Әһли Бејт -АБНА- хәбәр аҝентлијинин вердији хәбәрә әсасән: Вәкил Садиг Бағыров билдириб: Февралын 11-дә Бакы Апеллјасија Мәһкәмәси Азәрбајҹан Ислам Партијасы Астара рајон тәшкилатынын сәдри Руфулла Ахундзадәнин һәбсинин ев дустаглығы илә әвәзләнмәси вәсатәтинин тәмин олунмамасындан верилән шикајәтә бахаҹаг.
Февралын 3-дә Нәсими Рајон Мәһкәмәси Азәрбајҹан Ислам Партијасы сәдринин мүавини Вагиф Абдуллајевин, Руфулла Ахундзадәнин, еләҹә дә АИП лидери Мөвсүм Сәмәдовун гајыны Фирдовси Мәммәдрзајевин һәбс гәтимкан тәдбиринин ев дустаглығы илә әвәз едилмәси вәсатәтинә бахыб. Вәсатәтләр тәмин едилмәјиб. Вәкилләр Нәсими Рајон Мәһкәмәсинин гәрарындан апеллјасија шикајәти верибләр.
Вагиф Абдуллајевин вә Фирдовси Мәммәдрзајевин апеллјасија шикајәтләринә бахылаҹаг тарих мәлум дејил.
Фирдовси Мәммәдрзајевин вәкили Шәфа Ҹамалзадә гејд едиб ки, истинтаг гаршысында иш материаллары илә танышлыг вә иҹтимаијјәт үчүн ачыгланмасы мүмкүн олмајан бир нечә вәсатәт галдырыб: “Вәсатәтләр тәмин едилиб. Сахланылан шәхслә мәним ҝөрүшүм һеч бир мане олмадан тәмин едилир. Фирдовси бәјин дә сахланма јериндә һеч бир проблеми јохдур”.
Вагиф Абдуллајев Ҹинајәт Мәҹәлләсинин 28, 214.2.1-ҹи (габагҹадан әлбир олан бир груп шәхс, мүтәшәккил дәстә вә ја ҹинајәткар бирлик (ҹинајәткар тәшкилат) тәрәфиндән ҹинајәтә һазырлыг), 28, 214.2.3-ҹү (одлу силаһдан вә силаһ гисминдә истифадә олунан предметләрдән истифадә етмәклә ҹинајәтә һазырлыг), 228.3-ҹү (Ганунсуз олараг одлу силаһ, онун комплект һиссәләрини, дөјүш сурсаты (јивсиз одлу ов силаһы вә һәмин силаһ үчүн дөјүш сурсаты истисна олмагла), партлајыҹы маддәләр вә гурғулар әлдә етмә, башгасына вермә, сатма, сахлама, дашыма вә ја ҝәздирмә), 278-ҹи (һакимијјәти зорла әлә кечирмә вә ја ону зорла сахлама) маддәләри илә иттиһам олунур.
Руфулла Ахундзадә вә Фирдовси Мәммәдрзајевә дә (278-ҹи маддә истисна олмагла) ејни ҹинајәт маддәләри илә иттиһам ирәли сүрүлүб.
Диггәт: Хәбәрдән истифадә етдикдә мәбәјә истинад лазымдыр
