Әһли Бејт -АБНА- хәбәр аҝентлијинин вердији хәбәрә әсасән: Һүгуг мүдафиәчиси Лејла Јунусун ев телефонлары кәсилдијинә ҝөрә мәһкәмә иддиасы галдырыб. Дүнән СДИ директорунун јајдығы мәлуматда билдирилиб ки, бир һәфтә кечмәсинә бахмајараг нә Јасамал рабитә шөбәси, нә дә Рабитә вә Информасија Технолоҝијалары Назирлији ганунсуз олараг онлара мәхсус Шәмси Бәдәлбәјли күчәси 38, мәнзил 2 үнванында олмуш ики телефон хәттинин ҝери гајтармајыб:
“Мәһкәмә истинтагы олмадан телефонларын бәрпа олунмасы ағыллы вә һүгуги аддым оларды, она ҝөрә ки, биз мәһкәмә иддиамызда бизә вердикләри нараһатчылыға ҝөрә һеч бир мадди компенсасија тәләб етмәмишдик. Лакин Азәрбајҹанын иҹра органлары мүлкијјәт һүгугуну позмаларына бахмајараг диалога ҝирмирләр”.
Ачыгламада Бакы шәһәр Иҹра Һакимијјәтинин башчысы Һаҹыбала Абуталыбов тәрәфиндән ганунларын позулмасы барәдә гејдләр вар: “23-26 јанвар тарихләриндә Бакы вә Нәсими рајон иҹра һакимијјәтләринин нүмајәндәләри Шәмси Бәдәлбәјли күчәси 36-42 үнванларындакы мәнзилләрә ҝәләрәк Һаҹыбала Абуталыбовун адындан сакинләрә билдирмишләр ки, онларын мәнзилләри ән јахын заманда сөкүләҹәкдир. Бу заман Иҹра Һакимијјәти нүмајәндәләри, онларын тәләбини әсасландыран һеч бир һүгуги сәнәд тәгдим етмәјиб вә сакинләрдән тәҹили олараг онлара мәхсус мәнзилләрин мүлкијјәт кағызыны вә техники паспортуну МИС-ә тәһвил вермәләрини тәләб едибләр. Анҹаг Конститусијанын 13-ҹү маддәсиндә дејилир: “Азәрбајҹан Республикасында мүлкијјәт тохунулмаздыр вә дөвләт тәрәфиндән мүдафиә олунур.” О ҹүмләдән 29-ҹу маддәдә: “Һеч кәс мәһкәмәнин гәрары олмадан мүлкијјәтиндән мәһрум едилә билмәз. Әмлакын там мүсадирәсинә јол верилмир. Дөвләт еһтијаҹлары вә ја иҹтимаи еһтијаҹлар үчүн мүлкијјәтин өзҝәнинкиләшдирилмәсинә јалныз габагҹадан онун дәјәрини әдаләтли өдәмәк шәрти илә јол верилә биләр”.
Мүлки Мәҹәлләсинин 157.9 маддәсинә ҝөрә “дөвләт еһтијаҹлары вә ја иҹтимаи еһтијаҹлар тәләб етдикдә дөвләт тәрәфиндән мүлкијјәт јалныз ганунла иҹазә верилмиш һалларда јолларын вә диҝәр коммуникасија хәтләринин чәкилмәси, сәрһәд золағынын мүәјјән едилмәси вә ја мүдафиә әһәмијјәтли објектләрин тикилмәси мәгсәдилә мүвафиг дөвләт органы (Назирләр Кабинети) тәрәфиндән вә јалныз базар дәјәри мигдарында габагҹадан әвәзи өдәнилмәклә өзҝәнинкиләшдирилә биләр. Ејни заманда, Назирләр Кабинетинин гәрарлары Дашынмаз әмлакын Дөвләт Рејестриндә мүтләг гејдә алынмалыдыр”.
Л.Јунус бундан әлавә Мәнзил Мәҹәлләсинин 31-ҹи маддәнин бәндләринә истинад едәрәк билдириб ки, ҹәнаб Һ.Абуталыбов ҝөстәрилән һүгуги нормаларла таныш дејил: “Беләликлә, Назирләр Кабинетинин һеч бир гәрары јохдур. Она ҝөрә дә о Дашынмаз әмлакын Дөвләт Рејестриндә гејдијјатдан кечә билмәз . Мәнзил Мәҹәлләсинин 31-ҹи маддәсинин бәндләриндән һеч бири нәзәрә алынмајыб вә јеринә јетирилмәјиб. Бүтүн 2010-ҹу ил әрзиндә Бакы шәһәр Иҹра Һакимијјәтинин нүмајәндәләри Нәсими рајон полис идарәсинин әмәкдашлары илә бирликдә сакинләри Фүзули вә Шәмси Бәдәлбәјли күчәләриндәки евләриндән вә мәнзилләриндән зор ҝүҹүнә чыхармышлар, евләри јерлә јексан етмишләр». БизимЈол
Диггәт: Хәбәрдән истифадә етдикдә мәнбәјә истинад лазымдыр
