Јанварын 13-дә хәбәр аҝентликләри Низами рајон Полис Идарәсинә истинадән ҝеҹә саатларында күтләви давада үч полис әмәкдашынын бычагландығы барәдә мәлумат јајыб. Рәсми мәлумата ҝөрә, јүнҝүл хәсарәт алдығы дејилән Дахили Ишләр Назирлијинин Чевик Полис Алајынын әмәкдашлары һоспиталда амбулатор мүалиҹә алыб евә бурахылыыб.
Елә һәмин ҝүн, давада иштирак етдији вә полисә хәсарәт јетирдији иддиа олунан Елвин Әсҝәровун мејити дә аиләсинә верилиб. Мәтбуатда, сосиал шәбәкәләрдә Е.Әсҝәровун ҹидди хәсарәт алмыш һалда вә бунун Низами рајон полис бөлмәсиндә чәкилдији иддиа едилән шәкилләри долашыр.
«Һеч ким мәнә демир ки, артыг Елвин јохдур. Ананын јеҝанә оғлу, 30 јашында, арзуларынын һәлә чичәкләндији бир вахтда».
«ЕЛВИН СӨЈҮШ ҜӨТҮРӘН ДЕЈИЛДИ»
Бакынын Нәриманов рајонунда јашајан Рәфијевләр аиләси јас ичиндәдир. Анасы Роза Рәфијева һадисәни хатырлајыр. Даһа доғрусу, јанварын 13-дә оғлунун ҝеҹә евә ҝәлмәдијини, сонрадан исә онун автомобил гәзасына дүшдүјү барәдә хәбәр алдығыны вә 24-ҹү полис бөлмәсинә ҝетдијини данышыр. О дејир ки, һәмин ҝүн Елвинлә бир јердә олан достлары она данышыб ки, «Неон Палаҹе» ресторанынын гаршысында ҝөрүшүбләр вә бәркдән данышыб-ҝүлүбләр. Роза Рәфијева:
- Дүнән онун досту Мәһәммәд бурда деди ки, биз уҹадан ҝүлүб зарафатлашырдыг. Јахындан кечән полисләр бизә јахынлашды, елә билди биз далашырыг, сәнәдләримизи истәди. Мән сәнәдләрими вердим. Верәндә голларымы буруб мәни машына салдылар, сөјүш сөјдүләр. Мәһәммәд дејир ки, Елвин дә онлара сөјдү. Елвин сөјүш ҝөтүрән дејил, мән факты дејирәм.
«ГОЛЛАРЫМА О ГӘДӘР ВУРДУЛАР КИ, ҺАЛЫМ ӨЗҮМДӘ ОЛМАДЫ»
Роза Рәфијева ҝүман едир ки, полисә ҹаваб гајтармасына ҝөрә Елвин дөјүлүб. Һәмин вахт Елвинлә бирликдә һадисә јериндә олан Анар Гәнијев «Азадлыг» гәзетинә билдириб ки, полис машынында Елвинин башына полис дәјәнәји илә вуранда әлләрини онун башына тутурмуш: «Голларыма о гәдәр вурдулар ки, һалым өзүмдә олмады. Сонра полис бөлмәсиндә мәни ајры јерә, Елвини башга јерә апардылар».
«Мәһәммәди ҝөрдүм, һеч бир шеји јохдур, Анарын голу сыныгдыр, ҝипсдәдир, о бири оғлан да, Мәһәммәдин гардашы, дејирләр ки, кәллә травмасы илә хәстәханада јатыр, оғланын дедијинә ҝөрә, гардашына електрошок еләјибләр, ҝөрүнүр, Елвинә дә електрошок еләјибләр» - дејән Роза Рәфијеванын сөзләринә ҝөрә, полис бөлмәсиндә она оғлунун үч полисә ағыр хәсарәт јетирдији дејилиб:
ДЕДИ ОҒЛУНУЗ ЈҮНҜҮЛВАРИ ЈАРАЛАР АЛЫБ
- Мүстәнтиг ҝәлди мәнә деди ки, ханым, сизин оғлунуз «Неон» ресторанында јејиб-ичән вахты дава-далаш едибләр, үч полиси бычаглајыб, биринин үрәк наһијәсиндән, биринин ағзындан сохуб боғазындан чыхыб. О бириси јүнҝүлдү, амма икисинин вәзијјәти ағырды. Дедим бәс мәним оғлум? Деди ҝедин, Сабунчу хәстәханасына, сизин оғлунуз да јүнҝүлвари јаралар алыб.
Рәфијевләрин хәстәхана маҹәрасы да узун чәкиб, дејирләр ки, ҝаһ «әмәлијјата ҝөтүрәҹәјик», ҝаһ «ҝедин, неоҹәрраһијјәјә көчүрмәк үчүн ордан иҹазә ҝәтирин», ҝаһ да «һәким ҝәлсин», «көмәкчиси ҝәлмәјиб һәлә» кими ҹаваблар ешидибләр, сонра да тибб баҹылары Елвинин сачыны гырхмаг үчүн «лезва» ахтарыблар. Амма сонда ҹәрраһијјә әмәлијјаты олмајыб:
- Һәкими дәһлиздә ҝөрдүм, габағына јүјүрдүм, бир аз да севинҹәк ки, һәким, әмәлијјат гуртарды. Доктор үзүмә бахды, деди ки, әмәлијјат сабаһа сахланыб. Мән нијәсини сорушанда деди ки, галхын јухары, шөбә мүдири сизә изаһ еләсин.
«БАШЫНДА САЛАМАТ ЈЕР ЈОХ ИДИ»
Амма онлара Елвинин мејидини верибләр. Атасы Рза Рәфијев дејир ки, Елвинин експертизаја апарылмасыны истәјибләр вә өзү дә бурда иштирак едиб:
- Башында саламат јер јох иди. Бурнунда «дубинка»нын јери галыб.
Ҝөзүндә јашы гурујан Роза Рәфијева ики ајдан сонра она нишан апармаға һазырлашдығыны сөјләјир:
- Демишди ки, ана кими бәјәнсән, онунла да евләнәҹәм, гызын јохду, сәнә гыз олсун. Бир гызы ҝөзалтыламышдым.
- Гызы она да нишан вермишдизми?
- Еләҹә демишдим ки, јахшы бир гыз вар, ҝедиб бахарсан, ону алаҹам сәнә. Гызын кимлијини үрәјимдә сахламышдым, елә үрәјимдә дә галды. Иншаат мүһәндиси иди, һәр иши бәјәнмирди, дејирди, өзүмә јер-јурд еләјим, евләнәҹәм, арзулары чох иди...
АДИ ХӘСАРӘТЛӘРӘ БӘНЗӘМИР
Ишҝәнҹәләр Әлејһинә Азәрбајҹан Комитәсинин рәһбәри Елчин Беһбудов Елвин Әсҝәровун сон шәкилләрини ҝөрдүјүнү вә буну ади хәсарәтләрә бәнзәтмәдијини дејир. Онун сөзләринә ҝөрә, мәсәләни арашдырмаг үчүн Низами рајон Полис Идарәсинин 24-ҹү полис бөлмәсинин рәһбәрлији илә ҝөрүшәҹәк, лазым ҝәлсә, мүзакирәни дахили ишләр назири Рамил Усубовла апармаға ҹәһд ҝөстәрәҹәк.
Биз дә Низами пајон 24-ҹү полис бөлмәсинин рәһбәрлији илә ҝөрүшмәк истәдик. Ҝүнорта саат 4-ә ишләсә дә, нә рәис, нә дә рәис мүавини јериндә иди. Нөвбәтчи полис деди ки, онлар наһара чыхыблар. Аиләнин Елвин Әсҝәрова ишҝәнҹә верилмәсиндә ҝүнаһландырдығы рәис мүавини Расим Әмировла исә сонрадан телефонла данышдыг.
МӘНИ НАРАҺАТ ЕТМӘЈИН
О билдирди ки, бу мәсәлә илә бағлы ҝүн әрзиндә она чохлу зәнҝләр олуб. «Онлар чох шеј дејә биләр, истинтаг ҝедир, ҝүнаһкар кимдирсә, архајын олун, үзә чыхаҹаг, бир дә бу мәсәләјә ҝөрә мәни нараһат етмәјин» - дејиб телефону гапатды.
Дахили Ишләр Назирлијинин мәтбуат хидмәтинин әмәкдашы Орхан Мансурзадә исә АзадылгРадиосуна билдириб ки, јанварын 13-ү ҝеҹә баш верән давада Елвин Әсҝәров полис әмәкдашларына хәсарәт јетириб, өзү исә гачаркән бу хәсарәтләри алыб:
