Әһли Бејт -АБНА- хәбәр аҝентлијинин вердији хәбәрә әсасән: дүнән Азәрбајҹан Ислам Партијасынын сәдри Мөвсүм Сәмәдов партијанын гәрарҝаһындан чыхыб евә ҝедәркән, онун әјләшдији машын ДЈП әмәкдашлары тәрәфиндән сахланылмыш, даһа сонра исә онлара јахынлашан ҹип маркалы машына отурдулараг Нәриманов рајон Полис Идарәсинә апарылыб. Партија сәдри илә јанашы машында олан сәдр мүавини Вагиф Абдуллајев, сүрүҹү Һүсејн Казымов вә Елчин Һәсәнов адлы бир шәхс дә сахланылыблар. Даһа сонра онлара 10-15 ҝүнлүк һәбс ҹәзасы верилиб.
Мәсәләјә илә бағлы илаһијјатчы алим Мирҹәфәр Әјјубзадәјә мүраҹиәт етдикдә, о да АИП сәдринин һәбс олунмасыны писләди вә өлкә башчысыны Мөвсүм Сәмәдов кими инсанлары һәбс етдирмәкдәнсә, белә инсанлары гыҹыгландыраҹаг ганунлары гәбул едән шәхсијјәтләри ишдән кәнарлашдырылмалы олдуғуну билдирди.
"Илк өнҹә ону билдирмәк истәрдим ки, тарих боју Аллаһ, онун пејғәмбәри вә Исам дининә гаршы апарылан истәнилән мүбаризә, гаршы тәрәфин һәм дүнјәви, һәм дә мәнәви мәғлубијјәти илә нәтиҹәләниб. Сијасәтчиләр бу барәдә фикирләшмәли вә буна ҝөрә аддым атмалыдырлар. Бу да нәзәрә алынмалыдыр ки, сиркә нә гәдәр түнд олса, өз габыны сындырыр. Гаршы тәрәф фикирләшмәлидир ки, милләтин ағзыны зорла, ҝүҹ структурлары илә јох, әдаләтлә, дүзҝүн сијасәтлә јуммаг лазымдыр"-дејә Мирҹәфәр Әјјубзадә әлавә едиб.О, һәмчинин билдириб ки: "Бу сәбәдән һиҹаб мәсәләсинә ҝөрә, АИП сәдри Мөвсүм Сәмәдовун чыхышындан сонра, онун башына ҝәләнләр бизим үчүн анлашылан дејил. Һәр һалда һиҹабы гадаған етмәјин Ислам дининә гаршы дүшмәнчиликдән башга һеч бир сәбәби јохдур. Буну көрпәсиндән тутмуш, јашлысына кими һамы билир. Ҝөрүнүр бу сәбәдәндир ки, Ислам дининин өлкәмиздә ҝүнү-ҝүндән инкишаф етмәси, динимизә вә диндарлара гаршы тәдбирләрин ҝөрүлмәсинә вә маскаларын ҹырылмасына сәбәб олур".
Сөзүҝедән мәсәлә илә бағлы ФактХебер.ҹом-а ачыглама верән илаһијјатчы алим Зүлфүгар Микајылов билдирди ки, дүнјада ҝедән просесләр, Ислам әлејһинә апарылан тәблиғатлар, Пејғәмбәримизә, Гурана олан һәгарәтләр Азәрбајҹанда да бој ҝөстәрир: “Сон ҝүнләр Азәрбајҹанда да баш верән һадисәләрә нәзәр салдыгда, бунун Гәрб вә сионизм мәһсулу олдуғу ачыг-ајдын сезилир вә биз буну белә дәјәрләндиририк. Азәрбајҹанда мәсҹидләрә һүҹум едәнләр, һиҹаба гадаға гојанлар сионистләрин бирбаша әмри илә һәрәкәт едирләр. Мөвсүм Сәмәдовун да сахланылмасы шүбһәсиз ки, бу әмәлләрин тәркиб һиссәсидир. Мән дејә биләрәм ки, һеч кәс Мөвсүм Сәмәдову тәк ҝөрмәмәлидир, онун архасында диндарлар дуруб вә биз бу барәдә тәдбирләр ҝөрәҹәјик.”
Һадисә илә бағлы ачыглама верән башга бир илаһијјатчы алим Илһам Әлијев исә белә сөјләди: “Бу мәсәлә чох ҹидди бир мәсәләдир. Һесаб едирәм ки, Азәрбајҹан вәтәнпәрвәрләри, диндарлары мәсәләјә биҝанә јанашмамалыдыр. Һамы бу мәсәләјә јекдил шәкилдә өз мүнасибәтини билдирмәлидир. Артыг бәзиләри һадисәни Азәрбајҹан президенти Илһам Әлијевин кәскин тәнгидинә ҝөрә баш вердијини билдириләр. Бу исә һадисәни өз мәҹрасындан јајындырмагдыр. Амма јаддан чыхармаг олмаз ки, мәсәлә һиҹаб үстүндә башлајыб. Бурада әсл һәдәф намус, гејрәт мүдафиәсидир. Мөвсүм Сәмәдовун да тәнгиди фикирләри мәһз бу јөндә олуб. Она ҝөрә дә сөјләнилмиш фикирләр конкрет һәдәфә јөнәлдилмәмәлидир. Бурада мәгсәд үмумиликдә Азәрбајҹанда Ислама гаршы олан аддымларын тәнгидидир.”
Диггәт: Хәбәрдән истифадә етдикдә мәнбәјә истинад лазымдыр.
