Әһли-Бејт (әлејһимус сәлам) – Хәбәр Аҝентлији АБНА-нын вердији мәлумата әсасән, бу ҝүн 74 јашыны гејд едән Америкада мүһаҹир һәјаты јашајан Милли Мәҹлисин сабиг спикери Рәсул Гулијев Азәрбајҹана ҝәлмәк истәјир. Мәлумат үчүн билдирәк ки, Рәсул Гулијев 10 декабр 1947-ҹи илдә Ҹулфа рајонунун Газанчы кәндиндә анадан олуб. О нә вахт истәсә, Азәрбајҹана ҝәлә биләҹәјини сөјләјиб: “Һәлә фикирләширәм. Тутаг ки, Азәрбајҹана ҝәлмишәм, нә ишлә мәшғул олаҹағам?! Елә адам дејиләм ки, бош-бош данышам, јаланчы шүарлар сәсләндирәм. Белә адамлардан да зәһләм ҝедир. Нә вахт мәнә еһтијаҹ оларса, ҝәләҹәјәм. Ола биләр, 15 ҝүнлүк ҝәлим. Вәтәни севмәјин вәтәндә олмагла һеч бир әлагәси јохдур. Мән бурада ола-ола вәтәни вәтәндә оланларын 90 фаизиндән даһа чох севирәм”.
Р. Гулијев 1996-ҹы илдә парламентин спикерлијиндән истефа вериб, АБШ-а көчдүкдән сонра барәсиндә ҹинајәт иши ачылыб. О, 1998-ҹи илдән Интерполун ахтарышындадыр. Бу сәбәбдән Рәсул Гулијевин өлкәјә гајытмаг истәји ҹидди мүзакирәләрә сәбәб олуб вә бирмәналы гаршыланмајыб.
Бунунла бағлы Модерн.аз-а данышан Јени Азәрбајҹан Партијасынын Ветеранлар Шурасынын үзвү, Милли Мәҹлисин Аграр сијасәт комитәсинин сәдри Таһир Рзајев дүшүнүр ки, ахтарышда олан сабиг спикерин Азәрбајҹана гајыда билмәси үчүн бир сыра шәртләрә әмәл етмәји лазымдыр:
“Азәрбајҹан президенти бүтүн инсанлара һуманист мөвгедән јанашыр. Бунун ән бариз нүмунәси вахташыры верилән әфв вә амнистијадыр ки, мүхтәлиф ҹинајәтләрдә әли олан шәхсләр ҹәзасынын мүәјјән гисмини чәкдикдән сонра ҹәмијјәт үчүн тәһлүкә төрәтмәдији тәсдигләниб вә бу шәкилдә азадлыға чыхыб.
Рәсул Гулијев узун мүддәт Азәрбајҹана әкс мөвгедә олуб, өлкә рәһбәри илә бағлы фикирләри бирмәналы гаршыланмајыб, Азәрбајҹан һәгигәтләрини даныб, наилијјәтләримизә көлҝә салмаг истәјиб. Америкада отурараг, мүәјјән гүввәләри писләмәклә мәшғул олуб. Лакин дүшмән үзәриндә тарихи гәләбәдән сонра мөвгејини дәјишдији ҝөрүнүр. О чыхышларында Азәрбајҹанын ҝүҹүнү, президентимизин узагҝөрән сијасәтини гисмән етираф едир, халг-президент бирлијинин гаршысында һеч бир мүхалиф гүввәнин дајана билмәјәҹәјини анлајыр. Рәсул Гулијев артыг өз јолуна гајытмаға башлајыб. Әҝәр бир азәрбајҹанлы кими о дөвләтимизин гајда-ганунларына риајәт етсә, өлкәјә гајытдыгдан сонра реаллыглары гијмәтләндириб, дүзҝүн истигамәтдә фәалијјәт ҝөстәрә билсә, онун гајытмасына манеә олмајаҹаг”.
Сабиг президент Ајаз Мүтәллибовун да ејни шәкилдә бағышландығыны хатырладан Таһир Рзајев Рәсул Гулијевин сабиг президентдән нүмунә ҝөтүрәҹәјини истисна етмәјиб:
"Ајаз Мүтәллибов узун мүддәт Азәрбајҹаны тәрк едиб, Москвада јашады, лакин сонралар сәһвләрини етираф етди, Бакыја гајытмасына иҹазә верилди. Һәтта сабиг президент кими бир сыра статуслары, ҝүзәштләри јенидән газана билди. Бу ҝүн дә о, өз чыхышларында өлкә башчысынын јүрүтдүјү сијасәти дәстәкләјир.
Рәсул Гулијев дә азәрбајҹанлыдыр вә һесаб едирәм ки, өз сәһвләрини етираф етмәли, Азәрбајҹан халгынын наилијјәтләрини дәрк етмәлидир. Бир азәрбајҹанлы кими бундан сонра өз фәалијјәтиндә дөнүш јаратмалыдыр. Онун өлкәмизә гајытмасы, бурада сијаси фәалијјәтлә мәшғул олмасы наилијјәтләримизә көлҝә сала билмәз. Анҹаг о, һәгигәтин, әдаләтин јолунда олмалы, президентимизин сијасәтини, халгымызын наилијјәтләрини дүзҝүн гијмәтләндирмәји баҹармалы, јери ҝәләрсә, буна објектив мүнасибәтини ифадә етмәлидир".
Диггәт: Хәбәрдән Истифадә Етдикдә Мәнбәјә Истинад Лазымдыр!
