Гафгаз Мүсәлманлары Идарәси Газылар Шурасы төвсијәси

АБНА24 Хәбәр Верир, Гафгаз Мүсәлманлары Идарәси Газылар Шурасы төвсијә јајыб. Бу барәдә ГМИ-нин мәтбуат хидмәтиндән мәлумат верилиб.

Төвсијәдә дејилир: “Мөһтәрәм мөмин гардаш вә баҹыларымыз! Сон заманлар диндарларымыз тәрәфиндән едилән мүраҹиәтләри нәзәрә алараг, Гафгаз Мүсәлманлары Идарәси Газылар Шурасы ашағыдакылары билдирмәји ваҹиб сајыр:

Ислам дини инсанын өз сағламлығы гајғысына галмасыны иманын бир парчасы кими гәбул едир. Мүсәлман аләминдә тәбабәтин “тибби-нәбәви” (Пејғәмбәр тибби) адланан хүсуси бир бөлмәси мөвҹуддур ки, орада Пејғәмбәримизин тибби бахышлары, Сүннәдә тиббин мәгамы вә әһәмијјәти ҝениш шәкилдә ишыгландырылыр. Һәзрәт Муһәммәд (с) сәһијјә саһәси илә јахындан марагланмыш, онун бу мөвзу илә әлагәли һәдисләри инсанлар үчүн јол ҝөстәриҹиси олмушдур. Ејни заманда Аллаһын гүдрәт вә әзәмәтини, әбәди вә әзәли һикмәтини инсанлара чатдыран Гурани-Кәримдә бир сыра тиббә даир мәлуматлар әкс олунур.

Бир сыра алымләрин вә мүасир исламшүнасларын рәјинә ҝөрә, Гурани-Кәримин сағламлыг барәсиндә әсас принсипи мүалиҹә илә јанашы, инсаны мүһафизә етмәк, онун сағламлығыны горумаг – һифзү-сиһһәдир.

Һифзү-сиһһәјә бир сыра ҝиҝијеник тәлиматлар, о ҹүмләдән, нормал гидаланма, зәрәрли әрзаглардан вә јолухуҹу хәстәликләрдән горунма мәсләһәтләри дә дахилдир. Инсанын сағламлығына гаршы бу гәдәр һәссас вә ҹидди олан бир дини систем кими, Ислам тибби мәсәләләрин һәм әхлаги, һәм дә һүгуги бахымдан дүзҝүн узлашдырылмасыны даима диггәтдә сахламышдыр.

ГМИ Газылар Шурасы билдирир ки, Уҹа Аллаһын бујурдугларына, мүгәддәс һәдисләрә истинадән өзүнүн, јахынларынын вә әтрафындакыларын һәјат вә сағламлығыны тәһлүкәјә атмамаг һәр бир инсанын борҹудур. Заманында вәба епидемијасы һаггында Пејғәмбәримиз Һз.Мәһәммәд белә бујурмушдур: “Вәбанын олдуғу јерә ҝетмәјин, әҝәр вәбанын олдуғу јердәсинизсә, орадан чыхмајын”.

Иманлы инсан тәкҹә өз ҹанынын дејил, башгаларынын да ҹанынын горунмасындан мәсул вә мүкәлләфдир. Динимиз мүхтәлиф хәстәликләрә гаршы өнләјиҹи тәдбирләрин алынмасына, хүсусилә јолухуҹу хәстәликләрә гаршы сон дәрәҹә диггәтли олмаға чағырыр. Һәр бир инсан белә бир тәһлүкәдән өзүнү ҝөзләмәлидир, чүнки мүгәддәс Гурани-Кәримдә бујурулдуғу кими: “Өз әлинизлә өзүнүзү тәһлүкәјә атмајын” (Бәгәрә, 195).

Бу илаһи һөкмү вә мүасир шәриәт алимләринин мүвафиг фәтваларыны нәзәрә алараг, диндарларымыза төвсијә едирик ки, пандемија илә мүбаризәдә ән тәсирли васитә сајылан пејвәндләрин вурулмасында фәал мөвге тутсунлар, өзләрини вә јахынларыны ваксин васитәси илә бу ағыр бәладан мүһафизә етсинләр.

Нәзәринизә чатдырырыг ки, дүнјанын апарыҹы дини мәркәзләри ваксинин истифадәсини мәгбул һесаб едир вә зәманәнин бәласына чеврилмиш хәстәликлә мүбаризәдә тәсирли васитә кими төвсијә едирләр.

Гафгаз Мүсәлманлары Идарәси дөвләтимизин пандемијаја гаршы гәбул етдији гәрар вә ҝөстәришләри дәстәкләјир, ҹәмијјәтимизи бу ваҹиб мәсәләјә ҹидди вә диггәтли јанашмаға дәвәт едир.

Аллаһ һамымызын јардымчысы олсун, дөвләтимизи вә халгымызы бәлалардан һифз етсин!”.



342/