Президент Хој шәһәринә ҝәлдикдән сонра зәлзәләдән зәрәр чәкәнләрин вәзијјәти, еһтијаҹлары вә зәлзәлә нәтиҹәсиндә дәјән иткиләрин мигјасы илә јахындан таныш олуб вә проблемләрин һәлли вә вәзијјәтин јахшылашдырылмасы үчүн лазыми ҝөстәришләр вериб.
Ајәтуллаһ Рәиси валилијин вә шәһәрин иҹра һакимијјәтинин вәзијјәти дүзәлтмәк үчүн ҝөстәрдији сәјләри вурғулајараг, гејд едиб ки, бурада евләрин 10 фаизи зәрәр ҝөрүб, лакин бу вәзијјәтә вә шәраитә ҝөрә Хој әһалисиндән 100 мин нәфәр һазырда чадырлардадыр. Белә бир вәзијјәтдә експертләр һансы евдә јашамағын мүмкүн олуб-олмадығыны јохлајыб, мүәјјән етмәлидирләр.
Президент дејиб: "Мән өлкәнин рәсмиләриндән вә назирләриндән, хүсусән биринҹи витсе-президентдән ҝениш вә әтрафлы мәрузәләри алмағыма бахмајараг, инсанларын вәзијјәтини вә шәраитини шәхсән өјрәнмәјә үстүнлүк вердим".
"Халгын проблемләринин һәлли үчүн бүтүн имканлардан истифадә етмәк лазымдыр ки, зәлзәләдән зәрәр чәкәнләр арасында һеч ким ҹидди проблемләрлә үзләшмәсин", - дејә ҹәнаб Рәиси вурғулајыб.
Иҹтимаи рәјдә сәсләнән сөз-сөһбәтләрә ҝәлинҹә, президент халгдан бу сөз-сөһбәтләрә әһәмијјәт вермәмәји вә бу вәзијјәти сәбирлә арадан галдырмағы хаһиш едиб.
Гејд едәк ки, өтән шәнбә ҝүнү Иранын шимал-гәрбиндә, Гәрби Азәрбајҹан вилајәтинин Хој шәһәриндә 5,9 бал ҝүҹүндә зәлзәлә баш вериб. Бу зәлзәлә үч нәфәрин өлүмүнә, јүзләрлә инсанын јараланмасына, јашајыш евләринә зијан дәјмәсинә сәбәб олуб.
342/
