәси илә (Хулиганлыг, силаһдан вә ја силаһ гисминдә истифадә едилән әшјалары тәтбиг етмәклә төрәдилдикдә) барәләриндә иттиһам галдырылан ҝәнҹәли руһаниләр Фәхри Илјасовун вә Азәр Ҹәбијевин вәкили Елчин Намазов баш прокурор Закир Гаралова, дахили ишләр назири Рамил Усубова, омбудсман Елмира Сүлејмановаја мүраҹиәт едиб.
Вәкил “Медиа форум”а ачыгламасында дејиб ки, мүраҹиәтә сәбәб Ҝәнҹә Шәһәр Полис Идарәсинин рәиси Расим Мусајевин ону һәдәләмәсидир: “Руһаниләрин мүдафиәси илә мәшғул олдуғума ҝөрә мәнә тәзјиг едир. Мәни Вәкилләр Коллеҝијасындан чыхартдыраҹағы вә һәбс етдирәҹәји илә һәдәләјир. Рәис тәләб едир ки, үзләшдијим ганунсузлуглары мәтбуата данышмајым”.
Елчин Намазов билдириб ки, мүдафиәсини тәшкил етдији шәхслә конфиденсиал шәраитдә дејил, камера гаршысында вә ики нәфәр полисин мүшајиәти алтында ҝөрүшүрләр: “Бу, дүзҝүн дејил. Һүгуг позунтусудур”.
Дәфәләрлә белә һәдәләрә раст ҝәлдијини дејән Елчин Намазов һазырда һәдәләмәләрин бир мүдафиәчи кими ону нараһат етмәдијини дејир: “Дәфәләрлә белә һәдәләрлә үзләшмишәм. Лакин истинтага Расим Мусајевин гејри-рәсми нәзарәт еләмәси вә мүстәнтигләрин онун тапшырығына ујғун һәрәкәт етмәси бизи дүшүндүрмәјә билмәз”.
Вәкилин вердији мәлумата ҝөрә, һүгугларыны мүдафиә еләдији һәр ики руһани Ҝүрҹүстана ҝедәркән сахланылыблар: “Һазырда онларын сахланмасынын сәбәби иш материалларында белә јохдур. Онлар сахта фактларла һәбс олунублар”.
Һәр ики руһани һаггында јанварын 18-дә Ҝәнҹәнин Низами Рајон Мәһкәмәси һәбс гәтимкан тәдбири сечиб. Вәкил онлардан шикајәтчи оланларын вә һадисәнин шаһидләринин полис әмәкдашлары олдуғуну дејиб: “Иш материалларында гејд олунуб ки, Фәхри Илјасов Низами Рајон Полис Шөбәси рәисинин башына стул чырпмаг истәјиб. Азәр Ҹәбијев дә ҝуја һансыса полис нәфәри илә далашырмыш. Башга бир полис онлары сакитләшдирмәк истәјиб. Бу заман Азәр Ҹәбијев она хәсарәт јетириб”.
Февралын 10-да Ҝәнҹә Шәһәр Низами Рајон Мәһкәмәсиндә руһаниләрин һәбс гәтимкан тәдбиринин ев дустаглығы илә әвәз едилмәси шикајәтинә бахылаҹаг.
Диггәт: Хәбәрдән истифадә етдикдә мәбәјә истинад лазымдыр
