АБНА24 Хәбәр Верир, бу барәдә Азәрбајҹанын Рәгәмсал Инкишаф вә Нәглијјат Назирлији мәлумат вериб.
Мәлуматда дејилир ки, бунунла да Ҹәнуби Гафгазда Азәрбајҹанын иштиракы илә нөвбәти реҝионал әмәкдашлыг платформасы јарадылыр.
Мәлумата әсасән үч өлкәнин нәглијјат васитәләриндән ибарәт автомобил карваны Иран Биләсуварындан Азәрбајҹана, сонра Ҝүрҹүстан лиманларына, орадан Болгарыстана, даһа сонра гуру јолла Шәрги Авропанын диҝәр өлкәләринә һәрәкәт едәҹәк. Маршрут Иранын ҹәнубунда Фарс Көрфәзиндән башлајыб Авропаја кими давам едир. Автомобил карваны декабрын 23-дә Азәрбајҹана чатыб. Сынаг јүрүшүнүн иҹрасы заманы әлдә олунаҹаг нәтиҹәләр арашдырылаҹаг, маршрутун сәмәрәлилији тәһлил едиләҹәк.
Бундан бир гәдәр әввәл Тәбриз шәһәриндән Азәрбајҹан, Иран вә Ҝүрҹүстан нәглијјат васитәләриндән ибарәт карванын тәнтәнәли јола салынмасы мәрасими кечирилиб. Тәдбирдә Иранын нәглијјат гурумларынын, Шәрги Азәрбајҹан Вилајәтинин, Азәрбајҹан вә Ҝүрҹүстанын Ирандакы сәфирликләринин нүмајәндәләри иштирак едибләр. Ҝәләҹәкдә бу дәһлиз үзәриндән дәмир јолу јүкдашымаларынын да һәјата кечирилмәси мүмкүн олаҹаг. Лајиһәјә әсасән һәм дә Ҹәнуби Асија өлкәләри дәһлиз васитәсилә Гәрбә даһа бир јол әлдә едәҹәкләр.
Експертләр дејирләр ки, бу нәглијјат дәһлизи вә онун ҝәләҹәкдә истифадәсинин ҝенишләндирилмәси реҝион өлкәләри үчүн мүһүм игтисади үстүнлүкләр вәд едир. Дәһлиз һәм транзит јүкдашымалары, һәм дә дүнја базарына чыхыш бахымындан бөјүк өнәм кәсб едир. Бу да реҝиондакы бөјүк нәглијјат-коммуникасија лајиһәләринин реаллашмасына тәкан верәҹәк, һәр үч өлкәнин бејнәлхалг јүкдашымалардан әлдә етдији ҝәлирләрин артмасына шәраит јарадаҹаг. Нәтиҹәдә иштиракчы өлкәләрин стратежи мөвгеји даһа да ҝүҹләнәҹәкдир.
342/
24 dekabr 2021 - 10:08
Xəbər kodu: 1211796
Фарс Көрфәзини Гара Дәнизә бирләшдирән транзит маршруту үзрә Иран, Азәрбајҹан вә Ҝүрҹүстан әразисиндән кечмәклә илк сынаг јүрүшү һәјата кечирилир.
