Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, өтән ҝүн Авропа Инсан Һүгуглары Мәһкәмәси (АИҺМ) “Толыши сәдо” гәзетинин редактору Һилал Мәммәдовун шикајәти үзрә гәрарыны ачыглајыб.
Авропа Мәһкәмәсинин ачыгладығы гәрара ҝөрә, журналистин мүһакимәси заманы онун гејри-инсани вә ја ләјагәти алчалдан рәфтара мәруз галмамаг (Авропа Конвенсијасынын 3-ҹү маддәси) һүгугуну позуб. Һ.Мәммәдов һәбсдә оларкән онун вәкили Халид Бағыров вәкилликдән узаглашдырылмышды. Авропа Мәһкәмәси журналистин вәкилсиз бурахылмасынын онун фәрди шикајәт вермәк (Конвенсијанын 34-ҹү маддәси) һүгугуну поздуғуну да өз гәрарында гејд едиб. Мәһкәмә гәрарына әсасән, Азәрбајҹан һөкумәти журналистә мәнәви зәрәрә ҝөрә 13 мин, һүгуги мәсрәфләрә ҝөрә исә 2500 еуро өдәмәлидир.
Гәрарда гејд олунур ки, 2012-ҹи илин ијунунда һәбс едилмиш Һ.Мәммәдов сахланылан вә полис идарәсинә апарылан заман полис вә мүлки ҝејимли шәхсләрин зоракылығына мәруз галыб. Онлар Һ.Мәммәдовун етник мәнсубијјәтини (Талыш олмасыны) тәһгир едибләр.
Һ.Мәммәдов 2013-ҹү ил сентјабрын 27-дә Бакы Ағыр Ҹинајәтләр Мәһкәмәсиндә 5 ил азадлыгдан мәһрум едилиб. О, наркотик маддә алвери, дөвләтә хәјанәт вә милли әдавәтин гызышдырылмасында иттиһам олунуб.
Журналист Авропа Мәһкәмәсинә шикајәтиндә Авропа Конвенсијасынын 3-ҹү, 5-ҹи вә 34-ҹү маддәси илә горунан һүгугунун позунтусунун танынмасыны, дәјмиш зәрәрин әдаләтли әвәзинин компенсасија едилмәсини тәләб едирди.
“Амнестј Интернатионал” Һ.Мәммәдов “виҹдан мәһбусу” кими таныјыб.
Диггәт: Хәбәрдән истифадә етдикдә мәнбәјә истинад лазымдыр
