Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, 2015, 26 Ганлы Нојабр Нардаран Фаҹиәси иши үзрә Мүсәлман Бирлији Һәрәкатынын сәдри Тале Бағырзадә, АХҸП сәдринин мүавини Фуад Гәһрәманлы вә даһа 16 нәфәрин мәһкәмә просеси давам едир. Бу иш үзрә Бакы Ағыр Ҹинајәтләр Мәһкәмәсиндә 04, 08, 2016 тарихдә кечирилән иҹласда ШӘРЛӘНӘН шәхсләрдән даһа беши ифадә вериб. Онлар ифадәләриндә мәруз галдыглары амансыз ишҝәнҹәләрдән данышыблар.
Дүнәнки мәһкәмә иҹласында илк диндирилән Расим Ҹәбрајылов олуб. О билдириб ки, Нардаран әмәлијјаты заманы дүнјасыны дәјишмиш ики полисдән бирини онун ҝөзү гаршысында диҝәр маскалы полис ҝүлләләјиб.
Һадисәнин неҹә баш вермәсиндән данышан Расим Ҹәбрајылов дејир ки, Мәһәррәмлик ајы олдуғу үчүн Һаҹы Әбүлфәзин евиндә Имам еһсаны верилирди. Өзү дә еһсан сүфрәсиндә чај пајлајыб. Амма полисләр һүҹум едәндә намаз вахты олуб: “Мән мәтбәхдә идим, стәканлары јујурдум. Сәс ешидиб чыхдым, ҝөрдүм ки, тәхминән 70-80 нәфәр гара маскалы еви мүһасирәјә алыб, бир гисми дә ҝүллә ата-ата евә һүҹум етди. Атылан ҝүлләләрин бир һиссәси резин иди, бир һиссәси дә әсл ҝүлләләр. Мәнә 14 резин ҝүллә дәјиб. Һәјәтдә мәним әлләрими гандаллајыб апаранда полисләрдән бири ҝөзүмүн габағында јараланды. Гара маскалылардан бири о биринә гышгырды ки, ”залым баласы, сән нејләдин, бу өлдү ки…” Јаралы маскалыны гуҹагларына ҝөтүрүб апардылар. Ики мебел машыны ҝәтирмишдиләр. Јаралы полиси сағдакы машына гојдулар, мәни исә солдакына тулладылар”.
Расим Ҹәбрајылов машынын ичиндә баш верәнләрдән дә данышыб: “Инсанлары гандаллајыб машынын ичинә зибил кими туллајырдылар. Јазыблар ки, ҝуја, биздә силаһ-сурсат олуб. Һамысы өзләриндә олуб. Биздә һеч кибрит чөпү дә олмајыб. Мән һәмин ҝүн вә ондан сонра едилән вәһшиликләри әввәлләр анҹаг ефирләрдә, ”Арка сокаклар” сериалында ҝөрмүшдүм. Онларын еләдикләрини сөзлә ифадә етмәк мүмкүн дејил. Елә шејләр вар ки, бурада ханымлар олдуғуна ҝөрә даныша билмирик. Бизи машына миндириб апаранда орада тутуланларла јанашы, өлән јолдашларымызын ҹәсәдләри дә варды. Јаралыларын, ҹәсәдләрин, һамымызын үстүндә 45 “размер” чәкмә илә елә ҝәзирдиләр ки, санки јерә картоф төкмүшдүләр, адам јох. Силаһын гундағы илә кимин һарасындан ҝәлди вурурдулар. Мәним дә вуруб гашымы партлатдылар. Фәраһим там сағлам иди, ону машынын ичиндә ҝөзүмүзүн габағында дөјә-дөјә өлдүрдүләр. Мән һәлә сөјүшләри, тәһгирләри демирәм…
“Ҹамаат јатанда бизи ”дубинка” илә дөјүб, тока верирдиләр”
“Бандотдел”ә апарандан сонра ҝеҹәнин бир јарысы үзү дивара сахлајыб, әли гандаллы дөјүрдүләр. Тәсәввүр един ки, гашымдакы јараны тикмәдиләр, дедиләр ки, башыны јастыға гојма, јатаг дәстинә ган дәјмәсин. Ҝеҹә саат 3-дә – һамы јатдығы вахтда бизи галдырыб 5-ҹи мәртәбәдә “дубинка” илә дөјүб, тока верирдиләр.
Мәни 26 нојабрдан сонра бир дә 12-дә “бандотдел”дән чыхарыб Күрдәханы түрмәсинә апардылар, орада да 1 саат әрзиндә гејдијјатдан кечириб, јенидән “бандотдел”ә гајтардылар. Вәкилә јалварырдым ки, евә хәбәр вер, чүнки онларын өлдү-галдымдан хәбәрләри јох иди”.
“Мәни үст-башым ҹырыг вәзијјәтдә, ган ичиндә диндирибләр”
Расим Ҹәбрајылов дејир ки, онларда силаһ олмасы барәдә иттиһамда јазыланлар ағ јаландыр: “Бандотделдә 5-ҹи мәртәбәдә ајры-ајры торбалара силаһ гојуб, габлашдырыб үстүнү мөһүрләјиб, адларымызы јазмышдылар. Валлаһ, иттиһам актында јазыланлар бош шејдир, јаландыр. Ифадәләрими тәсдигләмирәм, чүнки ону дәһшәтли ишҝәнҹәләр алтында вермишәм. Мәни ишҝәнҹә илә Нардарана апарыб чәкилишдә онларын дедикләрини тәкрарламағымы тәләб етдиләр. Чәкилишдә мәни мәҹбур етдиләр дејим ки, Тале Бағырзадә евин ичиндә бизә полисләрә атәш ачмағы әмр едиб. Мән буну ишҝәнҹәләр алтында демишәм. Тале бизим руһаниләрдәндир вә она алим кими бөјүк һөрмәтим вар. Биз тәрәфдән һеч ким полисә мүгавимәт ҝөстәрмәјиб, силаһлы олмајыб. Тәсәввүр един, мәни үст-башым ҹырыг вәзијјәтдә, ган ичиндә диндирибләр. Јазыблар ки, ҝуја Аббас Һүсејнов вә рәһмәтлик Әкбәр силаһ ҝәтириб, бизә пајлајыблар. Бу, онларын өз ујдурмасыдыр. Аббас бир мүддәт мәнимлә ејни камерада галырды. Ону о гәдәр дөјмүшдүләр ки, јериндән тәрпәнә, ади су ичә билмирди. Бүтүн бу шәрәфсизликләри едәнләрә ајыб олсун.
Ҝеҹә јатанда фикирләширдик ки, ҝөрәсән јенә ҝәләҹәкләр? Лап бөјүкләринин јанына галханда мәнә бир китаб ҝөстәриб дедиләр ки, бу, Тале Бағырзадәнин мүраҹиәт китабчасыды. Мән дә дедим ки, ҝөрмәдијим бир шеји дејә билмәрәм. Елә дүзүб-гошублар ки, ҝуја, биз 26 нојабрда әмәлијјатын олаҹағыны билирмишик вә буна ҝөрә дә 25-дә бизә ҝәтириб силаһ пајлајыблар. Мән нә Ислам дөвләти гурмаг истәмишәм, нә дә дөвләт чеврилишинә ҹәһд еләмишәм”.
“Каш Аллаһын мөҹүзәси олајды, бизә едиләнләри сизә ҝөстәрә биләјдик…”
Даһа сонра тәгсирләндирилән Закир Мустафајев ифадә вериб. О да иттиһам актында јазыланларын сахта олдуғуну билдириб. Закир Мустафајев Нардаран әмәлијјатындан бир ај сонра һәбс олунуб. Өзү өз ајағы илә полисә ҝедиб. Ифадәсиндә бу барәдә әтрафлы данышыб: “Мән һадисә баш верән ҝүн һәмин евдә еһсан сүфрәсиндә идим. Намаз вахты һүҹум еләдиләр. Мәним дә әлими полиетиленлә бағладылар, үзү үстә узатдылар. Тале Бағырзадәни апаранда гышгырдылар ки, ”әмәлијјат битди, чыхыша”. Онлар чыхыб ҝедәндән сонра мәним әлләрими гадынлар ҝәлиб ачды. Мән Нардаран сакини дејиләм. Машыным да һәмин евин гаршысында иди, шүшәләри сындырылмышды. Өзүм дә һалсыз идим дејә, машыны орада гојуб чыхыб ҝетдим. Һадисәдән ики ҝүн сонра ҝедиб машынымы ҝөтүрмәк истәдим, амма Нардаран сакини олмадығым үчүн постдан бурахмадылар. Бундан сонра нормал һәјатыма давам едирдим. Гардашым Ҝәнҹәдә јашајыр. Она зәнҝ едиб дејибләр ки, сәнин адына олан машынла гәза төрәдилиб. О полисә ҝедиб, мәлум олуб ки, онун машынынын һеч бир проблеми јохдур. Сонра дејибләр ки, гој, сәнинлә ејни үнванда гејдијјатда олан гардашын да машыныны ҝәтирсин. Мән машынымла әлагәдар Сабунчу рајон Полис Идарәсинә ҝетдим. Сәһәр 11-дән ахшам 8-ә гәдәр ҝөзләдим. Мәнә дедиләр ки, рәисин јанына ҝедирсән, амма бирдән гышгырса, тәһгир еләсә, ҹаваб вермә. Баша дүшмәдим ки, мәни нијә тәһгир еләмәлидир? Рәис мәни ҝөрән кими деди ки, “ҝәл ҝөрүм ә, бандит, силаһлар һардадыр?” Башлады мәни тәһгир еләмәјә. Етираз едәндә дөјдүләр. Рәисин әлиндә бир тәрәфиндә електрошок олан фанар варды. Мәнә ток вердиләр. Башладылар ки, силаһлар һардадыр, Талеһ сизә силаһ пајлајыб. Дедим олмајыб ахы белә бир шеј. Мәни бир отаға апарыб гандалла стула бағладылар. Мәнә сәһәрә гәдәр вахт вердиләр ки, дүшүнүм. Дејим ки, ҝуја, Тале Бағырзадә бизә силаһ вериб, чеврилиш һазырлајыб. Дедиләр ки, өзүнә јазығын ҝәлсин, 3 ушағын вар. Ертәси ҝүн ҝәлдиләр ки, “ағылланмысан?” Дедим, ахы олмајан шеји мән неҹә дејим? Бундан сонра јенә дөјүб, ардынҹа да рәисин машынына миндириб “бандотдел”ә апардылар. Каш, Аллаһын бир мөҹүзәси олајды, бизә орада едиләнләри сизә ҝөстәрә биләјдик. 28 ҝүн орада сахланылдым. Ахырда мәни аиләмлә тәһдид етдикләри үчүн онларын дедикләринә гол чәкдим. Дедиләр ки, аиләни бура ҝәтирәҹәјик. Сонра да мәндән тәләб етдиләр ки, әмәлијјат чәкилишләриндә онларын дедикләрини тәкрарлајым. Мәни Маштағаја апардылар, һасарын дибинә гумбара вә силаһ гојдулар. Дедиләр ки, ҝет, орадан чыхар”.
Нардаран һадисәләринин һакимијјәт дахилиндәки һансыса хәјанәткар груплашманын иши олдуғуну дејән Закир Мустафајев гејд едир ки, “бандотдел”дә оларкән һүгугларынын тәмин олунмасыны, она вәкил верилмәсини истәјиб. Амма һеч бири јеринә јетирилмәјиб: “Бандотдел”дә Кәрим мәнә деди ки, сәни өлдүрәрик, ганыны да итирәрик”.
Закир Мустафајев мәһкәмәдә әлиндәки Гуран китабына анд ичиб ки, онларда силаһ олмајыб.
“Елә һәрәкәт еләдиләр ки, буну ермәни еләмәзди…”
Тәгсирләндирилән Агил Исмајылов да ифадәсиндә иттиһам актында јазыланларын јалан вә бөһтан олдуғуну билдириб: “Биз кимләринсә фәрзијјәси илә тутулмушуг. Һадисә ҝүнү хәбәрдарлыг атәши ачмадылар, бирбаша инсанлары вурдулар. Ҝүллә јағдырырдылар. Тәсәввүр един, мәнимлә гара маскалы арасында бир метр мәсафә варды, онун да әлиндә силаһ, ҝүллә ата-ата ҝедир. Мән она неҹә мүгавимәт ҝөстәрә биләрәм? Әлләрими гандаллајандан сонра да башыма автомат сыхмышдылар. Инди бахын, ҝөрүн, ҹинајәткар кимдир. Машынын ичиндә бизә олмазын ишҝәнҹәләр вердиләр. Силаһын гундағы, ”дубинка” илә вәһшиҹәсинә вурурдулар. Фәраһими о гәдәр вурмушдулар ки, “дубинка” әјилмишди. Ону дөјә-дөјә вәһшиҹәсинә гәтлә јетирдиләр. Һаҹы Талеји машында о гәдәр вурдулар ки, артыг сәси чыхмырды. Мәним башымы партлатдылар. Елә һәрәкәт етдиләр ки, буну ермәни етмәзди. Үстүмүзә силаһ чәкиб дедиләр ки, сизи өлдүрәҹәјик. Һамымыз кәлмеји-шәһадәти ҝәтирдик. Әкбәрин ҹәсәдинин үстүндә ҝәзирдиләр”.
“Ҝөрүнүр, ҹибимдәки 30 гәпији ”лимонка” илә сәһв салыблар”
Агил Исмајылов Баш Мүтәшәккил Ҹинајәткарлыгла Мүбаризә Идарәсинә апарыландан сонра да башларына ҝәләнләр барәдә данышыб: “Бизи апаранда ”бандотдел”ин һәјәтиндә артыг бир дәстә аҹ гурд кими бизи ҝөзләјирди. Тәкҹә мәни 3 нәфәр дөјүрдү, башгаларынын һәрәсинин үстүнә 5-6 нәфәр төкүлүшмүшдү. Бунлар да өзләринә адам дејиб, ҝәзирләр. Мәни аиләмлә тәһдид едиб, гол чәкдирдиләр. Конкрет, дедикләри о иди ки, гејрәтинизи бурада гојун, ҝедин. Мәним ҹибимдә 30 гәпик пул олуб. Ҝөрүнүр, бунлар ону “лимонка” илә сәһв салыб. Јазыблар ки, ҝуја, ҹибимдән “лимонка” чыхыб. Мән һеч билмирәм ки, “лимонка” неҹә олур. Неҹә олду ки, һамымызын сол ҹибиндән китабча, сағ ҹибимиздән дә гумбара чыхыр? Өлән 6 нәфәрин ганы бунларын үзәриндәдир. Бу аналарын ҝөз јашы тез-ҝеҹ онларын ахырына чыхаҹаг”.
“Бизи нараһат едән вәкил виҹдансызлығыдыр”
Агил Исмајылов дөвләт һесабына она верилмиш вәкилдән дә наразылыг едиб: “Вәкилдән сорушурам ки, мәнә гол чәкдирилән кағыздакы 120-ҹи маддә нәдир? Дејир ки, нараһат олма, чәк, изаһ еләмәди. О вәкил кими мәни мүдафиә етмәјиб”.
Гејд едәк ки, һәмин вәкил Сәфәр Һүсејнов мәһкәмәдә дә Агил Исмајыловун мүдафиәчиси гисминдә иштирак едир. Агил мәһкәмәдә онун хидмәтиндән имтина етдијини билдириб.
Бу заман вәкил Сәфәр Һүсејнов мүвәккилини јалан данышмагда иттиһам едиб: “Јалан данышма, адамын виҹданы олар”.
Агил Исмајылов да она ҹаваб гајтарыб: “Виҹдансыз сәнсән ки, бу ҹүр ишләрлә мәшғул олурсан”.
Бу ан мәһкәмдә ҝәрҝинлик јашаныб вә тәгсирләндирилән шәхсләр һәмин вәкилин залдан чыхарылмасыны тәләб едиб. Сон нәтиҹәдә вәкил залы тәрк едиб.
Тале Бағырзадә дә вәкил мәсәләсинә мүнасибәт билдириб: “Бизи нараһат едән одур ки, Вәкилләр Коллеҝијасы виҹданлы вәкилләри ҹәзаландырыр, коллеҝијадан хариҹ едир. Амма сифариш иҹра едән бу ҹүр вәкилләр иш башындадыр. Бизи нараһат едән вәкил виҹдансызлығы, бунларын чиркаба булашмасыдыр”.
Диҝәр тәгсирләндирилән Илгар Худавердијев дә дөвләт тәрәфиндән тәјин олунан вәкилдән имтина едиб.
Тутуланлар арасында јеткинлик јашына чатмајан да вар
Даһа сонра һәбс олунаркән һеч јеткинлик јашына чатмамыш Рамин Јарыјев ифадә вериб: “Адәтән бу ҹүр әмәлијјатларда хәбәрдарыг атәши ачырлар. Амма бунлар бирбаша бизә атдылар. Әкбәрин синәсиндән вурдулар. Ону өлдүрәндән сонра да машында голларыны, ајагларыны сындырдылар. Рафаел вә Әкбәрин машында ҹәсәди вар иди. Фәраһими дә дөјүб өлдүрдүләр. Биз силаһлы шәхсләрә неҹә мүгавимәт ҝөстәрә биләрдик?”
Рамин Јарыјев билдириб ки, јеткинлик јашына чатмамасына бахмајараг, ону диндирәркән валидејнләринин һеч бири гануни нүмајәндә кими чағырылмајыб. Һәмчинин гејд едиб ки, бу һадисәдән ҹәми үч ај әввәл намаз гылмаға башламышды.
Талеһ Бағырзадә бу јердә реплика вериб: “Бу адам 3 ај иди ки, намаза башламышды. О, дини дәрк етмәдији һалда, неҹә Ислам дөвләти гура биләрди? Биз һәмишә демишик ки, бу һакимијјәт дөвләт чевирилиши едир. Бу чыхышларымыза ҝөрә һәбс едиләҹәјимизи дә билирдик. Мән һәбс едиләндә дедиләр ки, нијә һөкумәт әлејһинә данышырсан? Нијә дејирсән ки, Азәрбајҹан ермәниләрә газ верир, бизә вермир?”
“Додағыма 4 тикиш вурулуб, дишләрим сындырылыб”
Дүнән диндирилән сонунҹу тәгсирләндирилән Әли Нуријев олуб: “Мәним адымдан јазыблар ки, ҝуја, мән Закирдән Һаҹы Талејин галдығы евдә силаһ олдуғуну ешитмишәм. О ифадәнин мәнә һеч бир аидијјәти јохдур. Мәнә 7 резин ҝүллә дәјиб. Гурана әл басырам ки, Аббас мәнә нә силаһ, нә гумбара, нә дә бычаг вериб. Ағзымы партлатмышдылар, додағыма 4 тикиш вурублар. Алт вә үст дишләрими сындырыблар. Бизи ”бандотдел”ин һәјәтиндә дүшүрүб зүлм едәндә әтраф биналарда оланлар ејвандан ҝөрүрдүләр. Голумда ҝүллә јериндән ган ахырды. Мәнә тәјин олунан вәкил дејирди ки, сән ҹинајәткарсан, сәни неҹә мүдафиә едим?”
Әли Нуријевин сөзләринә ҝөрә, онун јахынларына ајағынын биринин кәсилмәси барәдә јалан мәлумат верилиб: “Декабрын 30-у биз Күрдәханыја көчүрүлдүк. Јанварын 1-дә илк дәфә евлә әлагә сахладым. Аиләмә демишдиләр ки, ајағымы кәсибләр. Анам телефону ҝөтүрән кими деди ки, ”Әли, ајағыны кәсибләр?”. Дедим ки, јох. Инанмады. Анҹаг мәһкәмәдә ҝәлиб ҝөрәндә инанды ки, ајағым кәсилмәјиб. Мәнә тәјин олунан вәкилә дәфәләрлә јалвардым ки, евә хәбәр елә ки, сағам. Амма етмәди. Мәнә вәкилин јанында 6-7 ағ вәрәгә гол чәкдирибләр. “Бандотдел”дә Кәрим адлы шәхс мәнә ток верди, деди ки, “сәни өлдүрәрәм, дејәрәм, гачмаг истәјирди, јыхылды”. Дедим ки, “өлдүрүн, амма киминсә үзүнә гојмајын”. Азјашлы әмимоғлу вә гардашым вар. Онларын шәклини ҝөстәриб дедиләр ки, “әҝәр онларын да бура ҝәлиб, сән чәкән әзијјәти чәкмәсини истәмирсәнсә, јазыланлары имзала”. Аллаһ о Кәримә ләнәт еләсин. Мәнә верилән ишҝәнҹәләрлә бағлы прокурорлуға, Омбудсмана, Гырмызы Хач Комитәсинә мүраҹиәт етдим. Омбудсмандан мәнә ҹаваб ҝәлди ки, сиз мүгавимәт ҝөстәрмисиз. Ахы мән јалын әллә силаһлы шәхсләрә неҹә мүгавимәт ҝөстәрә биләрдим?”
Мәһкәмә просеси августун 10-да диҝәр тәгсирләндирилән шәхсләрин ифадәләри илә давам едәҹәк.
Диггәт: Хәбәрдән истифадә етдикдә мәнбәјә истинад лазымдыр
