Финландија НАТО-ја үзв олур - ТӘҺЛИЛ

АБНА24 Хәбәр Верир , Шимали Авропанын ики өлкәси олан Финландија вә Исвечин НАТО-ја дахил олмасы мәсәләси Русија илә бу ики өлкә арасында ҝәрҝинлијә ҝәтириб чыхара биләр.

Финландија парламенти 23 апрелдә 200 сәсдән 112 леһинә, 12-си әлејһинә олмагла Шимали Атлантика Мүгавиләси Тәшкилатына (НАТО) гошулмаға сәс вериб. Ганун лајиһәси Финландија һөкумәтинин сөзү ҝедән һәрби алјанса гошулмаг үчүн мүраҹиәт етмәсинә јашыл ишыгдыр. Бу аддым Финландија һөкумәти тәрәфиндән мүсбәт гаршыланыб. Финландијанын хариҹи ишләр назири Пекка Һаависто шәнбә ҝүнү дејиб: "Бу, Һелсинкинин НАТО-ја үзвлүк үчүн мүраҹиәт етмәсинә јахшы имкан олаҹагдыр вә өлкән НАТО-ја үзвлүк үчүн әризәләрин ҝөндәрилмәсини ҝеҹикдирмәмәлидир.

Онун сөзләринә ҝөрә, Украјнадакы мүнагишә Һелсинкини тәһлүкәсизлик сијасәтинә јенидән бахмаға мәҹбур едиб вә Финландија вә Исвечин НАТО-ја үзвлүклә бағлы мөвгеләрини синхронлашдырмасы јахшы оларды.

Хатырладаг ки, Украјна мүһарибәсинин башланмасы Финландијанын НАТО-ја үзв олмаг гәрарына әһәмијјәтли дәрәҹәдә тәсир ҝөстәриб. Инди Финландија парламентинин гәрары илә бу өлкәнин НАТО-ја үзвлүјү просеси практики олараг башлајыб вә тезликлә реаллашаҹаг. Тәбии ки, бу һәрәкәт руслары сон дәрәҹә һәссас едир. Һазырда Украјнада ҝенишмигјаслы мүһарибә апаран Русија Исвеч вә Финландијанын НАТО-ја гошулмасына гәти шәкилдә гаршыдыр. Москванын нөгтеји-нәзәриндән бу, Русијанын гәрб сәрһәдләри илә јанашы, инди өлкәнин шимал сәрһәдләриндә дә ҝүҹлү мөвге тутмаг нијјәтиндә олан НАТО тәрәфиндән Русијанын мүһасирәсинин узадылмасы демәкдир. Русија Хариҹи Ишләр Назирлији хәбәрдарлыг едиб ки, Исвеч вә Финландијанын НАТО-ја гошулмасы Авропанын шималында гејри-сабитлик риски јарада биләр. Конкрет олараг Русија хариҹи ишләр назиринин мүавини Серҝеј Рјабков бу јахынларда хәбәрдарлыг етмишди ки, Финландија вә Исвечин НАТО-ја дахил олмасы сијаси вә һәрби нәтиҹәләрә сәбәб ола биләр.

Финландија Сојуг Мүһарибә илләриндә Совет Иттифагы илә сәрһәди вә ҹоғрафи мөвгејинә ҝөрә нејтрал мөвге тутду. Бунунла белә, НАТО вә АБШ лидерләри һазырда Авропада ојун гајдаларынын әсаслы шәкилдә дәјишдијини вә көһнә нејтраллыг анлајышларынын буҝүнкү реаллыглара ујғун олмадығыны иддиа едир вә буна ҝөрә дә һәр ики өлкәни НАТО-ја үзв олмаға тәшвиг едирләр.

Һазырда Финландијанын НАТО-ја дахил олмасы Русијанын нараһатлығыны вә Москванын бу өлкәјә гаршы реаксијаларыны даһа да артыраҹаг. Бу, нәинки өлкәнин милли тәһлүкәсизлијинин јүксәлдилмәси демәк дејил, әслиндә она гаршы тәһдидләри ҝөрүнмәмиш шәкилдә артыраҹаг вә Русијанын реаксијасына сәбәб олаҹагдыр.

342/