Әһли Бејт - АБНА – Хәбәр Аҝентлијинин вердији хәбәрә әсасән, Имам Муса Сәдр 1928-ҹи илдә Гум шәһәринин "Ешгәли мәһәлләси"ндә руһани аиләсиндә дүнјаја ҝөз ачыб.
Атасы мәрһум Ајәтуллаһ-үзма Сејид Сәдрәддин Сәдр өвладынын адыны Муса гојду. Сејид Муса ушаглыг вә јенијетмәлик дөврүнү һәмин мәһәлләдә кечирди.
Муса Сәдр 1942-ҹи илдән башлајараг он ил мүддәтиндә Гум Елми һөвзәсиндә тәһсил алыр. Һөвзәдә тәһсил алмагла јанашы Теһран Университетинә дахил олур вә игтисадчы-һүгугшүнас ихтисасына јијәләнир. 1944-ҹү илдән Нәҹәф Елми һөвзәсиндә тәһсилини давам етдирир.
Муса Сәдр 28 јашында аилә һәјаты гурур. Онун бу издиваҹдан ики оғлу (Сәдрәддин, Һәмид), ики гызы (Һура, Мәлиһә) дүнјаја ҝәлир. Ливан сәфәри Муса Сәдр 1960-ҹы илдә Ливандан чохсајлы мүраҹиәтләр әсасында баба јурдуна 30 ҝүнлүк сәфәрә чыхыр. Амма Ливандакы вәзијјәт ону бу өлкәдә галыб фәалијјәт ҝөстәрмәјә вадар едир.
Мүса Сәдр өз фәалијјәтләринә Сур шәһәриндә имам-ҹамаатлыгла башлајыр. Гыса бир мүддәтдә әмин олур ки, өлкәдәки мәһрумијјәтләрин әсас сәбәби идеоложи вә игтисади јохсуллугдур. Һәфтәдә ики дәфә Бејрута ҝедиб орада чыхышлар едән Муса Сәдр халгын етимадыны газаныр вә Ливанда иримигјаслы ислаһатлара башлајыр. Һәмин вахт Ливан мәктәбләринин дәрс програмлары Франсанын мәнафеләринә хидмәт едән гүввәләр тәрәфиндән һазырланырды. Муса Сәдр бир заман бабасы Шәрәфәддин тәрәфиндән Бејрутда тәсис олунмуш мәдрәсәнин фәалијјәтләрини ҝүҹләндирир вә бу мәдрәсә гыса бир заманда университетә чеврилир. Үзүҹү фәалијјәтләр Муса Сәдрин ҹидди тәлашлары сајәсиндә Ливанда сәнәт мәктәби, хејријјә ҹәмијјәти, гадын тәшкилаты, тибб баҹылары һазырлајан мәктәб, тибби хидмәт шөбәләри, халчачылыг сехләри ачылыр.Муса Сәдр Ливанда ән ади һаглардан мәһрум шиәләр үчүн мәҹлис тәсис едир, ҹидди мүхалифәтә бахмајараг шиәләрин парламентдә тәмсил олумасына наил олур. Мәнтәгәдәки јағы дүшмәнлә мүбаризә үчүн "Мәһрумлар һәрәкаты" јарадылыр. Бу иҹтимаи тәшкилатын ардынҹа "Әмәл" һәрби тәшкилаты тәсис едилир. Муса Сәдр мүхтәлиф дини әгидәләрин сәһнәдә олдуғу Ливанда өз сүлһ вә достлуг шүары илә гәлбләрә јол тапыр. Ону тәкҹә шиәләр јох, сүнни мәзһәбли мүсәлманлар вә башга дин ардыҹыллары Ливанын хиласкары сајыр. Муса Сәдр Ливандакы ијирми иллик фәалијјәти дөврүндә мәнтәгәдәки сијасы дуруму дәјишмәјә мүвәффәг олур.
Онун Авропа, Африка өлкәләринә сәфәрләри Ливана јени мүнасибәтин формалашмасында мүһүм рол ојнајыр... Амма 1979-ҹу илдә, ағрысы һәлә дә јашанан бир ҝүндә Ливија дөвләти тәрәфиндән рәсми дәвәтлә һәмин өлкәјә сәфәрә чыхмыш имам Муса Сәдр ики көмәкчиси – Шејх Мәһәммәд Јагуб вә Аббас Бәдрәддинлә бирикдә мүәммалы шәкилдә јоха чыхды. Өзүнү "јер үзүндә Аллаһын хәлифәси" сајан Ливија президенти Мүәммәр Гәззафи бу ҝүн имам Муса Сәдрин оғурланмасында әсас фигур сајылыр. Муса Сәдрин оғурланмасы Ислам дүнјасында, иманлы инсанлар арасында бөјүк тәлатүм јаратса да, бу мүәмма һәлә дә өз һәллини тапмамышдыр.
Диггәт: Хәбәрдән истифадә етдикдә мәнбәјә истинад лазымдыр
