Әһли Бејт -АБНА- хәбәр аҝентлијинин вердији хәбәрә әсасән: Азәрбајҹан Дахили Ишләр Назирлији Ислам Партијасынын сәдри Мөвсүм Сәмәдовун һәбси илә бағлы ачыглама јајыб. Назирлијин мәтбуат хидмәтиндән верилән мәлумата ҝөрә, Азәрбајҹан Ислам Партијасынын сәдри Мөвсүм Мәрдан оғлу Сәмәдовун Губа рајонунда јашајан әмиси оғлу Дәјанәт Сәмәдова иғтишашлар төрәтмәк, иҹтимаи тәһлүкәсизлији позмаг, инсанлары ҹиһада тәһрик етмәк барәдә тапшырыглар вермәси илә бағлы ДИН-ә дахил олмуш мәлуматлар әсасында ҹари ил јанварын 8-дә Баш Мүтәшәккил Ҹинајәткарлыгла Мүбаризә Идарәси тәрәфиндән әмәлијјат-ахтарыш тәдбирләри кечирилиб.
Дәјанәт Сәмәдовун ишләдији, Мәрдан Сәмәдова мәхсус електрик маллары мағазасына бахыш заманы орадакы сејфин алтындан 3 әдәд әл гумбарасы, һабелә јашадығы евдән 7 әдәд автомат патрону вә ичәрисиндә дини радикализми тәблиғ едән мәлуматларын олдуғу електрон дашыјыҹылар ашкарланараг ҝөтүрүлүб. Дәјанәт вә Мәрдан Сәмәдовлар шүбһәли шәхс гисминдә сахланылыблар. Фактла бағлы Азәрбајҹан Ҹинајәт Мәҹәлләсинин мүвафиг маддәләри илә ҹинајәт иши башланылыб, арашдырмалар апарылыр.
***
Бакы шәһәр Баш Полис Идарәси Азәрбајҹан Ислам Партијасынын фәалларынын сахланмасына ајдынлыг ҝәтириб
Бакы шәһәр Баш Полис Идарәси (БШБПИ) рәсми дөвләт гејдијјаты олмајан Азәрбајҹан Ислам Партијасынын (АИП) фәалларынын сахланмасы илә бағлы мәлумат јајыб.
БШБПИ-нин мәтбуат хидмәтиндән верилән мәлумата ҝөрә, АИП сәдри Мөвсүм Сәмәдов тәрәфиндән террор аксијасы һазырланмасы барәдә БШБПИ-јә дахил олмуш мәлумат әсасында јанварын 7-дә һәјата кечирилән әмәлијјат тәдбирләри илә сонунҹу Нәриманов рајону әразисиндә автомобиллә һәрәкәт едәркән сахланылыб. Бу заман М.Сәмәдов вә автомобилдә олан сәрнишинләр полис әмәкдашларынын гануни тәләбләринә табе олмајараг мүгавимәт ҝөстәрибләр.
Сахланылараг Нәриманов рајон Полис Идарәсинә ҝәтирилән Мөвсүм Сәмәдов, онунла бирликдә олан Вагиф Абдуллајев, Елчин Һәсәнов вә Һүсејн Казымов барәсиндә рајон мәһкәмәси тәрәфиндән инзибати һәбс-тәнбеһ тәдбири тәтбиг едилиб.
Һазырда Мөвсүм Сәмәдовун һакимијјәт органлары тәрәфиндән гәрар гәбул едилмәсинә тәсир ҝөстәрмәк мәгсәдилә республикада иҹтимаи асајишин позулмасына јөнәлмиш террорчулуға һазырлыг вә белә һәрәкәтләрин төрәдиләҹәји илә һәдәләмәси фактынын арашдырылмасы үзрә зәрури әмәлијјат тәдбирләри апарылыр.
Диггәт: Хәбәрдән истифадә етдикдә мәнбәјә истинад лазымдыр.
