АБНА24 Хәбәр Верир, Түркијә Хариҹи Ишләр Назирлији бу барәдә билдириб ки, нүмајәндәләр Сердар Кылыч вә Рубен Рубинјан арасында ҝөрүш февралын 24-дә Вјанада кечириләҹәк.
2021-ҹи ил декабрын 13-дә Түркијә хариҹи ишләр назири Мөвлуд Чавушоғлу бәјан едиб ки, мүнасибәтләрин нормаллашмасы үчүн гаршылыглы шәкилдә нүмајәндәләр тәјин олунаҹаг. Ермәнистан ХИН-и исә бу бәјанаты дәстәкләјиб. Бунун ардынҹа Түркијә илә Ермәнистан арасында әлагәләрин нормаллашдырылмасы үзрә мүзакирәләр үчүн Түркијә тәрәфдән АБШ-дакы кечмиш сәфир Сердар Кылыч, Ермәнистан тәрәфдән исә парламентин витсе-спикери Рубен Рубинјан хүсуси нүмајәндә тәјин едилиб. Онларын илк ҝөрүшү јанварын 14-дә Москвада кечирилиб. Тәрәфләр конструктив, сијасиләшмәмиш шәкилдә диалог апармаға, ачыг вә "кичик аддым"ларла асандан чәтинә доғру, практик нәтиҹәјә һесабланмыш аддымлар атмаға һазыр олдугларыны бәјан едибләр. Реҝионда сабитлик вә игтисади тәрәгги мараглары, ики өлкә халгларынын рифаһы наминә ишләјәҹәк тәмас нөгтәси ахтарышларыны давам етдирмәк барәдә разылыға ҝәлиниб.
Јери ҝәлмишкән билдирәк ки, рәсми дипломатик әлагәләр олмадан белә Түркијә илә Ермәнистан арасында вәтәндашларын ҝедиш-ҝәлиши вә тиҹарәт һәјата кечирди.
Ермәнистанын Игтисадијјат назири Ваан Керобјан бу һагда билдириб ки, Түркијә вәтәндашлары һәр заман Ермәнистанда мүлк алыблар вә онлар бир чох ширкәтләр, һабелә дашынмаз әмлак алыблар.
О, гејд едиб ки, Ермәнистан игтисадијјаты 2021-ҹи илдән башга һәр заман Түркијә үчүн ачыг олуб.
Гејри-рәсми тәхминләрә әсасән Гарабағын ишғалда олдуғу илләрдә Түркијәнин Ермәнистанла иллик тиҹарәт дөвријјәси 600 милјон доллар ҹиварында олуб. Һөкумәт исә Гарабағ мүнагишәси һәлл олунмадан сәрһәдләрин бағлы галаҹағыны билдириб. Дејиләнләрә ҝөрә, Түркијәнин Ермәнистанла тиҹарәти бүтүн бу илләр әрзиндә Ҝүрҹүстан үзәриндән һәјата кечирилимишдир.
342/
4 fevral 2022 - 13:33
Xəbər kodu: 1225897
Түркијә вә Ермәнистан арасында мүнасибәтләрин нормаллашмасы истигамәтиндә хүсуси нүмајәндәләр јенидән ҝөрүшәҹәк.
