Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Артыг Новруз бајрамы өнҹәсиндән башланан мәһбусларын азад едилмәси просеси актив шәкилдә давам едир. Сон олараг Интигам Әлијевин дә азад едилмәси бу истигамәтдә үмидләр јарадыб. Бу мөвзу илә бағлы ДЕВАММ-ын мүраҹиәти мүәјјән гәдәр мүзакирәјә сәбәб олуб. Белә ки, өлкәдә онларла диндарларын һәбс олунмасына бахмајараг өлкә иҹтимаијјәти ејни диггәти бу истигамәтдә ҝөстәрмәкдә тәрәддүд едир. ДЕВАММ бу мөвзуја хүсуси олараг диггәт чәкиб вә буну бир нөв ајры-сечкилик адландырыб. Өлкәдә мөвҹуд олан вәтәндаш ҹәмијјәтинин фәалларыны һагсыз јерә һәбс едилмиш диндарларын да мүдафиәсинә галхмаға чағырыб.
ДЕВАММ-ын бу чағырышына өлкәнин сијаси-иҹтимаи елитасындан Дејерлер.орҝ-а мүнасибәтләр билдирилиб.
Милли Стратежи Дүшүнҹә Мәркәзинин рәһбәри Иса Гәмбәр гејд едиб ки, һәр кәсин бу мәсәләјә диггәт јетирмәси јеринә дүшәр: “Әлијев режими өлкәдә бүтүн вәтәндашларын һүгугуну позур. Инсан һаглары позуларкән ҹәмијјәтин бүтүн тәбәгәләринә аид олур. Сијаси партја үзвләри, ГҺТ-ләр, инанҹлы инсанлар вә диҝәр категоријаја аид олан инсанлар бу дурумдан әзијјәт чәкирләр. Тәбии ки, бу шәхсләрин дә һәр биринин һаглары мүзакирә олунмалыдыр. Мүсават Партијасы һаглары позулан вәтәндашларын сијаси партија мәнсубијјәтиндән асылы олмајараг һеч кәсә ајры-сечкилик етмир.
О ҹүмләдән инанҹлы инсанларын мүдафиәсинә дә һәр заман Мүсават Партијасы диггәт јетирир. Диҝәр сијаси гүввәләр дә дүшүнүрәм ки, бу мәсәләјә диггәт јетирирләр. Садәҹә олараг бир һәгигәт вар ки, сијаси партијалар, журналистләр, ГҺТ нүмајәндәләри бу мәсәләләрә мүәјјән гәдәр диггәт јетирирләр, амма инанҹлы кәсимин өзү бу мәсәләдә кифајәт гәдәр фәал ҝөрүнмүр.
Һаҹы Илгар Ибраһимоғлунун вә бир нечә диҝәр шәхсин бу саһәдә фәалијјәтини билирик вә тәгдир едирик. Амма инанҹлы шәхсләри әһатә едән сијаси тәшкилатлар, ГҺТ-ләр, медиа гурумларынын инанҹлы шәхсләрин мүдафиәсиндә хүсуси олараг фәаллығыны мүшаһидә етмирик. Дүшүнүрәм ки, бу истигамәтдә олан проблем һәм дә бундан гајнагланыр. Һәмин структурлар бу саһәдә даһа чох фәаллыг ҝөстәрсәләр һесаб едирәм ки, ҹәмијјәтә дә даһа чох тәсир едәр. Дүшүнүрәм ки, һәр кәсин бу мәсәләјә диггәт јетирмәси јеринә дүшәр”.
Милли Шуранын сәдри Ҹәмил Һәсәнли фикирләрини бөлүшәркән дејиб ки, бу адамлар да сијаси мүлаһизәләрлә тутулублар вә ҹәмијјәт онлары мүдафиә етмәлидир: “Әслиндә март ајынын 27-дә мән бу мөвзу илә бағлы ҝениш фикирләрими мүсаһибәмдә билдирмишәм. Мән дә диндарларла бағлы мөвзуну ортаја чыхартмышам. Бу адамлар да сијаси мүлаһизәләрлә тутулублар вә ҹәмијјәт онлары мүдафиә етмәлидир. Бу шәхсләрлә гаршы ҹидди һагсызлыг баш вериб, диндарлар да сијаси мәһбуслардыр. Әслинә һәбс проседурасы өзү буна әсас верир. Һәбс едилән диндарлар вәкиллә тәмин едилмәјибләр. Адамлар ишҝәнҹәләрә мәруз галырлар, аилә үзвләри илә әлагә имканындан мәһрум едилибләр. Ејни заманда, узун мүддәт иҹтимаијјәтдән ҝизләдилибләр. Бу бахымдан етигадлы инсанларын мүдафиәси, онларын сијаси мәһбус олмасы илә бағлы өз фикирләрими ики ҝүн өнҹәдән билдирмишәм. Әҝәр ДЕВАММ-да бу мәсәләни галдырыбса, онда бу тәшәббүсү алгышлајырам”.
Мөвзу илә бағлы фикирләрини бөлүшәркән РеАл партијасынын тәшкилати мәсәләләр үзрә катиби Натиг Ҹәфәрли гејд едиб ки, ДЕВАММ-ын бир чох мәсәләләрә јанашмасы чох дүшүндүрүҹүдүр: “Ҹәмијјәт, сијаси тәшкилатлар, сивил топлум олараг диггәтә алынаҹаг бир мәсәләләр галдырылыб. Әҝәр биз ҝәләҹәкдә сивил бир топлумун инкишафыны истәјириксә, ајры-сечкилик олмадан инсан һүгуглары мөвзусунда һүгуглары позулмуш һәр кәсә ејни мәсафәдә јанашмалы вә ејни ҹүр мүнасибәт ҝөстәрилмәлидир. Әҝәр биз инсан һагларындан данышырыгса дининдән, иргиндән, инанҹындан асылы олмајараг бүтүн шәхсләрә ејни мүнасибәтин ҝөстәрилмәси чох ваҹибдир. Бу нөгтеји нәзәрдән ДЕВАММ-ын тәшәббүсүнү дәстәкләјирәм. Ҝәләҹәкдә бу јөндә ҹидди мүзакирәләрин олмасы чох ваҹибдир. Бу ҹүр мүзакирәләр олса ҹәмијјәтимизин сивил јолла инкишафы үчүн дә чох өнәмли бир мәсәлә олаҹаг”.
Политолог Әрәстун Оруҹу фикирләрини бөлүшәркән дејиб ки, диндарларын да һагларынын бәрпа олунмасы чох өнәмлидир: “Бу мәсәләни сон ҝүнләрдә илк олараг ҝүндәмә ҝәтирәнләрдән бири дә мән олмушам. Сијаси мәһбуслар азад олунанда мән гејд етмишдим ки, белә олмамалыдыр. Чүнки, диндарларын да бир чоху ја сијаси бахышларына, ја дини дәјәрләрини горудугларына, ја да иҹтимаи фәалијјәтинә ҝөрә шәрләниб тутулуб. Бу әдаләтсизликдир вә ејни заманда ганунсузлугудур. Бунлар мүтләг арадан галдырылмалыдыр. Дүшүнүрәм ки, бу мәсәләнин иҹтимаиләшмәси чох өнәмлидир. Диҝәр тәрәфдән, бу ҹүр инсанларын һуманизм бахымдан һагларынын бәрпа олунмасы чох өнәмлидир. Бу һәм һакимијјәт вә ҹәмијјәт үчүн бир месаждыр ки, бахышларындан мөвгејиндән асылы олмајараг кимләр һәбсә, тәгибә мәруз галаҹагса вәтәндаш ҹәмијјәти, о ҹүмләдән өлкәнин фәаллары һәмин инсанларын тәрәфиндә олаҹаг. Бу гануна, әдаләтә, һагга һөрмәтдир. Бу диҝәр тәрәфдән ҹәмијјәтин бүтөвләшмәси үчүн мүхтәлиф зүмрәләр арасында јаранмыш гысганҹлығын, бир-бирләринә шүбһәли мүнасибәтин арадан галхмасы үчүн сон дәрәҹә өнәмлидир”.
“Туран” Информасија Аҝентлијинин рәһбәри Меһман Әлијев дејиб ки, тәртиб едилән сијаһыларда бәзи диндарларын да адлары вар: “Өлкәдә виҹдан мәһбусларынын азадлыға чыхмасы илә бағлы бәјанатлар сәсләнмишди. Әлбәттә ки, диндарларла бағлы хүсуси олараг ајрыҹа бир мөвге мөвҹуд дејил. Бу факты инкар етмәк мүмкүн дејил. Амма диндарлары һеч кәс үмуми сијаси мәһбуслардан ајырмыр. Азадлыға чыхмасы илә бағлы тәртиб едилән сијаһыларда бәзи диндарларын да адлары вар. Амма бурада башга бир реаллыг вар. Мәсәлән, Интигам Әлијев, Анар Мәммәдли, Лејла Јунус кими шәхсләр өзләри инсанларын мүдафиәсини тәшкил едирдиләр. Онларын һәбс сәбәби дә мәһз бу истигамәтдә фәалијјәтләри илә бағлыдыр. Бир дә вар ки, мән өз етигад, фикир азадлығыма ҝөрә, һәбс едилим. Бунлар арасында мүәјјән гәдәр фәргләр вар. Дүшүнүрәм ки, иҹтимаијјәтин вә бејнәлхалг гурумларын бу кими шәхсләрә диггәт етмәси дә мәһз бу сәбәбдәндир. Амма бу ҝүн һәбс едилән диндарлар да диггәт мәркәзиндәдир”.
Мөвзу илә бағлы вәкил Аслан Исмајылов фикирләрини бөлүшәркән дејиб ки, ганунсуз һәбс едиләнләри бөлмәк лазым дејил: “Тәбии ки, бу мөвзу актуал бир мөвзудур. Мән һәмишә бир мәсәләнин тәрәфдары олмушам: "ганунсуз јерә һәбс едилән бүтүн мәһбуслар азад едилмәлидир".
Ганунсуз һәбс едиләнләри бөлмәк лазым дејил. Ганунсуз һәбс едилән шәхсләрин танынмыш олмасы вә ја танынмыш олмамасы, һүгуг мүдафиәчиси олмасы вә ја диндар олмасы һеч бир фәрг етмир. Ганунсуз һәбс едилән бүтүн шәхсләр мүдафиә едилмәлидир. Мән бурада истәнилән дискриминасијанын әлејһинәјәм”.
Диггәт: Хәбәрдән истифадә етдикдә мәнбәјә истинад лазымдыр
