Иран Исвечдә баш алыб ҝедән вандаллығы гынајыр - ТӘҺЛИЛ

АБНА24 Хәбәр Верир , Иран Ислам Республикасы һөкумәтинин сөзчүсү Әли Баһадори Ҹәһроми ифрат сағчыларын Авропада, хүсусән дә Исвечдә Ислам әлејһинә һәрәкәтләринә мүнасибәт билдирәркән дејиб: “Гәрбдә екстремизм вә иргчилијин јајылмасы ади һал алыб вә бу дәфә Исвеч полисинин рәсми дәстәји илә мүгәддәс Рамазан ајында 2 милјард мүсәлманын инанҹы тәһгир олунубдур”.

Мәлум мәсәләдир ки, анти-ислам вә анти-иммигрант фәалијјәти сон заманлар Исвечдә хејли јаылыб вә бунлардан бири Гурани-Кәримин ҹамаат гаршысында јандырылмасыдыр ки, бу да әслиндә Авропада мүсәлманларын варлығына, Ислама вә мүсәлманлара гаршы символик бир һәрәкәтдир. Бунунла белә, ифрат сағчыларын сон ҹәһди Исвечин шәргиндәки Линкпинг шәһәриндә мүсәлманларын күтләви етиразлары сәбәбиндән ҹүмә ахшамы уғурсузлугла нәтиҹәләниб. Бу ифрат сағчы групун илк ҹәһди дејилди.

Бунунла паралел олараг Данимарканын пајтахты Копенһаҝендә үзвләринин Гуран јандырма тарихчәси олан Сәрт Хәтт Партијасынын лидери Расмус Палудан билдириб ки, Исвеч халгыны ојатмаг лазымдыр.

Данимарка вә Исвеч һөкумәтләринин бу ифрат сағчы партијанын Гураны јандырараг Ислам мүгәддәсләрини тәһгир етмәсинә иҹазә вермәси үчүн бәһанә ифадә азадлығы вә Авропа һөкумәтләринин ҝуја ону горумаг иддиаларыдыр. Һалбуки Гәрбин, о ҹүмләдән Авропа өлкәләринин ифадә азадлығы илә бағлы икили стандартларына нәзәр салсаг, бунун јалныз Исламофобија вә анти-Ислам кими һәрәкәтләри заманы тәтбиг олундуғуну ҝөрәрик. Һолокосту инкар едән вә ја һазыркы Украјна мүһарибәси заманы русијапәрәст мөвге сәрҝиләјән шәсхләрин исә барәсиндә адәтән сәрт өлчүләр ҝөтүрүлүр вә ифадә азадлығы унудулур.

Иран дәфәләрлә Гәрбин, о ҹүмләдән Авропанын ифадә азадлығы саһәсиндә икили јанашмасыны вә бу бәһанә илә Ислама зидд һәрәкәтләрин јолверилмәзлијини писләјиб. Гуранын јандырылмасы кими мәнфур әмәлә “сөз азадлығы” тактикасы илә һагг газандырмаг әсла мүмкүн дејил. Бир сөзлә Исвечдә сәрбәст шәкилдә вә бәлкә дә һөкумәтин вә полисин дәстәји илә һәјата кечирилән ишләр ифадә азадлығынын нүмунәси дејил, нифрәт вә иргчилијин бариз нүмунәсидир вә һеч шүбһәсиз, етикаја, демократик дәјәрләр вә танынмыш һүгуг принсипләринә зиддир. Бу тәхрибатчы һәрәкәтләри дәстәкләјәнләр ортаја чыхан нәтиҹәләрә ҝөрә мәсулијјәт дашымалыдырлар.

342/