Әһли-Бејт (әлејһимус сәлам) – Бејнәлхалг Хәбәр Аҝентлији- АБНА: Кәшмир бөлҝәсиндә Һиндистан вә Пакистан арасында јени һәрби ҝәрҝинлик јараныб. Пакистан ордусунун сөзчүсү Һиндистанын Пакистан әразиси дахилиндә үч мөвгени ракетләрлә һәдәфә алдығыны ачыглајыб.
Пакистан медиасы Һиндистан ракетинин Пакистанын Кәшмириндәки көһнә Мүзәффәрабад һава лиманыны һәдәф алдығыны вә әразидә чохсајлы партлајыш сәсләринин ешидилдијини билдириб.
Бунун әксинә олараг, Һиндистан ордусу “Х” сосиал шәбәкәсиндәки месажында Пакистан торпагларында террорчуларын дүшәрҝәләринә дәгиг зәрбәләр ендирдијини иддиа едиб.
Һиндистан һөкумәти һәмчинин әмәлијјатын Пакистан вә Ҹамму вә Кәшмир бөлҝәсиндә террор инфраструктуруну мәһв етмәк мәгсәди дашыдығыны вә бу мүддәт әрзиндә 9 мөвгејә һүҹум едилдијини ачыглајыб.
Бунунла белә, Јени Деһли һөкумәти бу әмәлијјатларын һесабланмыш олдуғуну вә ҝәрҝинлијин артмасы демәк олмадығыны вурғулајыб. Һиндистан һөкумәти һәмчинин Пакистанын һеч бир һәрби објектинә һүҹум едилмәдијини иддиа едиб.
Бу арада Пакистан мәнбәләри Һиндистанын Пәнҹаб бөлҝәсинә һүҹумлары заманы азы бир ушағын өлдүјүнү, икисинин исә јараландығыны ачыглајыб.
Пакистан полиси һәмчинин Һиндистан Кәшмиринин ики сәрһәд бөлҝәсиндә ҝүҹлү партлајышлар олдуғуну билдириб.
Бу һадисәләрдән сонра Пакистан Бејнәлхалг Һава Јоллары давам едән учушларын Кәрачијә јөнләндирилдијини вә диҝәр учушларын тәхирә салындығыны ачыглады.
Диҝәр тәрәфдән, Пакистан дөвләт телевизијасы өлкәнин һәрби һава гүввәләринин Һиндистанын ики Рафале дөјүш тәјјарәсини вурдуғуну билдириб.
Пакистанын баш назири һәмчинин вурғулајыб ки, онун өлкәси Һиндистанын истәнилән һәрби тәҹавүзүнә гәти шәкилдә ҹаваб вермәк һүгугуну өзүндә сахлајыр.
Пакистан Хариҹи Ишләр Назирлији дә бәјанат јајараг, Һиндистанын өз һава мәканындан узагмәнзилли силаһлардан истифадә етмәсини Пакистанын суверенлијинин ачыг шәкилдә позулмасы вә бејнәлхалг һүгугун ҹидди шәкилдә позулмасы адландырыб вә Исламабадын бу һәрәкәти гәти шәкилдә писләдијини вә лазыми ҹаваб вермәк һүгугуну өзүндә сахладығыны ачыглајыб.
Sizin rəyiniz