Анкара шәрт ирәли сүрдү, Вашингтон һәдәләди

АБНА24 Хәбәр Верир , Түркијә Финландија вә Исвечин НАТО-ја мүраҹиәти илә бағлы данышыглар үчүн шәртини ирәли сүрүб.

Түркијә Президентинин сөзчүсү Ибраһим Калын бу барәдә дејиб ки, Финландија вә Исвечин НАТО үзвлүјү илә бағлы данышыглар просеси Түркијәнин һәр ики өлкәдән бүтүн ҝөзләнтиләринин јеринә јетириләҹәји тәгдирдә башлајаҹаг.

Калын Исвеч, Финландија, Бөјүк Британија вә АБШ-дан олан һәмкарлары илә ҝөрүшүндә гејд едиб ки, Финландија вә Исвечин НАТО-ја үзвлүјү илә бағлы ирәлиләјиш јалныз Түркијәнин милли тәһлүкәсизлик проблемләринин һәлли үчүн конкрет аддымларын атылмасы илә мүмкүн олаҹаг.

Ејни заманда о вурғулајыб ки, әҝәр өлкәләр Түркијәнин шәртләрини јеринә јетирмәкдән имтина етсәләр, о заман Исвеч вә Финландијанын мүраҹиәтләри үзрә данышыгларда ирәлиләјиш мүмкүн олмајаҹаг.

Рәсми Анкаранын сәрт мөвге тутмасына ҹаваб олараг, АБШ Сенатынын Хариҹи Әлагәләр Комитәсинин сәдри Роберт Менендез Түркијәни Исвеч вә Финландија илә бағлы мөвгејинә ҝөрә һәдәләјиб.

О билдириб ки, Анкара Исвеч вә Финландијанын НАТО-ја үзвлүкләрини дәстәкләмәсә Америка Ф-16 гырыҹыларыны Түркијәјә тәдарүк етмәкдән имтина едә биләр.

Сенатор Түркијәнин аддымларыны кәскин тәнгид едәрәк, билдириб ки, Анкара Русијанын С-400 зенит-ракет комплексләрини алдыгдан вә Гәрбин Русијаја гаршы санксијаларына гошулмагдан имтина етдикдән сонра АБШ-ын мүттәфиги кими Түркијәнин етибары илә бағлы нараһатлыгларыны артырыр.

Менендез хатырладыб ки, Түркијә онларла јени Ф-16 гырыҹысы алмаға чалышыр. Онларын сатышы һәм АБШ президенти Ҹо Бајден администрасијасы, һәм дә Конгресдән иҹазә тәләб едир. Администрасија Анкаранын Ф-16-ларла бағлы сорғусуну ҝөздән кечирәркән буну нәзәрә алаҹаг.

Мүшаһидәчиләр билдирирләр ки, Түркијә бу һәрәкәти илә Русија вә Гәрблә олан мүнасибәтләриндә балансы горујуб сахламаға вә өз марагларыны максимум дәрәҹәдә тәмин етмәјә чалышыр. Әсасән дә Финландија вә Исвечин НАТО-ја үзвлүкләринә вето гојаҹағыны билдирмәклә Түркијәнин Авропа Иттифагыны үзвлүјү просесини сүрәтләндирмәјә вә АБШ-ын Ф-35 тәјјарәләри програмына дахил олмаг Анкаранын дилә ҝәтирмәдији мәгсәдләр сырасындадыр, һәләлик исә Финландија вә Исвечин ПКК үнсүрләрини тәһвил вермәләрини мүзакирә масасы үзәриндә сахлајыр.

342/