Әһли-Бејт (әлејһимус сәлам) – Хәбәр Аҝентлији АБНА-нын вердији мәлумата әсасән, АБШ-ын Азәрбајҹандакы сәфири Ли Литзенбергер, Азәрбајҹан Дөвләт Ҝөмрүк Комитәсинин Сәдринин мүавини Ҹавад Гасимов вә диҝәр ҝөмрүк рәсмиләри Астара сәрһәд кечид мәнтәгәсинә сәфәр едәрәк АБШ-нин Мүдафиә Департаменти тәрәфиндән Азәрбајҹан Дөвләт Ҝөмрүк Комитәсинә верилән аваданлығы нәзәрдән кечирибләр.
Сәфирликдән верилән мәлумата ҝөрә, аваданлыг АБШ-нин Мүдафиә Департаментини тәрәфиндән 2019-ҹу илдә тәгдим олунан тәһлүкәсизлик јардымынын бир һиссәсидир. Мүдафиә Департаменти ганунсуз дашынмаларын гаршысыны алмаг вә гуру вә дәниз сәрһәдләринин тәһлүкәсизлијинин ҝүҹләндирилмәси мәгсәдилә Азәрбајҹана 90 милјон доллардан чох вәсаит ајырыб. АБШ сәфиринин Астара сәрһәд кечид мәнтәгәсиндә бахыш кечирдији вә дәјәри 30 милјон доллардан чох олан аваданлыг Азәрбајҹанын сәрһәдләринин тәһлүкәсизлијинин тәминатына вә ганунсуз малларын дашынмасынын гаршысынын алынмасына тәкан верәҹәк.
Сәфир АБШ-нын Азәрбајҹанын Дөвләт Ҝөмрүк Комитәси илә ијирми иллик мүнасибәтләрини гејд едәрәк, күтләви гырғын силаһларынын ганунсуз дашынмасынын гаршысыны алмаг үчүн ҝөстәрдикләри фәалијјәт барәдә данышыб: “Үмид едирәм ки, бу јардым бизим 30 ил өнҹә гурдуғумуз мүнасибәтләримизин инкишафында әлавә бир аддым олаҹаг, Азәрбајҹан вә Бирләшмиш Штатларын тәһлүкәсизлијинин ҝүҹләндирилмәсинә өз төһфәсини верәҹәк.”
ДҜК сәдринин мүавини Ҹавад Гасымов Азәрбајҹанда наркотик васитәләрин әксәријјәтинин әлә кечирилдији Астара сәрһәд-кечид мәнтәгәсиндә чыхыш едәрәк АБШ-ын вердији аваданлыгларын, наркотик васитәләрин, силаһ-сурсатын вә диҝәр гачагмалчылығын гаршысынын алынмасында ојнадығы ролу гејд едиб.
Диггәт: Хәбәрдән Истифадә Етдикдә Мәнбәјә Истинад Лазымдыр!
