Иран 1-ҹи Азәрбајҹан Республикасы 3-ҹү јердәдир

АБНА24 Хәбәр Верир, Русија, Иран вә Газахыстанын һәрби дәнизчиләри мүсабигәнин “Ҝәминин дајаныглығы уғрунда мүбаризә вә хиласетмә һазырлығы” үзрә мәрһәләсиндә “Хиласетмә васитәләринин истифадәси” тапшырығыны јеринә јетирибләр. Бу мәрһәләдә һәрби дәнизчиләр командада беш нәфәр олмагла хүсуси үзҝүчүлүк ҝејимләрини ҝејинәрәк мүәјјән мәсәфәни гәт едиб, хиласедиҹи салы аварлар васитәсилә тәјин олунан нөгтәјә ҝәтирибләр.

Һакимләр комиссијасынын гәрары илә бу мәрһәләдә Иран командасы 20 балла биринҹи, Русија командасы 18 балла икинҹи, Азәрбајҹан командасы 16 балла үчүнҹү, Газахыстан командасы исә 11 балла дөрдүнҹү јерә лајиг ҝөрүлүб. Јарышларын үмуми нәтиҹәсинә ҝөрә һазырда Иран командасы 58 балла биринҹи, Газахыстан командасы 49 балла икинҹи, Азәрбајҹан командасы 48 балла үчүнҹү, Русија командасы исә 46 балла дөрдүнҹү јердә гәрарлашыб. Гејд едәк ки, "Бејнәлхалг Орду Ојунлары - 2021" јарышлары чәрчивәсиндә кечирилән "Дәниз кубоку" мүсабигәси үмуми үч мәрһәлә үзрә алты епизоддан ибарәтдир. Нөвбәти ҝүнләрдә Азәрбајҹан Республикасынын һәрби дәнизчиләри "Артиллерија атышларынын јеринә јетирилмәси" вә "Дәниз һазырлығы" үзрә мәрһәләләрдә ҝүҹләрини сынајаҹаглар.

Хатырладаг ки, августун 25-дә "Бејнәлхалг Орду Ојунлары - 2021" јарышлары чәрчивәсиндә Иран Ислам Республикасынын Әнзәли шәһәриндә кечирилән "Дәниз кубоку" мүсабигәсинә старт верилди.

Иран Ислам Республикасынын Һәрби Дәниз Гүввәләри команданынын мүавини адмирал Һәмзә Кавјани "Дәниз кубоку" мүсабигәсинин һәрби әмәкдашлығын, һәрбчиләр арасында достлуг мүнасибәтләринин мөһкәмләндирилмәси вә пешәкарлығын даһа да артырылмасы мәгсәдилә тәшкил олундуғуну билдирмишдир.

Сентјабрын 4-дәк давам едәҹәк мүсабигәдә һәрби дәнизчиләр "Артиллерија атышларынын јеринә јетирилмәси", "Ҝәминин дајаныглығы уғрунда мүбаризә вә хиласетмә һазырлығы" вә "Дәниз һазырлығы" мәрһәләләриндә мүбаризә апараҹаглар.

342/