Илһам Әлијев белә дејиб: “Азәрбајҹанын Гарабағ реҝионунда јашајан ермәни әһалиси бизим вәтәндашларымыздыр вә биз онларын һәјатыны неҹә гајдаја салаҹағымызы һеч бир бејнәлхалг мәркәзлә мүзакирә етмәјәҹәјик.”
Гарабағын Азәрбајҹан торпағы олдуғуну диггәтә чатдыран дөвләт башчысы дејиб: “Икинҹи Гарабағ мүһарибәси буну сүбут етди. Һәтта ишғал илләриндә дүнјада Ермәнистан да дахил олмагла һеч бир өлкә бу режими танымады”.
Илһам Әлијев бу ҝүн Русија һәрбчиләринин нәзарәтиндә олараг сепаратчы режим тәрәфиндән идарә едилән Гарабағ ермәниләринин нә вахт вә неҹә рәсми Бакынын нәзарәтинә гајтарылаҹағына ајдынлыг ҝәтирмәјиб.
Азәрбајҹан Республикасы президенти өз чыхышында бир даһа бејнәлхалг иҹтимаијјәти вә Минск групунун һәмсәдрләрини кәскин тәнгид едиб:
“Бејнәлхалг иҹтимаијјәт Азәрбајҹан әһалисинин башына ҝәлән һуманитар фәлакәтә ҝөз јумурду”- дејән Илһам Әлијев сөзләрини белә давам етдириб: "АТӘТ-ин Минск групунун һәмсәдрләри дәфәләрлә ишғал олунмуш әразиләрә сәфәр едибләр, бурада бүтүн шәһәр вә кәндләрин вәһшиҹәсинә виран едилмәсинин, ермәниләрин әразиләримиздә ганунсуз мәскунлашмасынын шаһиди олублар, лакин Ермәнистаны гынамајыблар. 27 иллик гондарма фәалијјәти әрзиндә Ермәнистаны гынајан бирҹә сөз белә дејилмәмишди. Инди исә АТӘТ-ин Минск групунун фәалијјәтини бәрпа етмәк ҹәһдләрини ҝөрәндә, әлбәттә ки, биз буну дәстәкләјә билмәрик.”
Илһам Әлијев Минск групунун һәмсәдрләринин өз мандатларыны јеринә јетирмәк үчүн һеч нә етмәдикләрини вурғулајыб: “Етдикләри јеҝанә шеј Ермәнистанын тәҹавүзүнү мүәјјән дәрәҹәдә легаллашдырмаг, тәҹавүзкарла тәҹавүзүн гурбаны арасында баланс јаратмагдыр ҹәһдләри олуб”,- дејә Азәрбајҹан Республикасы президенти билдириб.
342/
