Әһли Бејт -АБНА- хәбәр аҝентлијинин вердији хәбәрә әсасән: Азәрбајҹан Милли Мәҹлисинин (ММ) сәдр мүавини Баһар Мурадова журналистләрә ачыгламасында дејиб: “Азәрбајҹанын һаглы тәләби јеринә јетирилмәјәнә, Ермәнистан тәрәфиндән ишғал олунан әразиләр азад едилмәјәнә гәдәр нәинки АТӘТ-ин, һәмчинин диҝәр бејнәлхалг тәшкилатларын да нүфузу Азәрбајҹанда ашағы сәвијјәдә олаҹаг”.
Б. Мурадова билдириб ки, мүнагишәнин һәллинә тәсир ҝөстәрәҹәк бүтүн амилләрдән истифадә олунур: “АТӘТ дә бу истигамәтдә чевик сәјләр ҝөстәрир, амма ортада конкрет нәтиҹә јохдур. Ермәнистанда АТӘТ-ин нүфузунун јүксәк олмасына ҝәлинҹә, бу тәбиидир. Чүнки АТӘТ мүнагишәнин һәлли илә бағлы ишғалчы дөвләтин конструктив мөвгејә ҝәлмәси үчүн һеч бир тәсир ҝөстәрмир. Бунунла да Азәрбајҹанын әразиләри ишғал алтында галмагда давам едир”.
ММ-ин сәдр мүавини гејд едиб ки, бејнәлхалг тәшкилатлар өз нүфузларынын гајғысына галмаг истәјирләрсә, бу кими конфликтләрин һәллиндә үзәриләринә дүшән иши һәјата кечирмәлидирләр: “АТӘТ-ин Минск Групунун чох бөјүк имканлары вар ки, Ермәнистана тәсир ҝөстәрсин. Амма ҝөрүнүр ки, ҹидди тәсир ҝөстәрмәмәк истәји онларын марағындадыр. АТӘТ дә дахил олмагла диҝәр бејнәлхалг тәшкилатлар сәјләрини бирләшдирсәләр, Ермәнистан конструктив мөвгејә ҝәләр. Әкс тәгдирдә Азәрбајҹанын мүһарибәјә үстүнлүк верилмәси истисна едилмир”.
Диггәт: Хәбәрдән истифадә етдикдә мәнбәјә истинад лазымдыр
