Франсанын Гарабағ мәсәләсиндә сәмимилијинә инанмаг олармы?

АБНА24 Хәбәр Верир, Еммануел Макрон Азәрбајҹанын Авропа Иттифагынын (АИ) тәшәббүсү илә даһа 10 ермәнини гаршы тәрәфә тәһвил вермәсини алгышлајыб.

Бу барәдә Франса лидери твитер һесабында пајлашым едиб.

Пајлашымда дејилир: “Он ермәни әсҝәри азад едилди. Мән Авропа Иттифагынын һәлледиҹи аддымыны алгышламаг истәјирәм, онун көмәји илә биз Азәрбајҹан вә Ермәнистан арасында сүлһә апаран бу диалог јолуну давам етдирәҹәјик. Биз ирәли ҝедирик”.

Гејд едәк ки, Авропа Иттифагы Шурасынын президенти Шарл Мишелин тәшәббүсү илә 14 декабр 2021-ҹи ил тарихиндә Брүсселдә Азәрбајҹан Республикасынын президенти Илһам Әлијев вә Ермәнистан Республикасынын баш назири Никол Пашинјанын үчтәрәфли ҝөрүшүнүн, һабелә Азәрбајҹан Республикасы президенти илә Авропа Иттифагы Шурасынын президенти арасында кечирилмиш икитәрәфли ҝөрүшүн нәтиҹәси олараг, һуманизм принсипләринә садиглијинин тәзаһүрү кими Азәрбајҹан 19 декабр 2021-ҹи илдә 10 нәфәр ермәни әсилли һәрби гуллугчуну Авропа Иттифагынын васитәчилији илә Ермәнистан тәрәфинә тәһвил вериб.

Тәһвил верилмиш шәхсләр 16 нојабр 2021-ҹи ил тарихиндә Ермәнистан силаһлы гүввәләри тәрәфиндән дөвләт сәрһәдинин Кәлбәҹәр истигамәтиндә һүҹумун гаршысы алынаркән сахланылмышдылар.

Јери ҝәлмишкән билдирәк ки, Франса президенти ијунун 23-дә Ермәнистанын баш назиринә парламент сечкиләриндә гәләбәси мүнасибәтилә јаздығы мәктубда Гарабағ мәсәләси вә һүгуги дөвләт гуруҹулуғу саһәсиндә Ермәнистана там дәстәк вермәјә һазырлығыны билдириб.

Макрон, һәмчинин Франсанын Гарабағ проблеминин “Ермәнистанын әрази бүтөвлүјү вә суверенлијинә һөрмәт” шәртилә һәллинә көмәк етмәјә дә һазыр олдуғуну вурғулајыб. О јазыб ки, реҝионда сијаси стабиллијин јеҝанә јолу АТӘТ-ин Минск Групу чәрчивәсиндә Гарабағ проблеми илә бағлы низамлама данышыгларынын бәрпасыдыр.

Гејд едәк ки, Франса лидеринин Гарабағ мүнагишәси илә бағлы мөвгеји бу вахтадәк Азәрбајҹанда наразылыгла гаршыланыб. Һазырда исә рәсми Парисин өз мөвгејиндә корректә етмәси бәзи мүшаһидәчиләри гане етсә дә, әксәријјәт буна шүбһә илә јанашыр вә Парисин сүлһ данышыгларында Ермәнистана дивидент газандырмаға чалышдығы гәнаәтиндәдир.



342/