Авропа Иттифгы Гарабағ мүнагишәси илә бағлы бүтүн проблемләрин һәртәрәфли һәллинин тәрәфдарыдыр. Иттифагын Ермәнистандакы нүмајәндә һејәтинин сәдри, сәфир Андреа Викторин буну дејиб.
сәфир билдириб ки, Авропа Иттифагы мүнагишә тәрәфләринин барышмасында вә Дағлыг Гарабағ проблеминин стабил һәллиндә мараглыдыр.
Онун сөзләринә ҝөрә, реҝионда узунмүддәтли сүлһүн бәргәрар олмасы үчүн ирәлиләјишә зәманәт верәҹәк мүвафиг мүһит тәмин етмәк лазымдыр.
Андреа Викторин әминдир ки, бу контекстдә галан әсирләрин гајтарылмасы, еләҹә дә иткин дүшәнләрин ахтарышында ирәлиләјиш әлдә етмәк үчүн даһа чох иш ҝөрүлмәлидир.
“Биз Ермәнистанла Азәрбајҹан арасында мүнасибәтләрин низамланмасына јөнәлмиш бүтүн сәјләри алгышлајырыг вә мүнагишә илә бағлы бүтүн мәсәләләрин һәртәрәфли һәллинин тәрәфдарыјыг. Авропа Иттифагы ҹари вә ҝәләҹәк сүлһ мүгавиләси данышыгларыны вә сәрһәд мәсәләләри, реҝионда коммуникасијаларын ачылмасы үзрә барышыг сәјләрини ҝүҹлү шәкилдә дәстәкләјир”,- дејә Андреа Викторин вурғулајыб.
Гејд едәк ки, АБШ да Авропа Иттифагынын Гарабағла мөвгејини дәстәкләдијини нүмајиш етдирмәк мәгсәдилә дипломат Филип Рикери Гафгазда данышыглар үзрә баш мәсләһәтчи тәјин едиб.
Дөвләт катиби Ентони Блинкенин јазылы бәјанатында гејд едилиб ки, АБШ Ермәнистан вә Азәрбајҹана узунмүддәтли сијаси низамлама үзрә данышыгларда көмәк етмәјә садигдир: "Сәфир Ф.Рикер Ермәнистан вә Азәрбајҹан арасында бирбаша диалогу тәшвиг етмәк үчүн Авропа Бирлији кими һәмфикир тәрәфдашларла икитәрәфли әсасда гаршылыглы фәалијјәт ҝөстәрәҹәк".
О гејд едиб ки, Бирләшмиш Штатлар Дағлыг Гарабағ мүнагишәсинин узунмүддәтли сијаси низамланмасы үзрә данышыгларда Ермәнистан вә Азәрбајҹана көмәк етмәк өһдәлији ҝөтүрүр.
“Сәфир Рикер Авропа Иттифагы кими һәмфикир тәрәфдашларла икитәрәфли әсасда мәшғул олаҹаг вә АТӘТ-ин Минск Групунун һәмсәдри кими Ермәнистан вә Азәрбајҹан арасында бирбаша диалога көмәк едәҹәк”, – о әлавә едиб.
Азәрбајҹан рәһбәрлији Гарабағ мүнагишәсинин һәлл олундуғуну дејәрәк, Ермәнистанла јалныз сүлһ сазишинин деталларыны мүзакирә етмәјә һазыр олдуғуну билдирир.
342/
