Сејид Ибраһим Рәиси Нју-Јоркда медиаларла мәтбуат конфрансында вурғулајыб: Нә бир ҝүҹүн һөкмранлығы алтына ҝедәҹәјик, нә дә ки, бир өлкәни өз һөкмранлығымыз алтына алаҹағыг.
О, әлавә едиб: Бу ҝүн бәшәријјәт пулдан вә һәрби ҝүҹдән өтрү өзүнү диҝәр ҹәмијјәтләрә гәбул етдирмәк истәјән өлкәләр вә империализмдән әзијјәт чәкир.
Рәиси Иранын нүвә мәсәләси илә әлагәдар суала ҹавабда дејиб: Әҝәр сөзүҝедән разылашма, гарант досјалары һәлл едилмәдән оларса, давамлы олмајаҹаг вә Иран Ислам Республикасы даима тәһдид алтында олаҹаг.
Иран президенти бир Јапонија медиасынын Америка илә разылашмада тәзминатын алынмасынын сәбәби барәдәки суалынын ҹавабында сөјләјиб: Американын зәманәти америкалыларын рәфтарларындан олан тәҹрүбәјә ҝөрәдир. Америкалыларын рәфтарлары ҝөстәрир ки, онлара етибар јохдур; разылашма реал вә әминвериҹи олмалыдыр.
Рәиси Иран Ислам Республикасынын Фәләстин мәсәләси илә бағлы мөвгеји барәдәки суалы исә белә ҹавабландырыб: Фәләстин јетмиш илдир ки, гәсбкарлар тәрәфиндән ишғал едилиб вә онун сакинләри диҝәр өлкәләрә дидәрҝин дүшүбләр. Онларын бир гисми дә Гәззәдә ири бир мәһбәсдә һәбсдәдир. Бу вәзијјәт давам едә билмәз вә бу зүлмә сон гојулмалыдыр.
Американын вә гәрблиләрин һәлл јолларынын Кемп-Девид вә Осло мүгавиләләри кими фәләстинлиләри өз һагларына чатдыра билмәдикләрини диггәтә чәкән Иран президенти әлавә едиб: Иранын тәклифи будур ки, Фәләстин халгы, о сырадан мүсәлман, христиан вә јәһудиләр өз сәсләрини тамамилә демократик шәкилдә елан етсинләр вә халгын сәси әсасында бир һөкумәт тәјин едилсин.
Иранын Шанхај Әмәкдашлыг Тәшкилатына үзвлүјү барәдә верилән суала исә Иран президенти белә ҹаваб вериб: Иран Ислам Республикасы хүсусән игтисади вә тиҹари саһәләрдә бу тәшкилатын фүрсәт вә имканларындан истифадә едә биләр.
“Ҝөрәсән, Иран Ислам Республикасынын,/ он једди мин ҝүнаһсыз иранлынын террор едилмәсилә бағлы, террорчу мүнафигләр гараҝүрундан шикајәт планы јохдурму?” суалынын ҹавабында Иран президенти сөјләјиб: Бу груплашма о гәдәр ҹинајәт төрәдибдир ки, Авропада бир террорчу тәшкилат кими гара сијаһыја салыныбдыр. Инди нә баш верибдир ки, Америка вә Гәрб өлкәләри бир даһа бу груплашма илә һәмкарлыг едир вә онларын бәзи үнсүрләринә өз өлкәләриндә јер верибләр.
Рәиси, Мәһса Әмининин өлүмү вә онун әтрафында Иранда јаранмыш мәсәләләр һагдакы суала ҹавабда исә сөјләјиб: Бу һадисә арашдырылмагдадыр вә бу барәдә јекун фикри мәһкәмә рәсмиси елан едәҹәк. Бу ханымын вәфаты илә бағлы иш, әҝәр гүсур вә тәгсир оларса, мүтләг арашдырылаҹаг.
О, Иранын Украјна мүһарибәси илә әлагәдар мөвгеји барәдә исә дејибдир ки, мүһарибә баша чатмалыдыр, зира бүтүн ихтилафлар диалоглар јолу илә изләнилә биләр.
Рәиси Теһранын мүһарибә тәрәфләри арасында васитәчилијә һазыр олдуғуну да билдирибдир.
Ајәтуллаһ Рәиси һәмчинин бәзи реҝион өлкәләринин сионист режимлә олан әлагәләри вә Иранын бунунла бағлы мөвгеји һагдакы суалын ҹавабында вурғулајыбдыр ки, бу режимлә һәр һансы әлагә, Фәләстин халгынын күрәјинә вурулан хәнҹәр кимидир.
Рәиси тәкидлә гејд едибдир ки, бәзи өлкәләрин сионист режимлә мүнасибәтләринин адиләшдирилмәси тәһлүкәсизлик јаратмајаҹагдыр.
342/
