Февралын 6-да Түркијәдә баш верән зәлзәлә өлкәнин 10 вилајәтиндә бөјүк дағынтылар төрәдиб. Бејнәлхалг медианын билдирдијинә ҝөрә, зәлзәлә әразиләриндә топлам 13.5 милјон инсан јашајыр. Бу, өлкә әһалисинин 15.7 фаизи демәкдир. Дағынтылар нәтиҹәсиндә минләрлә инсан һәјатыны итириб. Дағылан бина сајы да минләрҹәдир. Дағынтынын мигјасы бөјүкдүр, јалныз јашајыш биналары дејил, хәстәхана вә мәктәбләр, иҹтимаи тикилиләр, јол вә нәглијјат инфраструктурлары, иш јерләри дә дағылыб.
Баш верән фәлакәт тәкҹә инсан иткиләри дејил, ҹидди игтисади иткиләр дә доғуруб. Експертләрин фикринҹә, зәлзәләнин өлкә игтисадијјатына тәсиринин там арадан галдырылмасы үчүн илләрлә узана биләр. Унутмаг олмаз ки, Түркијә игтисадијјаты онсуз да сон илләр о гәдәр дә јахшы ҝүнләр јашамыр. Бу бахымдан, зәлзәләнин вурдуғу зәрәр вә бәрпа просесинә ајрылан хәрҹләр өлкә игтисадијјатыны даһа чәтин дурума сала биләр.
Түркијә һөкумәти тәҹили јардым фәалијјәтинә, илкин олараг, 100 милјард түрк лирәси дәјәриндә бүдҹә ајырыб.
Експертләр дејирләр ки, зәлзәлә нәтиҹәсиндә Түркијәдә үмуми дахили мәһсулун (ҮДМ) һәҹминдә 0.6-2 фаиз азалма баш верә биләр.
Рәсми ҝөстәриҹиләрдән ајдын олур ки, Түркијәдә ҮДМ-ин формалашмасында зәлзәлә бөлҝәләринин пајы 9.3 фаиздир. Зәлзәлә олан әразиләрин өлкә сәнајесиндәки пајы исә 11.1 фаиздир.
342/
