Әһли Бејт -АБНА- хәбәр аҝентлијинин вердији хәбәрә әсасән: Мәктубда өлкәнин орта мәктәбәләриндәки һиҹаб гадағасы вә буна етираз едәнләрин һәбси нараһатчылыг доғурдуғу билдирилир.
Мәктубун там мәтнини диггәтинизә чатдырырыг:
“Бисмиллаһир Рәһманир Рәһим.
Мөмин кишиләрлә мөмин гадынлар бир-биринә достдурлар (һајандырлар). Онлар (инсанлара) јахшы ишләр ҝөрмәји әмр едәр, пис ишләри јасаг едәр, намаз гылыб зәкат верәр, Аллаһа вә Пејғәмбәринә итаәт едәрләр. Аллаһ, әлбәттә ки, онлара рәһм едәҹәкдир. Аллаһ, һәгигәтән, јенилмәз гүввәт саһиби, һикмәт саһибидир! (Төвбә сурәси ајә 71)
Ҹәнаб Шејх Һәзрәтләри!
Јазыб сизә билдирмәк истәјирик ки, сон заманлар Азәрбајҹанда ҝүндәмдә олан һиҹаблы гызларын мәктәбә бурахылмамасы мәсәләси һамыны нараһат етдији кими, биз Ләнкәран руһаниләринин дә нараһатчылығына сәбәб олмушдур. Бир нечә вахтыр ки, актуал сөһбәтләримизә чеврилән Аллаһын биз инсанлара һагг олараг назил етдији һиҹаб ајәси бу ҝүн Азәрбајҹанда мүәјјән шәхсләр тәрәфиндән арадан ҝетмәкдәдир. Һамыја мәлумдур ки, Азәрбајҹан Республикасы толерант бир өлкәдир. Бу өлкәдә һәр кәсин етигат азадлығы вардыр. Амма һиҹаблы гызларымызын мәктәбләрдә тәзјигләрә мәруз галмасы, онларын ҝүн-ҝүндән артан тәһдид вә тәнгидләрлә үз-үзә ҝәлмәси, һәм конститусијамызда олан маддәләрилә (Виҹдан азадлығы маддә 48, тәһсил алма һүгугу маддә 42, шәрәф вә ләјагәтин горунмасы маддә 46) зидддир.
Аллаһымыз Ислам динини вә онун әмр вә һөкүмләрини, мүгәддәс Гурани Кәримин васитәсилә бизләрә чатдырыр.
Ҹәнаб Шејх!
Сизләрдә чох ҝөзәл билирсиниз ки, Аллаһдан бизләрә ҝөндәрилән һөкмләрдән биридә һиҹаб әмридир.
Аллаһ Тәала Әһзаб сурәсинин 59-ҹу ајәсиндә бујурур: “Ја Пејғәмбәр! Зөвҹәләринә, гызларына вә мөминләрин өврәтләринә де ки, (евдән чыхдыгда ҹаријәләрә охшамасынлар дејә, бәдәнләрини башдан-ајаға ҝизләдән) өрпәкләрини өртсүнләр. Бу онларын танынмасы (ҹаријә дејил, азад гадын олдугларынын билинмәси) вә онлара әзијјәт верилмәмәси үчүн даһа мүнасибдир. Аллаһ бағышлајандыр, рәһм едәндир!”.
Ҹәнаб Шејх!
Бу ҝүн биз Ләнкәран руһаниләринин нараһатчылығына әсас сәбәб илк нөвбәдә илаһи әмрин бәзи шәхсләр тәрәфиндән инкар олунмасы, Аллаһа итаәт едән инсанларын һагларынын позулмасы, ејни заманда вәтәндашларын һүгугунун арадан ҝетмәсидир.
Биз Ләнкәран руһаниләри, тәһсил оҹагларында һиҹаб мәһдудијјәтинин гојулмасыны писләјирик. Һәмчинин бу мәсәләдән олдугҹа нараһат олдуғумузу бәјан едирик!
Ҹәнаб Шејх!
Мүгәддәс Руһани адын дашыјан вә сизинлә ејни либасда олан руһаниләрин, Рәббимизин әмри олан һиҹаба гадаға гојулмасына етираз етдикләринә ҝөрә, хулиганлыг маддәсилә һәбс олунмасы бизи нараһат етдији кими, сизи дә нараһат етмәјә билмәз. Биз инанырыг ки, дөвләт атрибуту олан бајрагда јашыл золаг гәдәр Ислам әмрләринә һөрмәт етмәји дөвләт гаршысында халга бел бағлајараг нүмајиш етдирәҹәксиниз. Буну да халг билир ки, 20 јанвар фаҹиәсиндә о заман бүтүн мәмурлар ҝизләндији һалда, сизин башчылығыныз алтында руһаниләр халгла олду вә һәмин һадисәләрдә Горбачову илк мәһкум едәнләрдән бири дә мәһз сиз олдунуз. Биз әминик ки, ичиниздә олан Әһли-Бејт севҝиси һиҹабы мүдафиә етмәјә сизи сөвг едәр вә бу ишдә мүвәффәг оларсыныз.Үмидварыг ки, бу мәсәләдә бир Шејх олараг бизләрә јардым едиб, бу мәсәләнин һәллиндә әлиниздән ҝәләни әсирҝәмәјәҹәксиниз.
Муһәммәд (әлејһи вә алиһис сәлам) Аллаһын Пејғәмбәридир. Онунла бирликдә оланлар (мөминләр) кафирләрә гаршы сәрт, бир-биринә (өз араларында) исә мәрһәмәтлидирләр. Сән онлары (намаз вахты) рүку едән, сәҹдәјә гапанан, Аллаһдан риза вә лүтф диләјән ҝөрәрсән. Онларын әламәти үзләриндә олан сәҹдә изидир. (Гијамәт ҝүнү онлар үзләриндәки мөминлик нуру алынларындакы мөһүр јери илә танынырлар). Бу онларын Төвратдакы вәсфидир. Инҹилдә исә онлар елә бир әкинә бәнзәдилирләр ки, о артыг ҹүҹәртисини үзә чыхармыш, ону бәсләјиб ҹана-гүввәтә ҝәтирмиш, о да (о ҹүҹәрти дә) мөһкәмләниб ҝөвдәси үстүнә галхараг әкинчиләри һејран гојмушдур. (Аллаһын бу тәшбиһи) кафирләри гәзәбләндирмәк үчүндүр. Онлардан иман ҝәтириб јахшы әмәлләр едәнләрә Аллаһ мәғфирәт (ҝүнаһлардан бағышланма) вә бөјүк мүкафат (Ҹәннәт) вәд бујурмушдур! (Фәтһ сурәси ајә 29).
Вәссәламу әләјкум вә рәһмәтуллаһу вә бәрәкатуһу! “
Диггәт: Хәбәрдән истифадә етдикдә мәнбәјә истинад лазымдыр
