Әһли Бејт -АБНА- хәбәр аҝентлијинин вердији хәбәрә әсасән: Иран Ислам Республикасынын Јол вә Нәглијјат назир Һәмид Беһбәһани билдириб ки, Иранын перспектив инкишаф програмына әсасән, 2025-ҹи илдә өлкәнин бүтүн мәркәзи әјаләтләриндә дәмир јолу олмалыдыр: "Бу иши ҝөрмәк үчүн бизим 15 ил вахтымыз вар. Бу мүддәт әрзиндә 16 мин километр дәмир јолу хәтти чәкилмәлидир. 30 ил өнҹә Иранда ҹәми 4 мин километр дәмир јолу хәтти мөвҹуд иди. Ислам ингилабындан индијәдәк 5 мин километр әлавә дәмир јолу хәтти чәкмишик. Гаршыдакы 15 ил әрзиндә 1,5 дәфә артыг дәмир јолу хәтти чәкмәлијик. Бу иши ҝөрмәк үчүн кифајәт гәдәр пешәкар мүһәндис кадрларымыз вар. Бүдҹә мәсәләсинә ҝәлинҹә, өлкәнин али рәһбәри вә президент вәсаит ајырмаға сөз верибләр".
Һәмид Беһбәһани гејд едиб ки, Шимал-Ҹәнуб дәһлизи үчүн ҹәми бирҹә һалга чатышмыр: "Бәндәр Аббасдан Теһрана вә Гәзвинә гәдәр дәмир јолу хәттимиз вар. Гәзвиндән Рәштә гәдәр ишләр давам едир, индијәдәк ишләрин 40 фаизи ҝөрүлүб вә биз чалышырыг ки, ишләри тезләшдирәк. Иран Астарасындан Рәшт истигамәтиндә индијә гәдәр 10 километр дәмир јолу хәтти чәкилиб вә орда да ишләр давам едир”.
Назир Иран Астарасындан Азәрбајҹан Астарасына да дәмир јолу хәтти чәкилдијини хатырладыб: “Чалышаҹағыг ки, илин сонуна кими (ред. Иранда ил мартын 21-дә тәһвил олур) ики өлкәнин дәмир јолу хәтләрини бирләшдирәк. Орда ҹәми 8 километр дәмир јолу хәтти чәкилмәлидир. Шимал-Ҹәнуб дәһлизинин реаллашдырылмасы Азәрбајҹан үчүн Фарс көрфәзинә, Иран үчүн исә Авропа өлкәләринә вә Русијаја чыхыш имканы јарадаҹаг. Ирандан бу өлкәләрә јүкдашыманын һәјата кечирилмәси Азәрбајҹаны ҝәләҹәкдә транзит мәркәзинә чевирәҹәк".
Диггәт: Хәбәрдән истифадә етдикдә мәнбәјә истинад лазымдыр
