Дөвләт Тәһлүкәсизлик Хидмәтинин (ДТХ) әмәкдашлары тәрәфиндән Ҝөмрүк Комитәсиндә апарылан әмәлијјат чәрчивәсиндә рәһбәр вәзифәсиндә чалышан шәхсләрин, еләҹә дә малијјә назиринин күлли мигдарда дөвләт вәсаитини мәнимсәмәкдә иттиһам олунараг һәбс едилмәсинин ардынҹа, өлкәни өз фәрманлары илә идарә едән Илһам Әлијевин фәрманы әсасында Нахчыван Мухтар Республикасынын Дөвләт Ҝөмрүк Комитәси ләғв едилиб. Һәмин фәрманла Нахчыван Баш Ҝөмрүк Идарәси јарадылыб вә бу идарә Дөвләт Ҝөмрүк Комитәсинин структуруна дахил едилиб, јәни идарә бирбаша Бакынын сәрәнҹамына кечиб.
Мараглыдыр ки, коррупсија иттиһамы илә һәбсләрин давам етдији бир вахтда, Азәрбајҹан Республикасыны идарә едән тајфа режиминин Пашајевләр ганады Васиф Талыбову һакимијјәтдән девирмәк үчүн онун командасынын Иранла әлагәләриндән дә бәһанә кими истифадә едир.
Бунунла әлагәдар Азәрбајҹан президентинин гејри-рәсми сөзчүсү олан “Јени Мүсават” медиа групунун рәһбәри Рауф Арифоғлу билдириб ки, Васиф Талебовун Иранла хүсуси әлагәләр гурдуғу барәдә онда ҝуја дәгиг мәлуматлар вар.
Һәмчинин Азәрбајҹан Республикасынын Тәһлүкәсизлик Тәшкилатына бағлы журналист, Нахчыван мәсәләләрини диггәт мәркәзиндә сахлајан Һејдәр Оғуз Канал 13-дә Васиф Талыбовун 8 ил әрзиндә Иран рәсмиләри илә 38 дәфә ҝөрүшү олдуғуну дејиб!
О, Нахчыван Ҝөмрүк Комитәсинин сәдри вә малијјә назиринин һәбсини, онларын Бакы һәбсханасына көчүрүлмәсини дә Нахчыванда Васиф Талыбовун һакимијјәтдән деврилмәси истигамәтиндә мүһүм аддым кими сәҹијјәләндириб.
Сијаси мүшаһидәчиләр һесаб едирләр ки, икинҹи Гарабағ мүһарибәси сәбәбиндән сон ики илдә Исраил вә Түркијәдән асылылығыны ҝетдикҹә даһа да ҝүҹләндирән, түркләрдән вә сионистләрдән алынан сифаришләри ачыг шәкилдә јеринә јетирән игтидар чалышыр ки, Нахчыванда Васиф Талыбовун башчылығы алтында мөвҹуд олан нахчыванлылар кланыны девирсин вә бу кланын сәрвәт вә әмлакыны өз әлинә кечирсин. Һәмин планда Нахчываны даһа чох Түркијә вә сионист режимин арха бағчасына чевирмәк вә Иранын Нахчыванла нормал әлагәләрини минимума ендирмәк еһтималлар сырасындадыр.
Јери ҝәлмишкән билдирәк ки, Совет Иттифагынын дағылмасындан сонракы сон үч онилликдә Иранла әлагәләр нахчыванлыларын ҝүзәраны, Нахчыванын әрзаг вә јанаҹаг бөһранындан хиласы үчүн мүһүм мәнбә олмушдур.
Тәсадүфи дејил ки, бу ҝүнләрдә нахчыванлылара гаршы зүлмә сон гојулмасы тәләби илә “Иран Нахчыван Халг Һәрәкаты” адлы бир ҹәрәјан јаранды вә онун Телеҝрам каналындакы фәалијјәти Бакы рәсмиләрини гәзәбләндирди, һәтта ДТХ тәрәфиндән бу кими фәалијјәтләрә рәсми реаксија верилди.
Һәр һалда ола билсин ки, Пашајевләр һадисәләри нәзарәтдә сахламаг үчүн өнләјиҹи тәдбирләрә әл атмышлар. Лакин бу аддымын өзү һакимијјәт дахилиндә чәкишмәләрин сону дејил, башланғыҹы ола биләр. Она ҝөрә дә ДТХ-нин мухтар республиканы коррупсионер мәмурлардан тәмизләмәк мәгсәдилә һәрәкәтә кечдијини дүшүнмәк мәнасыздыр. Баш верәнләр даһа чох дөвләт чеврилишинә бәнзәјир.
342/
