Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, 2014-ҹү илин декабрында һәбс олунмуш Илаһијјатчы Елшән Мустафаоғлунун аиләси өлкә башчысына мүраҹиәт едәрәк көмәк истәјир.
Һазырда ДТХ тәҹридханасында сахланылан илаһијјатчы алим, фәлсәфә доктору Елшән Мустафајевин һәјат јолдашы Вүсалә Мустафајева медиа васитәсилә өлкә Президентинә мүраҹиәт едәрәк һәјат јолдашынын азад едилмәсинә көмәк ҝөстәрилмәсини истәјир. Һәјат јолдашы јазыр ки, илк вахтлар аиләси Елшән Мустафаоғлунун һәбсиндә һансыса анлашылмаслығын ролунун олдуғуну дүшүнүб. Бу сәбәбдән дә һадисәнин иҹтимаиләшдирилмәсинә ҝәрәк дујмајыб: “Һәјат јолдашымын ҝүнаһсыз олдуғуна әмин олдуғум үчүн әввәл бу анлашылмазлыға тез бир заманда ајдынлыг ҝәтириләҹәјинә вә онун азад олунаҹағына инанырдым. Бу сәбәбдән дә бу барәдә мәтбуата да бир ачыглама вермәк истәмирдим. Елшәнин өзү дә дәфәләрлә һәбс мүддәтинин узадылмасы үчүн кечирилән мәһкәмәләрдә ҝүнаһсыз олдуғуну вә она гаршы ирәли сүрүлән иттиһамы гәбул етмәдијини билдириб. Мән бурадан өлкә Президентинә мүраҹиәт едәрәк ондан хаһиш едирәм ки, һәјат јолдашым Елшән Мустафајевин һәбсдән азад олунмасында бизә көмәк етсин”.
Гејд едәк ки, илаһијјатчы Елшән Мустафаоғлунун үч азјашлы өвлады вар. Мүраҹиәтдә Е.Мустафаоғлунун һәбсиндән сонра һәјат јолдашынын хәстәлијинин бир аз да шиддәтләндији, аиләнин дурумунун јахшы олмадығы билдирилир. Елшән Мустафајевин һеч бир јахын гоһуму (ата, ана, гардаш вә баҹы) јохдур.
Хатырладаг ки, Гафгаз мүсәлманлары Идарәсиндә чалышан илаһијјатчы Елшән Мустафаоғлу 2014-ҹү илин декабрын орталарында сахланылыб. Әввәлҹә онун сахланылмасы һагда мәтбуата мәлумат верилмәсә дә, сонрадан онун дөвләтә хәјанәтдә иттиһам олундуғу һагда мәлуматлар јајылды. Анҹаг бу ҝүнә гәдәр онун вәкилинин кимлији, барәсиндә апарылан истинтаг ишинин ҝедишаты һагда иҹтимаијјәтә һәр һансы мәлумат верилмәјиб.
Гејд едәк ки, Мустафајев Елшән Мустафа оғлу (Елшән Мустафаоғлу) 8 нојабр 1974-ҹү илдә Бакы шәһәриндә анадан олуб. Азәрбајҹанда вә Иранда али тәһсил алыб. 2007-ҹи илдә Бакы Дөвләт Университетиндә Фәлсәфә тарихи үзрә елми иш мүдафиә едәрәк фәлсәфә доктору ады алыб. Бундан башга 2006-2007-ҹи илләрдә "Иҹтимаи" ТВ-дә каналын ән популјар верилишләриндән олан "Ҹүмә Сөһбәти" верилишинин мүәллифи вә апарыҹысы олуб. 2007-ҹи илдә АНС ТВ-дә "Аллаһ Һаггы" верилишинин апарыҹысы олуб. 2008-ҹи илдә АНС-ПРЕСС Нәшријјат Евиндә Нәшријјат Департаментинә рәһбәрлик едиб. Һәмчинин “Азәрбајҹан-Америка Медиа Академијасы”нын директору олуб.
30-дан чох елми, публисист вә аналитик мәгаләнин, 5 елми әсәрин мүәллифидир. 20-јә јахын елми-нәзәри семинар вә елми топланты тәшкил етмиш, бир нечә јерли вә бејнәлхалг конфрансларда, о ҹүмләдән, АБШ, Түркијә, Иран, Мисир вә Сәудијјә Әрәбистанында кечирилән конфранс вә семинарларда иштирак вә бир нечәсиндә мәрузә илә чыхыш едиб.
Диггәт: Хәбәрдән истифадә етдикдә мәнбәјә истинад лазымдыр
