Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Милли Тәһлүкәсизлик Назирлијинин (МТН) анти-террор әмәлијјаты нәтиҹәсиндә Азәрбајҹан Республикасынын Сурија вә Ирагда ҝедән террор актларында иштирак етмиш 5 вәтәндашы тутулуб.
Фактларла бағлы Милли Тәһлүкәсизлик Назирлији Истинтаг Баш Идарәси тәрәфиндән АР Ҹинајәт Мәҹәлләсинин 12.1, 279.1-ҹи вә 283-1.3-ҹү маддәләри илә ҹинајәт ишләри башланылыб.
Һејдәров Заур Наиб оғлу, Әзизов Елбрус Нурмәммәд оғлу, Талыбов Вагиф Муса оғлу, Ағҹабәјов Руфан Шәрәфәддин оғлу вә Исмајылов Елшән Ајдын оғлу тәгсирләндирилән шәхс гисминдә ҹәлб олунараг мәһкәмәнин гәрарлары илә барәләриндә һәбс гәтимкан тәдбирләри сечилиб.
Мүәјјән едилиб ки, Заур Һејдәров, Елбрус Әзизов, Вагиф Талыбов, Руфан Ағҹабәјов вә Елшән Исмајылов 2013-2015-ҹи илләр әрзиндә мүхтәлиф вахтларда Сурија Әрәб Республикасынын вә Ираг Республикасынын әразисиндә һәмин дөвләтләрин, һабелә Азәрбајҹан Республикасынын ганунвериҹилији илә нәзәрдә тутулмајан ајры-ајры силаһлы бирләшмәләрин, о ҹүмләдән “Ислам Дөвләти (ИШИД)”, “Ҹәбһәтүл-Нусра” вә “Ҹунду Шам” террорчу тәшкилатларынын фәалијјәтиндә иштирак едибләр.
Ҹинајәт ишләри үзрә бүтүн һалларын арашдырылмасы, бу һүгугазидд әмәлләрин диҝәр иштиракчыларынын мүәјјәнләшдирилмәси истигамәтиндә истинтаг-әмәлијјат тәдбирләри давам етдирилир.
Диггәт: Хәбәрдән истифадә етдикдә мәнбәјә истинад лазымдыр
