ГМИ-нин мәтбуат хидмәтиндән мәлумат верилиб. Фәтвада Гафгаз Мүсәлманлары Идарәсинин Газылар Шурасы нәзәринизә чатдырыр ки, јени 1432-ҹи илин башланғыҹы – Мәһәррәм ајынын 1-и Милади тәгвими илә 2010-ҹу ил декабр ајынын 7-нә тәсадүф едир.
“Мәһәррәм ајы һиҹри-гәмәри илинин ајлары арасында мүгәддәс, мөһтәрәм ајлардан биридир. Бу ај мүгәддәс Ислам динимиздә дөјүшләрин гадаған едилдији ај олмагла јанашы, һәм дә Ашура - Мәһәррәм ајынын 10-ҹу ҝүнү-Имам Һүсејн әлејһиссәлам вә Әһли-Бејт тәрәфдарларынын шәһадәтә јетирилдији ај кими дахил олуб. Мүсәлман үммәтинин тарихинә ән аҹы, лакин, ејни заманда инсанлара гејрәт, гүрур бәхш едән бир һадисә кими дахил олмуш Кәрбәла фаҹиәсинин нәсилләрин јаддашында јашамасы, Имам Һүсејн әлејһиссәламын һәјат вә мүбаризәсинин јад едилмәси олдугҹа бөјүк әһәмијјәт кәсб едир”, - дејә фәтвада билдирилир.
Фәтвада Ашура ҝүнүнүн 2010-ҹу ил декабр ајынын 16-на тәсадүф етдији гејд олунуб.
“Кәрбәла шәһидләринин хатирәсинин јад едилдији тәзијә ҝүнләри мүнасибәтилә бүтүн диндарлара дәрин һүзнлә башсағлығы верир, онлара Аллаһ-Тәаладан сәбр, мәғфирәт диләјир вә Имам Һүсејн әлејһиссәламын әзадарлығынын Имамын шәнинә лајиг шәкилдә кечирилмәсини төвсијә едирик. Ашура мәрасимләри мәсҹидләрдә, ибадәт оҹагларында иҹтимаи асајиш гајдаларына риајәт олунмагла кечирилмәли, тәзијә мәҹлисләриндә Кәрбәла шәһидләринин шәнинә хүтбәләр охунмалыдыр. Мүгәддәс мәканларда низам-интизам ҝөзләнилмәли, гуршағадәк сојунараг зәнҹир вә ја башга аләтләрлә бәдәнә хәсарәт јетирмәклә ган чыхармаг кими Исламда бәјәнилмәјән һәрәкәтләрә јол верилмәмәлидир. Сон илләр тәзијә ҝүнләриндә Гафгаз Мүсәлманлары Идарәсинин тәшәббүсү илә ҝерчәкләшән, халгымыз тәрәфиндән тәгдир едилән вә Имам Һүсејн әлејһиссәлам наминә тибби еһтијаҹлар үчүн ган верилмәси аксијаларынын тәшкили ән мүнасиб әзадарлыг нүмунәсидир. Бу тәҹрүбә өрнәк олараг мүсәлманлар арасында јајылмалыдыр. Үмидварыг ки, иншааллаһ, диндарларымыз бу ил дә Имам Һүсејн тәзијәдарлығы илә Исламын шәһидлик фәлсәфәсинин маһијјәтинә даһа дәриндән јијәләнәҹәкләр. Бу һикмәти дәрк едән вә Азәрбајҹанын мүстәгиллији уғрунда шәһид олмуш Вәтән оғулларынын хатирәсини әзиз тутан халгымыз сых бирләшәрәк торпагларымызын бүтөвлүјүнү, Вәтәнимизин давамлы тәрәггисини, мүгәддәс дини-мәнәви дәјәрләрин тәнтәнәсини тәмин етмәк јолунда даһа артыг әзмкарлыг нүмајиш етдирәҹәкдир, иншааллаһ”, – дејә фәтвада билдирилир.
Диггәт: Хәбәрдән истифадә етдикдә мәнбәјә истинад лазымдыр.
