18 noyabr 2026 - 20:36
Јәмән ордусу өлкә әразисинин 7 100 квадраткилометрдән чох һиссәсини азад едәрәк тәһлүкәсизлијини тәмин едиб

Јәмән Силаһлы Гүввәләринин сөзчүсү Тәиз вә Ләһиҹ әјаләтләриндә һәјата кечирилән әмәлијјат барәдә мәлумат вериб. О билдириб ки, “Аллаһ онлары һәр тәрәфдән әһатә етмишдир” әмәлијјаты заманы Тәиз вә Ләһиҹ әјаләтләриндә үмуми саһәси 7 100 квадраткилометрдән чох олан 10 бөлҝәнин тәһлүкәсизлији тәмин едилиб, Сәудијјә Әрәбистанынын дәстәкләдији гүввәләрә мәхсус 12 һәрби дивизија исә мәһв едилиб.

Әһли Бејт (әлејһимус сәлам) Бејнәлхалг Хәбәр Аҝентлији – АБНА: Јәмән Силаһлы Гүввәләринин сөзчүсү Јәһја Сәри бәјанатында билдириб ки, Јәмәнә гаршы Сәудијјә Әрәбистанынын давам едән һүҹумларына вә тәтбиг етдији мүһасирәјә ҹаваб олараг “Аллаһ онлары һәр тәрәфдән әһатә етмишдир” (Буруҹ сурәси, ајә 20) адлы әмәлијјат кечирилиб.

О, Сәудијјә Әрәбистаныны һава һүҹумларыны интенсивләшдирмәкдә, мүһасирәни даһа да сәртләшдирмәкдә, онларла гәтлиам төрәтмәкдә, еләҹә дә Јәмән халгына вә Силаһлы Гүввәләринә һүҹум етмәк үчүн он минләрлә һәрбчи ҝөндәрмәкдә иттиһам едиб. Билдириб ки, һәмин гүввәләр мүхтәлиф нөв силаһлар вә һавадан дәстәклә тәмин олунуб.

Јәһја Сәри, һәмчинин Сәудијјә Әрәбистанынын дәстәкләдији гүввәләрин тәркибиндәки 60 һәрби бригададан ибарәт 12 һәрби дивизијанын мәһв едилдијини вә ҝери чәкилмәјә мәҹбур олдугларыны билдириб. Онун сөзләринә ҝөрә, бу гүввәләр Мәһәммәд Тәлал әл-Бәләви адлы Сәудијјә забитинин нәзарәти алтында фәалијјәт ҝөстәриб.

Јәмән Силаһлы Гүввәләринин сөзчүсү “Аллаһ онлары һәр тәрәфдән әһатә етмишдир” әмәлијјатынын нәтиҹәләрини ачыглајараг билдириб ки, әмәлијјат заманы Тәиз вә Ләһиҹ әјаләтләриндә үмуми саһәси 7 100 квадраткилометрдән чох олан 10 бөлҝәнин тәһлүкәсизлији тәмин едилиб.

Sizin rəyiniz

You are replying to: .
captcha