Әһл Бејт-АБНА-хәбәр аҝентлијинә верилән хәбәрә әсасән Ҝүрҹүстана сәфәри чәрчивәсиндә ијулун 14-дә сепаратчы режимин нәзарәт етдији Абхазијаја ҝедән Авропа Бирлијинин Ҹәнуби Гафгаз үзрә хүсуси нүмајәндәси Питер Семнеби бу режимин рәһбәрлијинә Ҝүрҹүстанын јени стратеҝијасы илә бағлы бир нечә лајиһәнин һәјата кечирилмәсини тәклиф едиб. П. Семнеби Абхазијада нәглијјат коммуникасијасынын инкишафы, тәләбә мүбадиләси илә бағлы тәклифләр ирәли сүрүб. Сепаратчы республиканын баш назири Сергеј Шамба тәләбә мүбадиләсини мәгбул гијмәтләндириб вә бизнес әлагәләринин инкишафыны мүсбәт сајыб. Ҝүрҹүстан тәрәфинин игтисади әлагәләрин инкишаф етдирилмәси тәклифинә мүнасибәт билдирән С. Шамба дејиб ки, мүхтәлиф игтисади лајиһәләр һәјата кечирмәклә Абхазијаны Ҝүрҹүстана бирләшдирмәк ҹәһди уғурсуз алынаҹаг: “Биз Ҝүрҹүстанла һеч бир мүнасибәт гура билмәрик”.
Хатырладаг ки, Ҝүрҹүстан Тәһлүкәсизлик Шурасы бағлы гапылар архасында ишғал олунан әразиләр барәдә һөкумәт стратеҝијасыны мүзакирә едиб. Бу стратеҝијаны һәм мүхалифәт, һәм дә бејнәлхалг тәшкилатлар дәстәкләјиб. Тәһлүкәсизлик Шурасынын иҹласында 7 бәнддән ибарәт конкрет тәдбирләр планы тәсдигләниб. Ҝүрҹүстан тәрәфи Сухуми, Схинвали вә Тифлисдә гаршылыглы офис јаратмағы тәклиф едиб. Һөкумәт абхазлар вә осетинләрә Ҝүрҹүстанын али мәктәбләринә дахил олмаг, сәһијјә системиндән истифадә етмәк, хариҹә ҝетмәк вә бизнес гурмаг үчүн хүсуси мүвәггәти сәнәд вериләҹәјини билдириб. Сәнәддә кәнд тәсәррүфатынын инкишафы, сәрмајә вә банк әмәлијјатлары мәсәләләри дә өз әксини тапыб.
