Әһл Бејт-АБНА-хәбәр аҝентлијинә верилән хәбәрә әсасән пиратлар Иранын јүк ҝәмисинә басгын едиб; һүҹуму дәф етмәк үчүн һәрби вертолјотлар һаваја галдырылыб
Хәзәр дәнизиндә бир ҝүн әввәл мисли ҝөрүнмәмиш һадисә баш вериб. Русија мәтбуатынын јајдығы хәбәрләрә ҝөрә, дәниз гулдурлары Ирана аид јүк ҝәмисинә басгын едибләр. Русија һәрби базасынын мүдахиләсиндән сонра һүҹуму дәф етмәк мүмкүн олуб. Билдирилир ки, инсидент Иранын Әнзәли лиманындан јола чыхан вә Газахыстанын Актау лиманына доғру үзән “Самана” адлы гуру јүк ҝәмисиндә баш вериб.
Ҝәмијә гәфилдән дөрд моторлу гајыгда силаһлы шәхсләр јахынлашыблар вә тәләб олунуб ки, ҝөјәртәјә галхмаг үчүн јүк ҝәмиси дрејф һәјата кечирсин. “Самана” ҝәмисинин капитаны бу тәләби јеринә јетирмәјиб вә радиостансија илә Һәштәрханда јерләшән хиласетмә-координасија мәркәзинә мәлумат вериб. Һәмчинин саһилбоју өлкәләрин ҝүҹ структурлары, јахынлыгда үзән ҝәминин капитанлары вә ән јахын лиманларын рәһбәрлији дә һүҹум барәдә мәлуматландырылыб.
Мәсәләјә Русијанын Дағыстанда јерләшән сәрһәд базасы мүдахилә едиб вә инсидент зонасына һәрби вертолјотлар ҝөндәрилиб. Вертолјотлар пиратлары ашкар едәрәк онлара һавадан атәш ачыблар. Һүҹум дәф олунуб, дәниз гулдурлары арасында өлән вә јаралананларын олдуғу барәдә мәлумат јохдур. Ҝәми һејәти исә хәсарәт алмајыб. Һүҹум дәф едилдикдән сонра ҝәми Русија һәрби ҝәмисинин мүшајиәти илә Актауја доғру јолуна давам едиб.
Русија мәтбуаты гејд едир ки, дәниз гулдурлуғу Хәзәр дәнизиндә мүшаһидә едилмәмиш һалдыр. Дәниз гулдурлары адәтән Ҹәнуб-Шәрги Асија саһилләриндә вә Африканын шимал-шәрг саһилләриндә фәалијјәт ҝөстәрирләр. Африка саһилләриндә дәниз гулдурлуғу сон илләр бејнәлхалг мигјасда ҹидди проблемә чеврилиб. Сомали дәниз гулдурлары Әдән көрфәзиндә тез-тез ири тиҹарәт ҝәмиләринә басгын едир вә онлары һејәт үзвләри илә бирликдә ҝиров ҝөтүрүрләр. Ҝәминин вә һејәт үзвләринин азад едилмәси үчүн бир гајда олараг милјонларла доллар пул алыныр. Дүнјанын бир чох өлкәләри, о ҹүмләдән Русија, АБШ, Түркијә дәниз гулдурларындан јүк ҝәмиләрини мүһафизә етмәк үчүн Әдән көрфәзинә һәрби ҝәмиләр ҝөндәрибләр. Буна бахмајараг пиратлар ат ојнатмагда давам едир. Һазырда онларын әлиндә онларла ҝәми вә мүхтәлиф өлкәләрдән олан һејәт үзвләри вар.
Ф.МӘММӘДОВ
