Әһли-Бејт (әлејһимус сәлам) – Хәбәр Аҝентлији АБНА-нын вердији мәлумата әсасән, “Гарабағ” мөвзусуна һәср олунан 20 манатлыг пул нишанынын мүһафизә системләри вә дизајны мөвҹуд консепсија чәрчивәсиндә ән сон технолоҝија вә инновасијалар тәтбиг едилмәклә јениләниб.
Азәрбајҹан Мәркәзи Банкындан (АМБ) верилән мәлумата ҝөрә, јениләнмиш дизајна вә мүтәрәгги мүһафизә системләринә малик 20 манатлыг пул нишанынын 10 феврал 2022-ҹи ил тарихдән тәдавүлә бурахылаҹаг. Јениләнмиш 20 манатлыг пул нишанында ән сон мүһафизә елементләри олараг 3Д еффектиндә рәнҝи дәјишән һолограм, мөҹүзәви “Спарк Ливе” елементи (динамик ишыг еффекти сачан, рәнҝи дәјишән тәсвирләр), су нишаны (пул нишаныны ишыға тутдугда Азәрбајҹан Республикасынын Дөвләт Ҝерби вә мүвафиг номиналын рәгәмлә тәсвири), ҝөрмә гүсуру оланлар үчүн таныма елементи (пул нишанларынын өн тәрәфиндә сағ вә сол кәнарларда ҝөрмә гүсуру оланлар үчүн хүсуси габарыг хәтләр јерләшир ки, бу хәтләрә тохунмагла пул нишанынын һәгигилијини вә номиналыны мүәјјән етмәк мүмкүндүр), шагули дизајн (банкнот истеһсалы саһәсиндә дүнјада ән мүасир трендә ујғун олараг пул нишанларынын арха тәрәфи шагули олараг дизајн едилиб), мүһафизә сапы, мүрәккәбсиз чап, микромәтнләр вә с. тәтбиг олунуб.
Һазырда өлкә әразисиндә истифадә едилән бүтүн нағд пул систем вә аваданлыгларынын јениләнмиш 20 манатлыг пул нишанына ујғунлашдырылмасы (адаптасијасы) просесләринә башланылыб. Ејни заманда, Мәркәзи Банк тәрәфиндән 20 гәпиклик метал пул нишанынын дизајны јениләнәрәк тәдавүлә бурахылыб. Белә ки, јениләнмиш 20 гәпиклик үзәриндә Дөвләт Ҝерби вә истеһсал или әлавә олунуб.
Јениләнмиш 20 гәпиклик пул нишанынын техники параметрләри һазырда тәдавүлдә олан ејни номиналлы метал пул нишанына мүвафиг олараг дәјишмәз олараг сахланылыб.
“Јениләнмиш 20 манатлыг кағыз пул нишаны вә 20 гәпиклик метал пул нишаны һазырда тәдавүлдә олан ејни номиналлы пул нишанлары илә паралел олараг дөвријјәдә олаҹаг вә тәдавүл васитәси кими мәһдудијјәтсиз истифадә едиләҹәк”, - АМБ-дән билдирилиб.
Гејд едәк ки, ҹари илин әввәлиндән јениләнмиш 1, 5 вә 50 манатлыг пул нишанлары тәдавүлә бурахылыб.
Диггәт: Хәбәрдән Истифадә Етдикдә Мәнбәјә Истинад Лазымдыр!
