Иран Ислам Республикасы президенти Сејид Ибраһим Рәиси вә Беларус Республикасы президенти Александр Лукашенко базар ертәси Теһранда ики өлкә арасында һәртәрәфли әмәкдашлыг үчүн јол хәритәси имзалајыблар.
Һәмчинин Рәиси вә Лукашенконун иштиракы илә Иран вә Беларусун јүксәк сәвијјәли рәсмиләри ики өлкә арасында мүхтәлиф тиҹарәт, нәглијјат, кәнд тәсәррүфаты, мәдәнијјәт вә инҹәсәнәт, еләҹә дә мәһкумларын екстрадисијасы саһәләриндә әмәкдашлыг сәнәдләри вә ики өлкә арасында әлагәләрин гурулмасынын 30-ҹу илдөнүмү мүнасибәтилә иҹра програмы сәнәди имзалајыблар.
Бу сәнәдләр Иранын хариҹи ишләр, сәнаје, мәдән вә тиҹарәт, кәнд тәсәррүфаты, јол вә шәһәрсалма вә әдлијјә назирләри илә беларуслу һәмкарлары арасында имзаланыб.
Гејд едәк ки, Иран Ислам Республикасы президенти Сејид Ибраһим Рәиси базар ертәси сәһәр рәсми тәмаслар үчүн Теһрана ҝәлән Беларус Республикасынын президенти Александр Лукашенкону рәсми шәкилдә гаршылајыб.
Лукашенко јүксәк сәвијјәли нүмајәндә һејәтинә рәһбәрлик едәрәк базар ҝүнү ахшам Теһрана ҝәлиб.
Меһрабад һава лиманына чатан кими ону Иранын сәнаје, мәдән вә тиҹарәт назири Сејид Рза Фатеми Әмин гаршылајыб.
Бу, Лукашенконун Ирана үчүнҹү сәфәридир. Онун әввәлки сәфәри 2006-ҹы илдә баш тутуб. Ики президент 2022-ҹи илин сентјабрында Сәмәргәнддә Шанхај Әмәкдашлыг Тәшкилатынын (ШӘТ) саммити чәрчивәсиндә ҝөрүшүбләр.
Лукашенко Теһранда оларкән Иранын Алимәгамлы Рәһбәри Ајәтуллаһүл-үзма Хаменеи вә бир сыра јүксәк сәвијјәли һөкумәт рәсмиләри вә ганунвериҹиләрлә дә ҝөрүшәҹәк. Тиҹарәт вә игтисади әмәкдашлығын Лукашенконун данышыгларынын ҝүндәминдә олаҹағы ҝөзләнилир.
342/
