Әһли Бејт (әлејһимус сәлам) -АБНА- Хәбәр Аҝентлији- Шабан ајынын ахрынҹы ҝүнләриндә Ислам Пејғәмбәри (сәлләллаһу әлејһи вә алиһ) ҹамаат үчүн хүтбә охујараг, Мүбарәк Рамазан ајынын фәзиләт вә дәјәрләри һагда ачыгламалар верди. Һәзрәти Рәсуләллаһ (сәлләллаһу әлејһи вә алиһ) бу хүтбәдә бүтүн тарих боју һәгиги Мүсәлман вә Мөмүн бир шәхсләрин вәзифәләрини изаһ вериб. Шүбһәсиз әзиз Ислам Пејғәмбәринин (сәлләллаһу әлејһи вә алиһ) бујурдуглары бу төвсијәләр Рамазан ајы бојунҹа гәлбләрини кин-күдрәтдән тәмизләјиб, руһ вә ҹанларыны ҝүнаһдан сафлашдыранлар үчүн бир Илаһи иксирдир. Вә бу хүтбә Мөмүн бир шәхсин ләјагәт тапараг Илһаи Зијафәтә дәвәт олунмасында бөјүк рол ојнуја биләр...
Шәбанијјә Хүтбәсинин Тәрҹумәси:
Бөјүк Ислам Алими Шејх Сәдуг (Аллаһ рәһмәт етсин) белә нәгл едир: Муһәммәд ибн Букранул Нәггаш “Әһмәд ибнил Һәсәнил Гәтан вә Муһәммәд ибн Әһмәд ибн Ибраһимәл Мәази вә Муһәммәд ибн Ибраһим Исһагәл Мәктәби”дән онларын һамысы Әһмәд ибн Муһәммәд ибн Сәиддән о да, Әли ибн Һусејн ибни Фәзалдан, о да, атасындан, о да, Имам Рзадан (әлејһи сәлам), Имам Рза (әлејһи сәлам) да, аталарындан (әлејһим сәлам), онлар да, һәзрәти Әмирул Мөминин Әлидән (әлејһи сәлам) белә нәгл едирләр ки, бир ҝүн Пејғәмбәр (сәлләллаһу әлејһи вә алиһ) бизә хүтбә охујараг бујурду:
“Еј инсанлар! Аллаһын (Рамазан) ајы бәрәкәт, рәһмәт вә бағышланма илә бирҝә сизә доғру ҝәлмишдир. Бу ај Аллаһ јанында ајларын ән јахшысыдыр. Бу ајын ҝүнләри ән дәјәрли ҝүнләр, ҝеҹәләри ән ҝөзәл ҝеҹәләр, саат вә анлары ән үстүн саат вә анлардыр.
Бу ајда сиз Аллаһын зијафәтинә дәвәт олундуз. Бу ајда Аллаһ сизи өз кәрамәт әһлиндән гәрар верди. Бу ајда сизин нәфәсләриниз зикр, јатмағыныз ибадәт, әмәлләриниз гәбул вә дуаларыныз гәбул олунмушдур.
Белә олан һалда халис нијјәт вә тәмиз гәлблә Аллаһдан сизә бу ајда оруҹ тутмағыныза вә Гуран охумағыныза көмәк етмәсини диләјин. Чүнки доғрудан да, бу әзәмәтли ајда Илаһи рәһмәтиндән мәһрум олан шәхс бәдбәхтдир.
Рамазан ајында аҹ-сусуз галараг, Гијамәт ҝүнүнүн аҹлыг вә сусузлуғуну јада салын.
Араныздакы еһтијаҹлы вә јохсул инсанлара әл тутун! Бөјүкләринизлә һөрмәтлә давранын. Ушагларыныза нәвазиш ҝөстәрин. Јахынларыныза баш чәкин вә онлара јардым един. Дилинизи писликләрдән горујун. Ҝөзләринизи һарам бахышлардан сахлајын. Гулагларыныза һарам ешытдирмәјин. Ҹамаатын јетим ушагларына меһрибанлыг един ки, сизин јетимләринизлә дә меһрибан олсунлар.
Ҝүнаһларынызын бағышланмасы үчүн Танры дәрҝаһына үз ҝәтириб, төвбә един. Һәр намаз вахты әлләринизи Онун гаршысында аҹиз гул кими ачараг, дуа един. Чүнки, бу ајын саатлары ән фәзиләтли вахтлардыр. Аллаһ-Тәала бу вахт өз бәндәләринә рәһмәт вә мәрһәмәтлә бахар. Бәндәсинин истәк вә хаһишләрини ешидәр. Чағырышларына ҹаваб верәр. Дуаларыны гәбул едәр.
Еј ҹамаат! Нәфсләриниз әмәлләринизин ҝирдабындадыр. Аллаһдан бағышланманызы истәмәклә онлары азад един. Белләриниз ҝүнаһларынызын ағырлығы сајәсиндә әјилмишдир. Узун сәҹдәләрлә онларын ағырлығыны азалдын. Билин ки, Уҹа Јарадан намаз гыланлары, сәҹдә едәнләри әзаба дүчар етмәјәҹәјинә вә онлары Гијамәт ҝүнү инсанларын һесаб вердији заман Ҹәһәннәм әзабы илә горхутмајаҹағына сөз вермишдир.
Еј ҹамаат! Һәр кәс бу ајда оруҹ тутан бир мөминә ифтар сүфрәси ачарса, Танры дәрҝаһында бир гулу азад етмәк гәдәр дәјәри, савабы вардыр. Вә бу иш онун кечмиш ҝүнаһларынын бағышланмасына сәбәб олар.”
Бу заман бир нәфәр сорушду: “Еј Аллаһын Рәсулу (с)! Бизим һамимизын имканы јохдур ки, кимисә гонаг етсин. Нә едәк?”
Пејғәмбәр (сәлләллаһу әлејһи вә алиһ) бујурду:
“Јары хурма дәнәсини сәдәгә вермәклә дә, олса Ҹәһәннәм атәшиндән горунун. Бир гуртум су еһсан етмәклә дә, олса Ҹәһәннәм одундан гуртулун.
Еј инсанлар! Һәр кәс бу ајда өз әхлагыны, рәфтарыны ҝөзәлләшдирсә, ајагларын Сират көрпүсүндә вәһшәтдән титрәдији ан, она бу көрпүдән горхусуз олараг кечмәјә иҹазә вериләр. Һәр ким бу ајда өз гулларынын зәһмәтини азалда, Аллаһ-Тәала Гијамәтдә онун ишини асанлашдырар.
Һәр ким бу ајда инсанлара зәһмәт, әзијјәт вермәји азалда, Уҹа Аллаһ о бири дүнјада она гаршы гәзәбини азалдар. Һәр кәс бу ајда бир јетими әзизләјә, Аллаһ Ахирәтдә ону әзизләјәҹәкдир. Һәр ким бу ајда өз јахынларынын зијарәтинә ҝедә, Бөјүк Аллаһ Гијамәтдә она рәһм едәҹәкдир. Ким бу ајда гоһумлары илә әлагәни кәсәрсә, Гадир Аллаһ о бири дүнјада она рәһм етмәјәҹәкдир.
Ким бу ајда мүстәһәб намаз гыларса, Танры она ҹәһәннәм одундан бәраәт верәр. Ким бу ајда ваҹиб намаз гыларса, башга ајларда гылынан јетмиш намаза бәрабәрдир. Ким бу ајда мәнә чох салават ҝөндәрәрсә, Аллаһ Гијамәт ҝүнү әмәл тәрәзиси јүнҝүл ҝәләндә, ону ағырлашдырар. Һәр кәс бу ајда Гурани-Кәримдән бир ајә охујарса, о бири ајларда бүтүнлүклә охунмуш Гурана бәрабәрдир.
Еј инсанлар! Бу ајда Беһиштин гапылары ачыгдыр. Аллаһдан истәјин ки, бу гапылары сизин үзүнүзә бағламасын! Вә һәмчинин Ҹәһәннәмин гапылары да, бу ајда бағлыдыр. Аллаһа јалварын ки, онун гапыларыны сизин үзүнүзә ачмасын. Бу ајда шејтан (Аллаһ она ләнәт етсин) зәнҹирләнмишдир. Аллаһдан истәјин ки, ону сизә һаким етмәсин”.
Бу заман Һәзрәт Әли (әлејһи сәлам) сорушду: “Еј Аллаһын Рәсулу (сәлләллаһу әлејһи вә алиһ)! Бу ајда ән үстүн әмәлләр һансылардыр?”
Ислам Пејғәмбәр (сәлләллаһу әлејһи вә алиһ) бујурду:”Еј Һәсәнин атасы! Аллаһын һарам бујурдуғу ишләрдән гачмаг бу ајда ән үстүн әмәлдир.”
Елә бу вахт Пејғәмбәр(сәлләллаһу әлејһи вә алиһ) ағлады.
Имам Әли (әлејһи сәлам) сорушду: “Еј Аллаһын Рәсулу (сәлләллаһу әлејһи вә алиһ)! Нијә ағлајырсыз?”
Һәзрәти Рәсулләллаһ (сәлләллаһу әлејһи вә алиһ) бујурду: “Ја Әли (әлејһи сәлам)! Мән она ҝөрә ағлајырам ки, бу ајда сәнә гаршы һөрмәтсизлик едәҹәкләр. Санки сәни намаз гылан һалда ҝөрүрәм, амма индијәдәк ҝәлиб-ҝетмиш олан ән бәдбәхт, ән намәрд шәхс сәнә елә бир гылынҹ зәрбәси вураҹаг ки, саггалын ал-гана бојанаҹагдыр”.
Мөмүнләрин Әмири һәзрәти Әли (әлејһи сәлам) сорушду: “Еј Аллаһын Рәсулу (сәлләллаһу әлејһи вә алиһ)! Бу һадисә мәним динә садиг галдығым һалдамы баш верәҹәкдир?”
Пејғәмбәр (сәлләллаһу әлејһи вә алиһ) бујурду: “Бәли, еләдир.” Сонра исә әлавә етди: “Ја Әли (әлејһи сәлам)! Сәнин ҹанына гәсд едән мәним ҹаныма гәсд етмишдир. Сәни гәзәбләндирән мәни гәзәбләндирмишдир. Сәнә сөјүш вериб тәһгир едән мәнә сөјүш вериб тәһгир етмишдир. Чүнки мәнимлә сәнин аранда һеч бир фәрг јохдур. Сәнин руһун, мәним руһумдандыр. Сәнин тинәт вә хилгәтин мәним тинәт вә хилгәтимдир.
Уҹа Аллаһ мәни вә сәни јаратды, мәни вә сәни (бүтүн инсанларын арасындан) сечди. Мәни пејғәмбәр, сәни исә, Имам гәрар верди. Сәнин Имам олмағыны рәд едән шәхс, мәним Пејғәмбәрлијими рәд етмишдир. Ја Әли (әлејһи сәлам)! Сән истәр мән һәјатдајкән, истәрсә дә вәфат етдикдән сонра мәним вәсијјим, өвладларымын атасы, гызымын севимли һәјат јолдашы вә Үммәтим үзәриндә хәлифәмсән. Бүтүн әмрләрин, мәним әмрим вә етдијин гадағалар да, мәним гадағам сајылыр. Мәни Пејғәмбәрлијә сечән вә ән јахшы мәхлуг гәрар верән Аллаһа анд олсун ки, Сән Аллаһын бәндәләринә олан һөҹҹәт вә имамы, Онун ҝизли вә сирли ишләринин етибарлы шаһиди вә Танрынын јер үзүндәки хәлифәсисән!”
(Мәнбә: Шејх Сәдуг. Ујуну Әхбари Рза (әлејһи сәлам), ҹ. 1, сәһ. 230 вә Шејх Бәһаини Әрбәин китабы сәһ. 162)
Диггәт: Хәбәрдән истифадә етдикдә мәнбәјә истинад лазымдыр
