Әһли Бејт -АБНА- хәбәр аҝентлијинин вердији хәбәрә әсасән: “Иран парламентиндә истәр Дағлыг Гарабағ мәсәләсини вә истәрсә дә Хоҹалы гырғыныны дәфәләрлә мүзакирә етмишик. Амма бу рәсми шәкилдә дејил, гејри-рәсми олуб”.
Бу сөзләри Тәбриз шәһәриндән олан депутат, доктор Мәһәммәд Һүсејн Фәрһәнҝи дејиб: “Гарабағ бизим јаралы јеримиздир. Орада шәһид оланлары биз өз шәһидимиз кими, јаралылары да јаралыларымыз кими гәбул едирик. Иран Гарабағ мәсәләсинин һәллиндә чох мараглыдыр. Үмид едирик ки, бу мәсәлә өз һәллини тапаҹаг. Ермәнистанын өзүнүн фикир билдирмәк гүдрәти олсајды, бу мәсәлә асанлыгла өз һәллини тапарды. Тәбии ки, мәсәләнин ики өлкәнин парламентләрарасы достлуг групунун васитәси илә рәсми мүзакирәјә чыхарылмасы вә еләҹә дә бу барәдә Иран вә гејри өлкәләрин милләт вәкилләринә долғун мәлумат верилмәси бу групун әсас иши олмалыдыр. Һисс едирәм ки, бу саһәдә сүстлүк вар, бу мәсәләјә тәкан вермәк лазымдыр”.
Парсабаддан олан депутат Вәкил Сепәһ исә Дағлыг Гарабағ мүнагишәсинә мүнасибәтини белә ачыглајыб: “Тәкҹә Хоҹалы гырғыныны мүзакирәјә чыхармагла мәсәлә һәлл олунмаз. Хоҹалы гырғыны Гарабағ бөлҝәсиндә олан гырғынларын биридир. Минск Групу Гарабағ мүнагишәсинин һәлли үчүн узун илләрдир чалышыр. Әлбәттә бу бизим үчүн ајдын дејил. Кәнар өлкәләр бу мәсәләнин һәллиндә мараглы дејилләр. Мәсәләнин һәлли јалныз реҝион өлкәләринин васитәси илә ола биләр. Иран һәм Азәрбајҹана, һәм дә Ермәнистана Гарабағ мәсәләсинин һәллиндә васитәчи олмағы тәклиф едиб. Азәрбајҹан дөвләти бу тәклифи гәбул едиб. Бурадан мәлум олур ки, гардаш Азәрбајҹан мәсәләнин һәлли үчүн бүтүн имканлардан истифадә едир вә етмәјә һазырдыр. Амма тәәссүф олсун ки, Ермәнистан бу тәклифи гәбул етмәјиб”.
Депутат билдириб ки, мүнагишә тәрәфләри разылыг верәҹәји тәгдирдә Иран мүнагишәнин низамланмасында васитәчилик едә биләр: “Биз бунун да һарадан гајнагландығыны билирик. Ермәнистаны өзләриндән асылы вәзијјәтдә сахлајан дөвләтләр буна разылыг вермирләр. Ермәнистаны табечилијиндә сахлајан Русија, АБШ вә Минск Групу она бу иҹазәни вермирләр. Мәнҹә Ермәнистан өз сөзүнү демир. Онлар горхурлар ки, Иран Гарабағ проблеминин һәллиндә јахындан иштирак едәр вә онун ады јахшы мәнада һалланар. Дағлыг Гарабағын Азәрбајҹанын тарихи торпаглары олдуғу ајдын мәсәләдир. Иран Дағлыг Гарабағ мүнагишәсинин һәлли истигамәтиндә өз сәјини ҝөстәрәҹәк”.
Диггәт: Хәбәрдән истифадә етдикдә мәнбәјә истинад лазымдыр
