Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Азәрбајҹанда “Маарифчилијә Дәвәт” Иҹтимаи Бирлијинин тәгдимат мәрасими кечирилиб.
Јени тәсис едилән “Маарифчилијә Дәвәт” Иҹтимаи Бирлијинин тәгдимат мәрасиминдә иҹтимаи бирлијин рәһбәр һејәти вә үзвләри илә јанашы, бир чох тәшкилат сәдрләри, иҹтимаи хадимләр, еләҹә дә зијалылар иштирак едибләр. Күтләви Информасија Васитәләри нүмајәндәләринин дә јер алдығы тәдбир Гуранын тилавәт олунмасы илә башлајыб.
Даһа сонра тәгдимат мәрасимини ачыг елан едән иҹтимаи бирлијин сәдри Елчин Манафов јени јарадылан гурумун фәалијјәт истигамәтләри вә мәрамнамәси һагда мәлумат вериб. Сәдр вурғулајыб ки, тәшкилатын јарадылмасында әсас мәгсәд ҹәмијјәти мүхтәлиф саһәләр үзрә маарифләндирмәкдән ибарәтдир. Чүнки маарифләнмиш ҹәмијјәт бәшәријјәтин, о ҹүмләдән дә өлкәнин инкишафында әвәзедилмәз рол ојнајыр.
Елчин Манафовун чыхышы јекунлашдыгдан сонра тәдбирдә “Азәрбајҹан Зијалы Һәрәкатынын” сәдри Елдәниз Гулијев, Нардаран ағсаггалы Натиг Кәримов вә диҝәр гонаглар сөз алыблар. Чыхыш едәнләр Азәрбајҹан ҹәмијјәтинин маарифләнмә, савадланма, мәлуматланма потенсиалынын артырылмасы вә хүсуси илә дә дүзҝүн истигамәтә апарылмасы үчүн “Маарифчилијә Дәвәт” Иҹтимаи Бирлијинин јарадылмасыны бөјүк төһфә кими дәјәрләндирибләр.
Чыхышлар јекунлашдыгдан сонра медиа нүмајәндәләринин үнванладығы суаллар ҹавабландырылыб. Тәшкилат сәдри тәкҹә Ислами мөвзуларда дејил, еләҹә дә диҝәр саһәләрдә семинарларын тәшкил олунаҹағыны, диҝәр тәшкилатларла гаршылыглы әлагәләрин јарадылаҹағыны, ләјагәтли, әхлаглы, вәтәнпәрвәр инсанларын јетишмәси үчүн әлләриндән ҝәләни едәҹәкләрини вурғулајыб. Тәдбир мараглы дисскусијаларла давам етдирилиб.
Диггәт: Хәбәрдән истифадә етдикдә мәнбәјә истинад лазымдыр
