Әһли-Бејт (әлејһимус сәлам) – Бејнәлхалг Хәбәр Аҝентлији- АБНА: Иран Ислам Республикасынын Хариҹи ишләр назири ИРНА-нын суалына ҹавабында Иран вә АБШ арасында диалогун мөвзусунун јалныз нүвә мәсәләси олдуғуну билдирәрәк деди: Буҝүнкү иҹласда вурғуладыг ки, нүвә данышыглары вә әсас мәсәләләрин һәлли сакит мүһитдә, ҝәрҝинликсиз вә тәһдидсиз апарылмалыдыр. Истәнилән диалогун зәрури шәрти тәһдид вә тәзјигдән имтинадыр. Биз бу мәсәләни бу ҝүн дә ачыг шәкилдә ифадә етдик вә ҝөзләјирик ки, мүтләг шәкилдә буна әмәл олунсун ки, данышыгларын давамы мүмкүн олсун.
Хариҹи ишләр назири Сејид Аббас Әрагчи, АБШ-лә Оман васитәчилији илә апарылан бирбаша олмајан данышыгларын бу раунду баша чатдыгдан сонра Маскатда журналистләрә ачыгламасында билдириб: Бу ҝүн узун вә интенсив мүзакирәләр апарылыб.
Әрагчинин сөзләринә ҝөрә, данышыглар сәһәр саат 10:00-да башлајыб вә ахшам саат 18:00-а јахынадәк бир нечә сессија шәклиндә давам едиб. Ҝөрүшләр бирбаша олмајан форматда кечирилиб. О, Оман хариҹи ишләр назири Бәдр әл-Бусаидинин һәм гонагпәрвәрлик вә ев саһиблији, һәм дә тәрәфләр арасында месажларын өтүрүлмәси бахымындан бөјүк зәһмәт чәкдијини вурғулајыб.
Иранын нараһатлыглары гаршы тәрәфә јахшы мүһитдә чатдырылыб
Хариҹи ишләр назири, бир мүддәт фасиләдән сонра тәрәфләрин мөвгеләринин бир-биринә өтүрүлмәсинин мүһүм әһәмијјәт дашыдығыны вурғулајараг дејиб: Иранын нараһатлыглары, мараглары вә Иран халгынын һүгуглары гаршы тәрәфә јахшы вә конструктив мүһитдә чатдырылыб, ејни заманда гаршы тәрәфин бахышлары да динләнилиб.
Бу ҝүнкү данышыглар јахшы башланғыҹ олду
Сејид Аббас Әрагчи билдириб ки, бу мәрһәләни “јахшы башланғыҹ” кими гијмәтләндирмәк олар. Бунунла белә, данышыгларын давамы пајтахтларда апарылаҹаг мәсләһәтләшмәләрдән сонра мүәјјәнләшәҹәк. О гејд едиб ки, үмумиликдә данышыгларын давам етдирилмәси мәсәләсиндә разылыг вар, лакин вахт, тарих вә формат мәсәләләри Оман хариҹи ишләр назири васитәсилә сонракы мәсләһәтләшмәләрдә дәгигләшдириләҹәк.
АБШ-јә етимадсызлыг данышыгларын гаршысында ҹидди манеәдир
Иран ХИН рәһбәри вурғулајыб: Өлкә сәккиз ај давам едән ҝәрҝин вә мүһарибә илә мүшајиәт олунан дөврдән сонра јенидән диалог мәрһәләсинә дахил олур. Бу мүддәтдә јаранан вә әввәлки етимадсызлыглары даһа да дәринләшдирән инамсызлыг мүһити данышыглар гаршысында ҹидди манеәдир. Онун сөзләринә ҝөрә, илк мәрһәләдә бу етимадсызлыг арадан галдырылмалы, даһа сонра исә Иран халгынын марагларыны тәмин едә биләҹәк јени диалог чәрчивәси формалашдырылмалыдыр.
Ҝәләҹәк ҝөрүшләрдә үмуми чәрчивәјә наил олмаг мүмкүндүр
Әрагчи билдириб: Бу мөвзуда илкин мүзакирәләр апарылыб вә тәрәфләрин бахышлары динләнилиб. Әҝәр гаршы тәрәфдә ејни јанашма давам едәрсә, нөвбәти ҝөрүшләрдә данышыгларын мөвзулары үзрә үмуми вә разылашдырылмыш чәрчивәјә наил олмаг мүмкүндүр. Бунунла белә, о, јекун нәтиҹә барәдә индидән һөкм вермәк истәмәдијини гејд едиб вә просесин давамынын һәм гаршы тәрәфин мөвгејиндән, һәм дә Теһранда гәбул олунаҹаг гәрарлардан асылы олдуғуну вурғулајыб.
АБШ-лә данышыглар јалныз нүвә мөвзусундадыр
Сејид Аббас Әрагчи Иранын реҝионал тәһлүкәсизликлә бағлы нараһатлыглара даир ИРНА-нын суалыны ҹавабландырараг билдириб ки, АБШ-лә апарылан данышыглар јалныз нүвә мәсәләси илә мәһдудлашыр вә диҝәр мөвзулар үзрә һеч бир мүзакирә апарылмыр.
О әлавә едиб: Нүвә данышыглары вә әсас мәсәләләрин һәлли јалныз сакит, ҝәрҝин олмајан вә тәһдидсиз мүһитдә мүмкүндүр. Иран бу мәгамы данышыгларда ачыг шәкилдә вурғулајыб вә давамлы диалог үчүн тәһдид вә тәзјигләрдән чәкинилмәсини ваҹиб шәрт кими гаршы тәрәфин диггәтинә чатдырыб.
Sizin rəyiniz