Әһли Бејт -АБНА- хәбәр аҝентлијинин вердији хәбәрә әсасән: Хариҹи Ишләр Назирлијинин (ХИН) мәтбуат хидмәтиндән верилән мәлуматда билдирилир ки, бу ачыглама Азәрбајҹанда тәәҹҹүб вә тәәссүф һисси илә гаршыланыб. Белә ки, бу вә ја диҝәр өлкәдә кечирилән сечкиләрә гијмәт верәркән Дөвләт Департаментинин ачыгламасы бир гајда олараг һәмин сечкиләрә нүфузлу бејнәлхалг тәшкилатлар тәрәфиндән верилән гијмәтләрдән көклү сурәтдә фәргләнмир: “Дөвләт Департаменти бәјан едир ки, Азәрбајҹанда нојабрын 7-дә кечирилән “Парламент сечкиләри бејнәлхалг стандартлара ујғун кечирилмәјиб”. Һәмин ачыгламада АТӘТ-ин Инсан Һүгуглары вә Демократик Тәсисатлар Бүросунун, Авропа Шурасынын Парламент Ассамблејасынын, АТӘТ-ин Парламент Ассамблејасынын, Авропа Парламентинин Сечкиләри Мүшаһидә Миссијаларынын ҝәлдикләри нәтиҹәјә истинад олунур. Лакин истинад олунан сәнәддә Дөвләт Департаментинин вердији нәтиҹәјә охшар гијмәтләндирмә јохдур”.
ХИН-ин ачыгламасында о да гејд олунуб ки, бејнәлхалг тәшкилатларын јајдығы сәнәддә бәзи нөгсанларла бәрабәр вурғуланыб ки, сечкиләр динҹ вә дебат шәраитиндә кечирилиб, бүтүн мүхалифәт партијаларынын иштиракы илә сәҹијјәләниб вә мүшаһидә миссијалары мәнтәгәләрин 90 фаизиндә сәсвермә просесини мүсбәт гијмәтләндирибләр. Бу да ону ҝөстәрир ки, сечкиләр бүтөвлүкдә әһалинин етимадыны газаныб: “Бунунла јанашы, Азәрбајҹан һөкумәти гејд етмәји өзүнә борҹ билир ки, демократик, әдаләтли вә шәффаф сечкиләрин кечирилмәси дөвләтин әсас һәдәфидир вә бу истигамәтдә ҝөрүлмүш позитив ишләри тәгдир етмәклә бәрабәр, сечки просесиндә мүшаһидә олунан бәзи нөгсанлары Мәркәзи Сечки Комиссијасы вә мүвафиг дөвләт гурумлары ҹидди арашдырараг лазыми өлчү ҝөтүрәҹәк”.
Диггәт: Хәбәрдән истифадә етдикдә мәнбәјә истинад лазымдыр
