Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Ијулун 19-да Бакы Ағыр Ҹинајәтләр Мәһкәмәсиндә Нардаран һадисәләринә ҝөрә һәбс едилән «Мүсәлман Бирлији» Һәрәкатынын сәдри Тале Бағыров, Азәрбајҹан Халг Ҹәбһәси Партијасы (АХҸП) сәдринин мүавини Фуад Гәһрәманлы вә даһа 18 Исламчынын мәһкәмәси башлајыб.
Кечирилән һазырлыг иҹласында тәгсирләндирилән шәхсләрин анкет мәлуматлары дәгигләшдирилиб. Бу заман бәлли олуб ки, онларын бир нечәсинин вәкили јохдур. Әксәријјәти исә дөвләт һесабына тәјин олунмуш вәкилләр тәрәфиндән мүдафиә олунур.
Тәгсирләндирилән Ҹаббар Ҹаббаров вәкилдән имтина етдијини дејиб: «Бир «пајковој» вәкил вермишдиләр мәнә, һөкумәт вәкили иди. «Бандотдел»дә бизә зүлм едәндә, о, мәни горумаг әвәзинә аз галырды өзү дә мәни дөјсүн».
АХҸП сәдринин мүавини Фуад Гәһрәманлы исә мәһкәмә һејәтинә етираз етмәдијини билдириб: “Һакимләр дәјишсә дә, һеч нә дәјишмәјәҹәк. Она ҝөрә етиразым јохдур. Мәним етиразым бу режимәдир. Әсас одур мәһкәмә иҹласлары тез-тез кечирилсин. Чүнки Күрдәханыда вәзијјәт чох писдир. Орада бу истидә адам сахламаг мәнәви ишҝәнҹәдир».
Тәгсирләндирилән шәхсләринин бәзиләринин вәкилләри олмадығындан, онларын мүдафиәчи илә тәмин едилмәси үчүн просесдә фасилә елан олунуб. Мәһкәмәнин һазырлыг иҹласы саат 14:00-да давам едәҹәк.
Хатырладаг ки, Дахили Ишләр Назирлији (ДИН) бирбаша Илһам Әлијевин башчылығы илә 2015-ҹи ил нојабрын 26-да Бакы шәһәринин Нардаран гәсәбәсиндә әмәлијјат кечириб.
Нардаран һадисәләри заманы 2-си полис олмагла 7 нәфәр Шәһид олуб. Шәһид олан ики полис ишчисинин әмәкдашлары тәрәфиндән һәлак едилдији ортаја чыхыб. Һәмин ҝүн Тале Бағырзадә вә онун 14 тәрәфдары һәбс едилиб.
Сонрадан прокурорлуг билдирди ки, «Мүсәлман Бирлији» Һәрәкатына ҝөрә, үмумиликдә 70 нәфәр шәхс һәбс олунуб. Онлардан даһа јүнҝүл маддәләрлә иттиһам едиләнләрдән бир чохунун мәһкәмәси бир мүддәт өнҹә башлајыб. Бәзиләринә 1 ил 6 ајдан, 2 ил 6 аја гәдәр һәбс ҹәзасы верилиб.
Диггәт: Хәбәрдән истифадә етдикдә мәнбәјә истинад лазымдыр
