Әһл Бејт – АБНА – хәбәр аҝентлији хәбәр верир Түркијәнин хариҹи ишләр назири Әһмәд Давудоғлу Инҝилтәрәнин «Финанҹиал Тимес» гәзетинә вердији мүсаһибәсиндә Түркијәнин Гәрбдән узаглашмасы илә бағлы нараһатлыгларын доғру олмадығыны вә бу јанашманы «ахмаглыг» һесаб етдијини билдириб. О, Анкаранын тәмәл стратежи һәдәфинин Авропа Бирлијинә гатылмаг олдуғуну сөјләјиб. Назир Түркијәнин АБ-јә үзвлүјү просесинин ләнҝимәси илә бағлы олараг кимсәнин Түркијәни ҝүнаһландыра билмәјәҹәјини дилә ҝәтириб. Әһмәд Давудоғлунун мүсаһибәдә вурғуладығы башга бир мәсәлә «Мави Мәрмәрә» ҝәмисинә тәшкил едилән һүҹумла бағлы олуб: «Исраиллә әлагәләрин позулмасыны Түркијәнин мөвге дәјишиклији шәклиндә бир суал чәрчивәсиндә ҝөрмәк лазым дејил. Биз Исраиллә бөһраны дәринләшдирмәјә чалышмырыг, бејнәлхалг суларда доггуз түркүн өлүмүнә ҝәтириб чыхаран бир һүҹумун һесабынын верилмәсини истәјирик. Исраил ҝәми басгыны илә әлагәдар олараг бејнәлхалг вә мүстәгил бир истинтагы гәбул етмәјинҹә мүнасибәтләр дүзәлмәјәҹәк. Ејни адам ејни анда һәм мүттәһим, һәм дә прокурор вә һаким ола билмәз».
Ә.Давудоғлу Түркијә-Исраил әлагәләринин чох критик бир мәрһәләдә олдуғуну, гаршыдакы һәфтәләрдә вә ајларда јашанаҹагларын Исраилин давранышындан асылы олдуғуну, Исраиллә әлагәләрин нормаллашмајаҹағыны, әлагәләрин Түркијә тәрәфиндән гәти олараг тамамилә нәзәрдән кечириләҹәјини бәјан едиб. Назир кечән һәфтә Брүсселдә Исраилин тиҹарәт назири Бинјамин Бен-Елјезерлә апардығы мүзакирәләри дә ҝизли сахланаҹағы ҝүман едилдији һалда дәрһал мәтбуата сыздырылдығы үчүн «гачырылмыш бир фүрсәт» олараг шәрһ едиб. Түркијәнин Гәрбин дәјәрләрини истифадә едәрәк әтрафына сабитлик ҝәтирмәји һәдәф олараг сечдијини сөјләјән Әһмәд Давудоғлу хүсусилә Јахын Шәргдә јени проблемләрин ортаја чыхмасы рискинин артдығы бир дөврдә Түркијәнин хариҹи сијасәтинин бир газанҹ олараг ҝөрүлмәсинин ҝәрәклилијини вурғулајыб: «Тәәссүф ки, гаршыдакы ајларла бөлҝәмизлә әлагәдар олараг нараһатам. Иранла әлагәдар олараг етибарлы бир дипломатик просес јохдур, Әрәб-Исраил проблеми галмагдадыр, Ливанын сијасәти көврәк гурулуша маликдир вә Ирагда јени бир һөкумәт чатышмазлығы вар. Бүтүн бунлар чох һәссас мөвзулардыр. Инди һамымыз бирликдә мәсулијјәтли шәкилдә һәрәкәт етмәлијик».
Шаһин
