АБНА24 Хәбәр Верир, Түркијә-Ермәнистан мүнасибәтләринә тохунан Фуат Октај билдириб ки, Никол Пашинјанын Түркијәјә сәфәри ҝәлән ај баш тутаҹаг.
Түркијәнин витсе-президенти һәмчинин вурғулајыб ки, Түркијә илә Ермәнистан арасында хүсуси нүмајәндәләр тәјин олунуб, гаршылыглы мүсбәт месажлар верилиб. Рәсми Анкара бу просесин сүрәтләнмәсини истәјир.
Түркијә Хариҹи Ишләр Назирлијинин үч ҝүн әввәл јајдығы мәлумата ҝөрә, Түркијә вә Ермәнистан арасында мүнасибәтләрин нормаллашмасы истигамәтиндә хүсуси нүмајәндәләр јенидән ҝөрүшәҹәк.
Мәлуматда гејд олунуб ки, нүмајәндәләр Сердар Кылыч вә Рубен Рубинјан арасында ҝөрүш февралын 24-дә Вјанада кечириләҹәк.
Хатырладаг ки, Түркијә илә Ермәнистан арасында дипломатик мүнасибәтләр һәлә бәрпа олунмајыб. 2021-ҹи ил декабрын 13-дә Түркијә хариҹи ишләр назири Мөвлуд Чавушоғлу бәјан едиб ки, мүнасибәтләрин нормаллашмасы үчүн гаршылыглы шәкилдә нүмајәндәләр тәјин олунаҹаг. Ермәнистан ХИН-и бу бәјанаты дәстәкләјиб.
Даһа сонра Анкара Түркијәнин АБШ-дакы кечмиш сәфири Сердар Кылыҹы Ирәванла мүнасибәтләрин нормаллашмасы үзрә хүсуси нүмајәндә тәјин едиб. Ермәнистан тәрәфдән парламентин сәдр мүавини Рубен Рубинјан тәјин едилиб.
Хүсуси нүмајәндәләрин илк ҝөрүшү јанварын 14-дә Москвада баш тутуб.
Рәсми Бакы үмид едир ки, Ермәнистан-Түркијә әлагәләринин нормаллашмасы Ирәванын Азәрбајҹанла бағлы мөвгејинин јумшалмасына вә нәтиҹә етибары илә Азәрбајҹан Республикасынын әрази бүтөвлүјүнү танымасына, еләҹә дә сүлһ сазишинин имзаланмасына өз төһфәсини верәҹәкдир. Она ҝөрә дә Ермәнистан-Түркијә диалогуну дәстәкләјир.
342/
5 fevral 2022 - 18:24
Xəbər kodu: 1226284
Түркијәнин витсе-президенти Фуат Октај Ермәнистанын Баш назири Никол Пашинјанын Түркијәјә ҝедәҹәјини вә Анталја Дипломатија Форумунда иштирак едәҹәјини ачыглајыб.
