Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Фазил Мустафанын Азәрбајҹандакы бир нөмрәли пешкә олмасы кимсәјә ҝизли дејилдир. Вахты илә, мүхтәлиф дөврләрдә АХҸ сәдринин мүшавири, сәдрин мүавини олмуш, 1992-1993-ҹү илләрдә Президент Апараты дөвләт-һүгуг шөбәсинин мүдири вәзифәсиндә ишләмиш, 1995-1998-ҹи илләрдә Түркијәдә Ә.Елчибәјин өзәл тәмсилчиси олмуш вә ејни заманда узун мүддәт өзүнү мүхалифәтчы кими гәләмә вериб заты билинмәјән әлијевләр сүлаләсинә гаршы амансызҹасына мүбаризә апаранлар сырасында олмаға ҹан атан бу “бәј” 2001-2003-ҹү илләрдә Азәрбајҹан Силаһлы Гүввәләриндә забит кими һәрби хидмәт кечәрәк, 2005-ҹи илдә Азәрбајҹан Республикасы Милли Мәҹлисинин депутаты сечилмәклә гәфил әлијевләр сүлаләсинин садиг пијадачысына чеврилди.
Ашағыда охујаҹағыныз мәгаләни Фазил Мустафа (Гәзәнфәроғлу) `ГӘЛБИ АЗӘРБАЈҸАНДАН ОЛМАЈАНЛАРА ТӨВСИЈӘ` башлығы илә "Јени Мүсават" гәзетинин 14 октјабр 2003-ҹү ил, №278(2205) -да чап етдириб:
Бу сечим башга сечим олаҹаг. Азәрбајҹанда президентин јенидән сечими бәлкә да ајсбергин ҝөрүнән тәрәфиди. Бу ҝүн Азәрбајҹан ајдынынын сечимиди. Бу ҝүн Азәрбајҹан үчүн мүттәфиг вә дүшмән дөвләтләрин сечимиди. Бу ҝүн Азәрбајҹанын ја бир милләт-ики дөвләт олмаг, ја да бир милләт-бир хараба-бир дөвләт олмаг сечимиди. Бу ҝүн сәнәтини гарын јалына булашдыранларла милләтин сәнәтчиләринин сечимиди. Бу ҝүн вәтән үчүн хидмәт истәјән саһибкарларла Аилә саһибкарларынын сечимиди. Бу ҝүн Шејхүлислам Аллаһшүкүр Пашазадәнин мәнәвијјаты илә мөмин мүсәлманларын мәнәвијјатынын сечимиди. Ким кимин јанында дураҹаг?
Бир јандан шејхүлислам өз тәблиғаты илә сүбут етмәјә чалышды ки, гумар ојнамаг вә әјјашлыг Гурана зәррә гәдәр дә зыдд дејил вә бу, елә мөминлик кими бир шеј сајылыр. Мәним чох һөрмәт етдијим Васым мүәллим дә тәгрибән ејни шеји тәсдигләди. Һәм дә Мирмөвсүм ағанын зијарәтҝаһында раһатҹа јалан данышмағы гәбаһәт сајмадылар. Онларын һәр икисинин бирҝә тәрҹүмә етдији Гуранда бујрулур ки, “Еј иман ҝәтирәнләр! Шәраб да, гумар да, бүтләр дә, фал охлары да шејтан әмәлиндән олан мурдар бир шејдир. Бунлардан чәкинин ки, бәлкә ниҹат тапасыныз”. Шејхүлисламла Васим мүәллим, еләҹә дә Аристотелдән сонра јетишмиш ән бөјүк бәшәр философу, тохумлуг үчүн бирҹә фәлсәфи ҹүмләсинә раст ҝәлмәдијим Фуад Гасымзадә дә һамынын һөрмәтлә јанашдығы бир зијарәтҝаһда милләти әмин етдиләр ки, артыг бу ниҹат тапылмышдыр вә Илһам Әлијев һәмин задды ки, вар. Онларын сөзләриндән анлашылан буду ки, гумар ҝөзәл әмәлди вә Азәрбајҹана башчыны мәһз бу кејфијјәтә ҝөрә сечмәлисиниз. Инди бир сүрү алим дејилән шәхсләр Маркса, Ленинә севҝиләрини изһар едәрәк јашадыгларына ҝөрә онларын шејтанла јахынлығыны баша дүшмәк олар. Бәс Гураны тәрҹүмә едәнләрин шејтана јахылығыны неҹә гијмәтләндирәк? Нәдир ахы инсанлары бу гәдәр һагдан дөндәрән? Һејдәр Әлијевин јалан данышдығыны билә-билә горхудан ону дәстәкләмәјиниз баша дүшүләндир. Үстәлик, јаныныза салыб Һәҹҹә апардыныз, о исә гајыдандан сонра бу милләтә даһа бғјүк ситәм тутмаға башлады. Демәли, бу адама Һәҹҹин дә фајдасы олмады. Анҹаг шејхин синәсинә дөјәрәк бәјан етмәси ки, о, өлкәнин ән мәнәвијјатлы адамы кими Илһама дәстәк верир, буна гәтијән ҝүлүб кечмәјин. Бу гәдәр нагис әмәлләрдән сонра онун шејхүлислам олараг галдығы бир мәмләкәтдә Илһам нијә президент олмаг истәмәсин?
Диҝәр јандан, һакимијјәт даирәләри күлли мигдарда пара хәрҹләјарәк нәјин баһасына олурса-олсун, сешкиләри сахталашдырмаг үчүн тотал аксијаја һазырлашырлар.Индидән горхудуҹу тәдбирләрдән дә сөз ачылыр. Анҹаг гујруглары гапы арасындады. Ким һакимијјәтдән ҝедәндә шәлә-шүләсини раһатҹа јығышдырыб ҝедир? Һәр һалда, сонунҹу ҹәһдләрини ҝөстәрмәлидиләр. Биз дә бир милләт олараг өз аддымларымызы атмалыјыг. Әслиндә мәшһур ләтифәдә олдуғу кими, әввәлҹә лотереја алмаг лазымды ки, сонра машын удмағы арзулајаг. Әввәл сечкини удмаг лазымды ки, сәсләрин горунмасы үчүн гәтијјәтли мүбаризәјә башлајаг.
Бу режимә диктатура дејиб бармагарасы бахмајын. Чох заман Һ.Әлијевин һәрәкәтләрини Әбу Ләһәблә, Әбу Ҹәһллә мүгајисә едәнләр јанылырлар. Инанын ки, онлар хејли инсафлы кишиләр олублар. Пејғәмбәримизә дејибләр ки, бир ил сән бизим динимизә ибадәт ет, бир ил дә биз сәнин. Бунлар исә дејирләр ки, 34 ил ата бүтүмүзә, 34 ил оғул бүтүмүз., 34 ил дә нәвә бүтүмүзә ибадәт един, һагга ибадәт дејилән шеј олмајаҹаг. Һејдәри һеч Сталинлә, Бағыровла да мүгајисә етмәк дүзҝүн олмаз. Бу адамлар һеч олмаса, өз аиләсини дөвләтин башына чыхармамышдылар. Сталин оғлуну һамы кими дөјүшә ҝөндәрмишди. Һ.Әлијевин өзүнүн әсҝәрликдән јајынмасы бир јана дурсун, тајфасындан бир нәфәр таныјырмысыныз ки, вәтән савашында дөјүшмәмәси ҹәһәннәм, һеч олмаса, дөјүшәнләрә чөрәк дашысын?
Гәрби Азәрбајҹан мәним үрәјимин ән ағрылы јериди. Дәрбәнд, Борчалы, Гарабағ кими. Ата бабам 1917-ҹи илдә ермәни зүлмүндән гуртулараг Нахчывана ҝәлиб. Ана бабам исә көклү-көмәҹли Нахчыванын мәшһур Неһрәм кәндиндәнди. Гәрби Азәрбајҹандан олан јүзләрлә гачгын дүшмүш гоһумларым вар. Бу сечкидә Иса Гәмбәри дәстәкләјирәм вә онун президент олмасы үчүн бүтүн имканларымла чалышырам. Лајиглик мејарына, милли-демократик дүнјаҝөрүшү даһа кејфијјәтли тәмсил етдијинә ҝөрә. Ахы илләр өнҹә бөјүк өндәримиз Әбүлфәз Елчибәји дә һәмјерли кими дәстәкләмишәм. Ән бөјүк ТҮРК кими, АЗӘРБАЈҸАНЛЫ кими, ШӘХСИЈЈӘТ кими ону лидер гәбул етмишик. Инди нә истәјирсиниз, мәнә субут един ки, Һ.Әлијев туркдү. Едә билмәзсиниз. Чүнки һакимијјәтә ҝәлән кими мәним дилимин адыны дәјишмәји онун түркә гаршы ҝенетик нифрәтиндән ирәли ҝәлирди. Инди мәнә сүбут един ки, Һ.Әлијев мүсәлманды. Мүсәлман олан бириси һәтта дүшмән кими гәбул етдији Ајаз Мүтәллибовун атасынын јасына ҝәлмәјинә шәраит јарадар, ҝери дөнәндән сонра дүшмәнчилијини давам етдирәрди.
Тез-тез индики игтидар нүмајәндәләри 1992-93-ҹү илләрә екскурс етмәји хошлајырлар. Әхлаг мөвзусунда да һәмин дөврләрә истинад етсәниз, хејли әхлаги мәзијјәтләр газанманыз мүмкүн ола биләрди. Президент Елчибәј Вәзирову Москвадан ҝәтирәрәк, анасыны јасында иштиракына һәр ҹүр шәраит јаратды, өзү дә шәхсән ҝедиб һүзрдә иштирак етди. Һ.Әлијевә сијаси рәгиб олмасына бахмајараг, гардашынын јасына ҝәлмәјә һәр ҹүр шәраит јаратды вә һөрмәтлә гәбул етди. Нијә әхлагла бағлы мәсәләләрдә мүгајисә апармагдан гачырсыныз? Инди бу мисаллардан сонра мәнә сүбут един ки, Һ.Әлијев инсанды. Бахын гул базарындакы үмидсиз инсанлара вә ејш-ишрәт ичиндә јашајан Әлијев тајафасыны дурумуна, сөјләјин ҝөрүм, инсан олан бу гәдәр сәрвәти өзү илә ҝора апара билмәјәҹәјини дүшүнмәзми? Инди сизләр һансы өлчүләрлә Һ.Әлијевин сијаси курсунун давамыны тәләб едирсиниз? Һ.Әлијев өз милләтинин дирчәлиши үчүн јашады, бунун сизә нә аидијјәти, ај Гәрби Азәрбајҹанын башбилән түркләри? Һеч олмаса, ичиниздән бир түрк шәхсијјәт тапыб дәстәк верә билмәзсинизми?
Мән әминәм ки, бир заман ҝәләҹәк, бу нанкор ермәниләр Ирәванда Сасунлу Давидин һејкәлини учуруб Һејдәр Әлијевә абидә уҹалдаҹаглар. Чүнки ермәнинин һеч бир милли гәһрәманы Ермәнистан үчүн бу гәдәр ҝениш әрази газандырмајыб. Буну етмәсәләр, һәгигәтән ермәниләр нанкор милләтди, гәдирбилмәз вә чөрәкитирәнди! Бунун әвәзинә мәним Гәрби Азәрбајҹандан олан, фәгәт гәлби Азәрбајҹанымдан олмајан зијалы баталјону (онларын сајы 112 олараг ҝөстәрилиб) чөрәклә бағлы өз мүлаһизәләрини ҹәмијјәтин диггәтинә чатдырдылар вә Һ.Әлијевин чөрәјини јемиш һәр кәси оғлунун да чөрәјинә ағыз суландырмаға чағырыдылар. Хүсусилә да чөрәклә бағлы Әһлиман Әмираслановун ирадлары даһа бөјүк олмалыды. Чүнки Елчибәј ону виҹданлы ышләмәк, тәһсилимизә хидмәт етмәк үчүн Тибб Университетинә ректор ҝәтирмишди. О исә ректорлуға чөрәк јемәк мәсәләси кими бахдығына ҝөрә Мисир Мәрдановла бирҝә тәһсил системимизә өлдүрүҹү зәрбәләр вурмагла зијалы адыны дашымаға нә гәдәр һаггы чатдығыны ҝөстәрди.
Инди дә гәзәбләнибләр ки, Гәрби Азәрбајҹандан олан инсанлар нијә Иса Гәмбәрә сәс вермәји дүшүнүрләр. Сәс вериб-вермәмәк онларын мүстәсна һүгугду вә демократик дүшүнҹә саһиби олан кимсәләр баша дүшүрләр ки, башгасынын да сечиминә һөрмәтлә јанашмаг лазымды. Јахшы ки, өзләри дә гејд едирләр ки, садә гәрби азәрбајҹанлылар кимин ким олдуғуну јахшы дәрк едирләр. Нә јазыг ки, адынын өнүндә “ф.е.д.”, “п.е.д.”, “т.е.д.”. “һ.е.д.”, “академик”, “профессор” олан бир сыра мүрәккәб гәрби азәрбајҹанлылар он илдир сүрән Һ.Әлијев зүлмүнүн давам етмәсини истәјирләр вә өз мәнфәәтләриндән савајы башга бир шеј дүшүнмүрләр. Чүнки өзләри тутдиғу вәзифәләрин ләззәтини дүшүнәрәк, өзләри үчүн хырда објект-вәтәнләр дүзәлдиб раһат јашајырлар. Биринин вәтәни Тибб Университети, диҝәрининки Бакы Дөвләт Университети, о бирининки педагожи вә ја өзәл университетдир, һансынынса тибб мүәссисәси, ЈАП вә с.-дир. О садә дедикләри Гәрби Азәрбајҹан туркләриди Ҝөјчәни, Ведини, Гаракилсәни, Зәнҝәзуру, Басаркешәри вә бүтөвлүкдә Азәрбајҹаны вәтән һесаб едән. Ермәнини орадан говмаг истәјән, ора дөнмәк истәјәнләрди. О садә дедикләри гәрби азәрбајҹанлылар гәлби Азәрбајҹандан олан инсанларды.
Бәзи мүрәккәб гәрби азәрбајҹанләлар, нахчыванлылар, гарабағлылар һеч бир просесә үмуммилли тәфккүрдән јанаша билмирләр. Дөнә-дөнә демишик ки, өз бөлҝәләринин, тајфаларынын бөјүк адамы олмагдан Азәрбајҹанын бөјүк адамы олмаға доғру уҹала билмәјәнләр өзләри үчүн бөјүклүк еталонуну әввәлҹә Һејдәрдә, сонра исә Илһамда ҝөрүрләр. Онларын Һ.Әлијевә мүнасибәтини анламаг олар. Ҝүнү бу ҝүн онун өлүсүндән дә горхурлар вә торпаға верилмәјинҹә дириләҹәјинә инанмагдадылар. Әҝәр өлкәнин 112 профессору Илһам Әлијеви өзләриндән ағыллы һесаб едирсә, әҝәр Гафгаз мүсәлманларынын өмүрлүк шејхүлисламы Пашазадәнин, Азәрбајҹан јазарларынын өмүрлүк шејхүлисламы Анарын, Азәрбајҹан рәссамларынын, бәстәчиләринин вә онларын тимсалында бүтүн ади азәрбајҹанлыларын шејхүлисламлары өз дөвләти үчүн Илһам Әлијеви алтернативсиз лидер ҝөрүрләрсә, Азәрбајҹанда дин, елм, сәнәт, әдәбијјат дејилән саһәләрин дурумунун чох-чох аҹынаҹаглы олдуғу ҝөз габағындадыр. Демәјин ки, онларын чохуну тутдуғу вәзифәјә ҝөрә мәҹбур едибләр. О имза атанларын ичиндә мәним таныдығым Мәммәдәли Зејналов образы вар һа, о, һәлә инҹик галар ки, нијә она ики дәфә имза атдырмајыблар. 80 јашында ЈАП-а дахил олубса, демәли, ҝәләҹәји парлаг олан адамды, фәлсәфи билији дә ҝуну-ҝундән артмагдады. Бир нечә имза саһиби истисна олмагла, галанлары Мәммәдәлидән ҝери галанлар дејил.
Бунҹа фаҹиәләри јашамағымызын сәбәбини ики шејдә ахтармаг лазым ҝәлир: әдаләт вә дөвләтчилик һиссләринин зәиф олмасында. Инди анлајырсынызмы нәдән Азәрбајҹан ханлыглары зәиф олуб, бирләшә билмәјиб? Мәсәлән, Ибраһим хан Һүсејнгулу хана дејиб ки, ҝәл Фәтәли ханын лидерлијини дәстәкләјәк, о, даһа бөјүк нүфуза саһибди вә өлкәни бирләшдирә биләр, Һүсејнгулу хан да дејиб ки, о губалы, мән бакылы, сән дә гарабағлы, биз ону неҹә дәстәкләјә биләрик? Русија империја олуб, анҹаг рус алиминин әдаләт вә дөвләтчилик һисси Сталин репрессијасы дөврүндә дә галыб. Рус академикләри Хрушшовун академик сечилмәсинә сәс вермәјәндә, Сахаровун академиклијини әлиндән алмагла разылашмајанда дүшүнмүрсүнүз ки, о заман да КГБ варды? Индики Азәрбајҹанда Һејдәр Әлијев адланан КГБ јохду вә олмајаҹаг, нәјин горхусуну јашајырсыныз? Инди фүрсәт верин шәрги нахчыванлылар, шимали загаталылар, ҹәнуби ләнкәранлылар да бирҹә-бирҹә өз сөзләрини данышсынлар.
Бу мүрәккәб нахчыванлылар да Нахчываны Азәрбајҹандан даһа бөјүк ҝөстәрмәк үчүн ҝөтүрүб јекә бир енсиклопедија бурахыблар. Он илдир мүстәгил Азәрбајҹан үчүн енсиклопедија бураха билмирләр, амма Нахчывана һәср олунмуш ҝениш бир китаб әрсәјә ҝәтирирләр. Ким нә гәдәр пул верибсә, она пулун мигдарына ҝөрә сәһифә ајырыблар. Дејәсән, бирҹә Мирзә Ҹәлилдән вә Ҹавиддән пул алмајыблар. Новелла ханымы да Нахчыван һава лиманында она ҝөрә дөјүрмүшләр ки, пул вер, сәнин дә адыны енсиклопедијаја салаг. Бунун ардынҹа ҹәнуби ләнкәранлылар да тәләб едәҹәкләр ки, мәһз портағала јох, лимона милли мејвә статусу верилсин. Валлаһ, ахмағын гәрблиси, шәрглиси, шималлысы, ҹәнублусу, нахчыванлысы, гарабағлысы, гәрби азәрбајҹанлысы олмур. Вә һәтта ахмағын зијалысы да олмур. Ахмаг, садәҹә, зијасыз олур. Ҝәлин зијалы вә ајдын сөзләринин тәрифи үзәриндә бир дә ҹидди дүшүнәк. Бунун тәрифини тапа билмәсәк, ким Али Аттестасија Комиссијасындан бир елми рүтбә алаҹагса, адынын габағына бир зијалы сөзүнү дә әлавә едиб, һај-һәшир салаҹаг.
“От көкү үстә битәр” дејиб, бир мисал да чәкирләр. Илһам да Һејдәрин көкү үстүндә битиб. Елә өтән ҝүн телеканалларын бириндә чыхыш едәркән бахдым ки, елә Вагиф Сәмәдоғлуда Сәмәд Вурғунун көкү үстүндә битибмиш. Бу, әслиндә иши асанлашдыран бир шејдир. Көкүнә бахыб ота гијмәт вермәк олур. Анҹаг бу ҹәмијјәтдә чохлары өз атасынын дејил, Һ.Әлијевин көкү үстүндә битмиш отларды. Пајыз ҝәлиб вә бу көк гурујуб. Инди бунлар Илһам Әлијевин көкү үстүндә битмәк истәјирләр. Әксәријјәти дә саралмыш отларды. Гысаҹа белә дејилсә јахшыдыр: һансы вәзифә, мөвге тутурсан-тут, һансы титул дашыјырсан-дашы, анҹаг адам ҝәрәк киши олсун, от олмасын. От олмағы идеала чевирәнләр, һеч олмазса, өз аталарынын көкү үстүндә битсинләр.
Аллаһшүкүрүн әмәлләри һамыны Гуранла зарафат етмәк һәддинә ҝәтириб чыхарды. Өтән ҝүнләрдә мүхалифәтин танынмыш сималарындан бири дүз он дәгигә әлини Гуранын үстүнә гојуб телевизијада чыхыш етди ки, бири ган төкүб һакимијјәтдә галмаг, диҝәри гисас алмаг үчүн һакимијјәтә ҝәлмәк истәјир. Бәлкә дә әлини үстүнә гојдуғунуз Гуранын ичинин мәнасына өнҹә диггәт јүтириләндән сонра бу тактикадан истифадә етмәјә нормал бахмаг оларды. “Әл-Һуҹурат”(Отаглар) сурәсинин 12-ҹи ајәсиндә дејилир ки, “Еј иман ҝәтирәнләр! Чох зәннә-ҝүмана гапылмагдан чәкинин. Шүбһәсиз ки, зәннин бәзиси (һеч бир әсасы олмајан зәнн) ҝүнаһдыр.” Чыхышда гејд олунан биринҹини 1993 вә 1995-ҹи илдә ҝөрмүшүк. Һ.Әлијев онларла инсанын ганы баһасына һакимијјәти әлдә сахлады. Јәни онун һәрәкәтләри барәдә данышмаг зәнн дејил. Бәс нәзәрдә тутулан икинҹиси? Мүхалифәт лидерләринин үздә оланларындан киминсә гисас алмаг үчүн һакимијјәтә ҝәлмәси барадә фикир сөјләмәк ачыг бир зәнндир, ҝүмандыр. Онун гәлбиними охујуб бу зәннә дүшүлүб? О вәдә Гурана әл басмадан буну сөјләмәк даһа тәһлүкәсиз бир иш оларды. Гуранын тәләбинә әһәмијјәт вермәдән она иснад етмәјин ады нә?
Һәзрәти Әли дә “Нәһ-ҹүл-Бәлағә”дә јазыр ки, “Ешитдим, дујдум батилдир, ҝөрдүм һагдыр”. Әҝәр ешитмәк вә дујмагла мүәјјән етмишләр ки, мәсәлән, Иса Гәмбәр гисас алмаға ҝәлир, о вәдә јенә дә ҝөрмәдијинә ҝөрә буну һагг кими сырымаг олмаз. Гуранын тәләбләринә өз һәјатында әмәл етмәјән инсанларын дар мәгамда Гурана истинад етмәси хош гаршыланасы бир шеј дејил. Ән азы Һ.Әлијевин Гурана әл басдыгдан сонра төрәтдији әмәлләрин агибәтинә ҝөрә неҹә әзаб-әзијјәтлә өлүм просеси кечирдији һамыја ибрәт олмалыдыр.
Билдијим оду ки, бу дава МАП (Милли Азәрбајҹан Партијасы) илә ЈАП (Језиди Азәрбајҹан Партијасы) арасында ҝедән вә јекунлашмагда олан сон давадыр. Әлбәттә, бунлар рәмзләрдир. Ҝерчәкдә Милли Азәрбајҹан Партијасы галиб ҝәлмәлидир. Азәрбајҹан түркләри өз дөвләтинә саһиб олмалыдыр. Бу ҝедишат јени гурулушда, јени дәјәрдә милли бир Азәрбајҹан дөвләтини мејдана чыхараҹаг. О заман милләт дә, вәтән дә президентдән чох-чох уҹа дәјәрләр олаҹаг. Һәләликсә ән уҹа дәјәр демократик вә әдаләтли президентдир. Милләти, вәтәни ән уҹа дәјәрә чевирмәк истәјәнләр илк өнҹә бу президенти сечмәлидирләр...
Диггәт: Хәбәрдән истифадә етдикдә мәнбәјә истинад лазымдыр
