Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, ШӘРЛӘНӘРӘк 12 ил азадлыгдан мәһрум едилмиш Азәрбајҹан Ислам Партијасынын Лидери Мөвсүм Сәмәдовун карса салынма сәбәби мәлум олуб.
Мәлумата ҝөрә, Мөвсүм Сәмәдовун карса салынмасына сәбәб онун һәбсхана рәһбәрлијиндән өзү дә дахил олмагла, оруҹ тутан бүтүн мәһбуслара ујғун шәраитин јарадылмасы истәјидир. Мөвсүм Сәмәдов бу истәјинә ҹаваб олараг ҹәзаландырылыб.
Азәрбајҹан Ислам Партијасынын сәдр әвәзи Елчин Манафлы билдириб ки, Мөвсүм Сәмәдов әтрафында баш верәнләр үзүҹүдүр. Онун сөзләринә ҝөрә, һәбсханада Һаҹы Мөвсүмүн карса салынмасынын сәбәби барәдә јетәрли, дәгиг мәлумат әлдә етмәк һәлә ки, мүмкүн олмајыб: “Мөвсүм Сәмәдовун карса салынмасы, үмумиликдә баш верәнләр һагда вәкилә мүраҹиәт етмишик. Јахын мүддәтдә дәгиг мәлумат әлдә едәҹәјимизә үмид едирәм. Һәбсхана рәһбәрлијинин оруҹлуг әрәфәсиндә белә бир аддым атмасы инаныласы дејил. Чүнки һәр һалда, онлар да мүсәлмандылар вә бу ҹүр давранышлар гәбуледилмәздир. Һаҹы Мөвсүмүн мәһбәсдә истәји бөјүк бир шеј дејил. О јалныз ибадәтлә мәшғул олмасы үчүн шәраит јарадылмасыны истәјир”.
Милли Шуранын Координасија Мәркәзинин үзвү, “Гарабағ Уғрунда Ислами Мүгавимәт” Һәрәкатынын рәһбәри Рөвшән Әһмәдли мәсәләјә мүнасибәт билдирәркән дејиб ки, мәһбуслара гаршы нәинки мүбарәк Рамазан ајында, үмумијјәтлә, бүтүн заманларда һагсызлыг етмәк јолверилмәздир: “Мөвсүм Сәмәдов тәкҹә руһани дејил, ејни заманда бөјүк бир партијанын рәһбәридир. О, апардығы сијаси мүбаризәсинә ҝөрә бу ҝүн сијаси мәһбус һәјаты јашајыр”.
Авропа Ојунларына “ев саһиблији” етмәклә дүнјада мөһтәшәм бир тәдбир кечирдијини дејиб өјүнән өлкәдә сијаси мәһбусларын олмасы, ејни заманда, бу мәһбусларын зинданда белә, һаггыны тәләб етдији үчүн ҹәзаландырылмасына диггәт чәкән Рөвшән Әһмәдли ону да гејд едиб ки, бу сијасәт һакимијјәтин сахта авропалы имиҹинә бөјүк зәрбә вурур: “Вәтәндашын азадлыгдан мәһрум едилмәси онун тәкҹә азадлыг һүгугуну әлиндән алыр. Мәһбус диҝәр һүгуглары өзүндә сахлајыр. Һесаб едирәм ки, һаҹы Мөвсүм Сәмәдов һеч бир һалда, онун карса салынмасы илә нәтиҹәләнәҹәк гануназидд бир тәләб ирәли сүрмәз”.
Хатырладаг ки, АИП сәдри Доктор Мөвсүм Сәмәдов 02, 01, 2011 тарихдә етдији тарихи чыхышындан сонра, мөвҹуд режим тәрәфиндән сахта вә ҝүлүнҹ иттиһамларла ШӘРЛӘНӘРӘК 12 ил мүддәтинә азадлыгдан мәһрум олунуб. Һазырда Гобустанда гапалы типли һәбсханада сахланылыр.
Диггәт: Хәбәрдән истифадә етдикдә мәнбәјә истинад лазымдыр
