Путин Франса президенти Емануел Макронун Франҹе-2 телеканалына вердији сон мүсаһибәсиндә Русијаны анти-Ермәнистан һәрәкәтләрдә иттиһамландырмасына ҹаваб кими нәзәрә ҝәлән бәјанатында Русијанын вахты илә Ермәнистана олан тәклифиндән данышыб. Тәклиф рәсми Ирәванын Гарабағын талеји илә бағлы Азәрбајҹана тәзјиг ҝөстәрмәк үчүн ики бөјүк рајону ишғал алтында сахланылмасындан ибарәт имиш.
“Узун илләр әрзиндә Ермәнистан тәрәфи илә данышырдыг, диалог апарырдыг вә вәзијјәти низама салмағы тәклиф едирдик. Ермәнистан фактики олараг Азәрбајҹанын 7 рајонуна нәзарәт едирди. Дејирдик ки, ҝәлин, мүнасибәтләрин нормаллашмасына доғру ҝедәк. Ики Азәрбајҹан рајону вар ки, онлар бөјүк рајонлардыр. Һансыса мәрһәләдә Азәрбајҹан тәрәфи илә разылашаҹағыг, 5 рајону верин. Онлар лазым дејил, мәнасыздыр вә бошдур. Орадан адамлар ҝедиб, онлары сахламағын мәнасы нәдир? Гарабағла әлагә үчүн 2 рајон вар, өзү дә онлар бөјүкдүр. Лакин Ермәнистан рәһбәрлији өз јолу илә ҝетди. Мәлум олдуғу кими, бу да буҝункү вәзијјәтә ҝәтириб чыхарды”, - Русија лидери билдириб.
Владимир Путин индики шәраитдә Азәрбајҹан Республикасы илә Ермәнистан арасында сүлһ мүгавиләси барәдә исә удузмуш Ирәваны нөвбәти мәғлубијјәтдән чәкиндирмәк анламына ҝәлән бир јол тәклиф едиб:
“Низамланма, сүлһ мүгавиләси мәсәләсинә ҝәлинҹә, мөвгејимиз ондан ибарәтдир ки, сүлһ мүгавиләси лазымдыр вә биз сүлһ јолу илә низамланманын тәрәфдарыјыг. Еләҹә дә сәрһәдләрин делимитасијасы вә сәрһәд мәсәләләри. Һансы варианты сечмәк исә артыг Ермәнистанын, Ермәнистан рәһбәрлијинин вә ермәни халгынын ишидир. Биз һеч нәјә мәҹбур етмәк фикриндә дејилик. Биз Ермәнистана һеч нә диктә етмәјәҹәјик. Ермәни халгы вә ја Ермәнистан рәһбәрлији һесаб едирсә ки, сүлһ мүгавиләсинин бүтөвлүкдә Гарабағ үзәриндә Азәрбајҹанын суверенлијинин танынмасыны нәзәрдә тутан Вашингтон варианты сечилмәлидир, бујурсунлар, өзләри биләрләр. Ермәнистан рәһбәрлији һесаб едирсә ки, Гарабағ ҝәләҹәк сүлһ мүгавиләсиндә нәзәрә алынмалыдыр, бу да мүмкүндүр. Амма тәбии ки, Азәрбајҹанла разылашдырмаг лазымдыр. Бу разылашмаларын гаршы тәрәф - Азәрбајҹан үчүн дә мәгбул олмасы лазымдыр. Бу чох чәтин, бирбаша десәк ағыр мәсәләдир”, - дејә Путин әлавә едиб.
342/
