Әһли Бејт -АБНА- хәбәр аҝентлијинин вердији хәбәрә әсасән: Азәрбајҹанын Дөвләт Комиссијасынын рәсми интернет сәһифәсинә истинадән јајдығы мәлумата ҝөрә, Азәрбајҹан Республикасынын, Ермәнистан Республикасынын вә Русија Федерасијасы Президентләринин Дағлыг Гарабағ мүнагишәсинин тәнзимләнмәсинә даир 27 октјабр 2010-ҹу ил тарихли бирҝә бәјанатына ујғун олараг, ејни заманда, Әсир вә иткин дүшмүш, ҝиров ҝөтүрүлмүш вәтәндашларла әлагәдар Дөвләт Комиссијасынын бејнәлхалг тәшкилатларла апардығы мүнтәзәм вә сәмәрәли данышыгларын нәтиҹәсиндә, Азәрбајҹан Республикасынын Тәртәр рајону истигамәтиндә Ермәнистан һәрбчиләринин һүҹумуну дәф едәркән 18 ијун 2010-ҹу ил вә 4 сентјабр 2010-ҹу ил тарихдә шәһид олмуш Азәрбајҹан һәрбчиләри - Ибраһимов Мүбариз Ағакәрим оғлу вә Әһмәдов Фәрид Ҝүлоғлан оғлунун мејитләри 6 нојабр 2010-ҹу ил тарихдә гаршы тәрәфдән алыныб. Һәмин ҝүн һәмчинин, 18 ијун 2010-ҹу ил тарихдә Тәртәр чајындан тапылмыш ермәни мејити гаршы тәрәфә гајтарылыб.
Идентификасија просесиндә мејитин Ағдәрә рајону, Магадис кәнд сакини, 1924-ҹү ил тәвәллүдлү Арустамјан Гавруша Хачатуровичә аид олдуғу мүәјјәнләшдирилиб. Инсидентсиз баша чатан просес Әсир вә иткин дүшмүш, ҝиров ҝөтүрүлмүш вәтәндашларла әлагәдар Дөвләт Комиссијасы вә Мүдафиә Назирлији әмәкдашларынын иштиракы, Бејнәлхалг Гызыл Хач Комитәсинин васитәчилији илә һәјата кечирилиб.
Диггәт: Хәбәрдән истифадә етдикдә мәнбәјә истинад лазымдыр
